ᠡᠪᠦᠬᠡ ᠲᠡᠭᠡᠳᠦᠰ ᠡᠴᠡ ᠤᠯᠠᠮᠵᠢᠯᠠᠭᠰᠠᠨ ᠦᠪ ᠰᠤᠶᠤᠯ ᠤᠨ ᠨᠠᠨᠳᠢᠨ ᠡᠷᠳᠡᠨᠢ
2025-03-09 04:04:27
ᠤᠲᠤᠭ ᠤᠨ ᠡᠮᠦᠨᠡᠲᠤ ᠬᠤᠰᠢᠭᠤᠨ ᠤ ᠰᠤᠶᠤᠯ ᠪᠠ ᠵᠢᠭᠤᠯᠴᠢᠯᠠᠯ ᠤᠨ ᠲᠤᠪᠴᠢᠶᠠ᠂ ᠤᠲᠤᠭ ᠤᠨ ᠡᠮᠦᠨᠡᠲᠤ ᠬᠤᠰᠢᠭᠤᠨ ᠤ ᠦᠨᠳᠦᠰᠦᠲᠡᠨ ᠤ ᠬᠡᠷᠡᠭ ᠡᠷᠬᠢᠯᠡᠬᠦ ᠵᠦᠪᠯᠡᠯ᠂ ᠨᠠᠨᠭᠰᠤ ᠪᠠᠯᠭᠠᠰᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ᠂ ᠬᠡᠷᠡᠨᠭᠬᠡᠲᠤ ᠭᠠᠴᠠᠭᠠᠨ ᠤ ᠨᠠᠮ ᠤᠨ ᠡᠬᠦᠷ᠂ ᠭᠠᠴᠠᠭᠠ ᠵᠦᠪᠯᠡᠯ ᠡᠴᠡ ᠬᠠᠮᠲᠤᠷᠠᠨ ᠶᠠᠪᠤᠭᠳᠠᠭᠤᠯᠤᠭᠰᠠᠨ ᠲᠡᠮᠡᠬᠡᠨ ᠭᠠᠯ ᠤᠨ ᠲᠠᠬᠢᠯᠭᠠ ᠵᠢᠨ ᠪᠤᠳᠠᠰ ᠤᠨ ᠪᠤᠰᠤ ᠰᠤᠶᠤᠯ ᠤᠨ ᠦᠪ ᠢ ᠬᠠᠮᠠᠭᠠᠯᠠᠬᠤ ᠠᠵᠢᠯᠯᠠᠭᠠ ᠤᠲᠤᠭ ᠤᠨ ᠡᠮᠦᠨᠡᠲᠤ ᠬᠤᠰᠢᠭᠤᠨ ᠤ ᠨᠠᠨᠭᠰᠤ ᠪᠠᠯᠭᠠᠰᠤᠨ ᠤ ᠬᠡᠷᠡᠨᠭᠬᠡᠲᠤ ᠭᠠᠴᠠᠭᠠᠨ ᠤ ᠮᠠᠯᠴᠢᠨ ᠵᠠᠨᠭᠭᠠ ᠵᠢᠨ ᠳ᠋ᠤ ᠶᠠᠪᠤᠭᠳᠠᠯᠠ᠃
ᠤᠶᠢᠯᠠᠭᠠᠭᠰᠠᠨ ᠵᠢᠡᠷ ᠤᠲᠤᠭ ᠤᠨ ᠡᠮᠦᠨᠡᠲᠤ ᠬᠤᠰᠢᠭᠤᠨ ᠳ᠋ᠤ ᠦᠬᠡᠷᠴᠢᠯᠡᠯᠲᠡ ᠬᠢᠵᠤ ᠴᠢᠯᠥᠬᠡᠲᠡᠢ ᠶᠠᠪᠤᠯᠴᠠᠬᠤ ᠡᠴᠡ ᠡᠮᠦᠨᠡᠬᠡᠨ ᠪᠤᠯᠲᠠᠯᠠ ᠶᠡᠭᠡ ᠤᠯᠠᠨ ᠲᠡᠮᠡᠬᠡ ᠲᠠᠢ ᠪᠠᠶᠢᠭᠰᠠᠨ ᠪᠤᠯᠪᠠᠴᠤ ᠶᠡᠭᠡ ᠬᠠᠮᠲᠤ ᠵᠠᠳᠠᠷᠠᠨ᠂ ᠪᠡᠯᠴᠢᠬᠡᠷ ᠨᠤᠲᠤᠭ᠂ ᠮᠠᠯ ᠬᠦᠷᠦᠨᠭᠬᠡ ᠶ᠋ᠢ ᠬᠤᠪᠢ ᠡᠷᠦᠬᠡ ᠳ᠋ᠤ ᠬᠤᠪᠢᠶᠠᠨ ᠦᠭᠭᠦᠭᠰᠡᠨ ᠡᠴᠡ ᠬᠤᠶᠢᠰᠢ ᠤᠭᠵᠤᠮ ᠴᠦᠬᠡᠷᠡᠵᠤ᠂ ᠤᠯᠠᠨᠭᠭᠢ ᠮᠠᠯᠴᠢᠨ ᠠᠶᠢᠯ ᠡᠷᠦᠬᠡ ᠵᠢᠨ ᠡᠬᠦᠳᠡᠨ ᠳ᠋ᠤ ᠲᠡᠮᠡᠬᠡᠨ ᠪᠠᠷᠠ ᠬᠠᠷᠠᠭᠳᠠᠬᠤ ᠪᠡᠨ ᠪᠤᠯᠢᠵᠤ᠂ ᠠᠭᠠᠵᠢᠮ ᠠᠭᠠᠵᠢᠮ ᠵᠢᠡᠷ ᠪᠠᠷᠤᠭ ᠤᠰᠠᠳᠬᠤ ᠬᠡᠮᠵᠢᠶᠡᠨ ᠳ᠋ᠤ ᠬᠦᠷᠴᠠᠢ᠃ ᠬᠡᠪᠡᠴᠤ ᠲᠡᠮᠡᠬᠡᠨ ᠮᠢᠬᠠᠨ ᠤ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭᠠ ᠪᠠ ᠨᠤᠲᠤᠭ ᠤᠨ ᠮᠠᠯᠴᠢᠳ ᠤᠨ ᠪᠡᠶᠡᠵᠢᠯ ᠴᠢᠨᠡᠬᠡᠯᠢᠭᠵᠢᠯ ᠤᠨ ᠳᠠᠭᠠᠤ ᠤᠶᠢᠷᠠ ᠵᠢᠨ ᠬᠤᠶᠠᠷ ᠵᠢᠯ ᠡᠴᠡ ᠳᠠᠬᠢᠨ ᠲᠡᠮᠡᠬᠡᠨ ᠪᠠᠷᠠ ᠬᠠᠷᠠᠬᠤ ᠪᠤᠯᠤᠭᠰᠠᠨ ᠨᠢ ᠪᠠᠶᠠᠷᠯᠠᠭᠤᠰᠢᠲᠠᠢ᠃ ᠮᠦᠨᠴᠤ ᠡᠮᠦᠨᠡ ᠬᠤᠶᠠᠷ ᠵᠢᠯ ᠤᠨ ᠭᠠᠡᠭ ᠭᠠᠮᠰᠢᠭ ᠤᠨ ᠪᠠᠶᠢᠳᠠᠯ ᠡᠴᠡ ᠪᠤᠯᠵᠤ᠂ ᠮᠠᠨ ᠤ ᠤᠷᠤᠨ ᠤ ᠠᠯᠠᠱᠠ ᠠᠶᠢᠮᠠᠭ ᠪᠠ ᠪᠠᠶᠠᠠᠨᠠᠭᠤᠷ ᠬᠤᠲᠠ ᠵᠢᠨ ᠮᠠᠯᠴᠢᠳ ᠤᠨ ᠪᠡᠯᠴᠢᠬᠡᠷ ᠨᠤᠲᠤᠭ ᠮᠠᠰᠢ ᠶᠡᠭᠡ ᠬᠤᠬᠢᠷᠠᠯ ᠳ᠋ᠤ ᠤᠴᠠᠷᠠᠵᠤ᠂ ᠵᠠᠷᠢᠮ ᠭᠠᠵᠠᠷ ᠤᠷᠤᠨ ᠳ᠋ᠤ ᠤᠯᠠᠭᠠᠨ ᠬᠠᠯᠴᠠᠭᠠᠢ ᠪᠤᠯᠤᠭᠰᠠᠨ ᠡᠴᠡ ᠲᠤᠬᠠᠢ ᠵᠢᠨ ᠭᠠᠵᠠᠷ ᠤᠨ ᠮᠠᠯᠴᠢᠳ ᠲᠡᠮᠡᠬᠡ ᠪᠡᠨ ᠮᠠᠯᠵᠢᠬᠤ ᠳ᠋ᠤ ᠬᠦᠴᠢᠷᠲᠡᠢ ᠪᠤᠯᠵᠤ᠂ ᠬᠡᠷᠪᠡ ᠰᠡᠳᠬᠢᠯ ᠲᠠᠭᠠᠷᠠᠪᠠᠯ ᠪᠠᠷᠤᠭ ᠲᠦᠯᠥᠪᠦᠷᠢ ᠦᠭᠡᠢ ᠪᠡᠷ ᠪᠤᠳᠤᠭᠤ ᠲᠤᠷᠤᠮ ᠵᠢᠡᠨ ᠦᠭᠭᠦ ᠬᠡᠮᠵᠢᠶᠡᠨ ᠳ᠋ᠤ ᠬᠦᠷᠴᠡᠢ᠃ ᠡᠶᠢᠮᠤ ᠪᠠᠶᠢᠳᠠᠯ ᠲᠤᠤᠷᠠ ᠭᠠᠵᠠᠷ ᠭᠠᠵᠠᠷ ᠤᠨ ᠮᠠᠯᠴᠢᠳ ᠢᠲᠡᠭᠡᠯ ᠰᠡᠳᠬᠢᠯ ᠵᠢᠡᠨ ᠨᠢᠬᠡᠳᠬᠡᠨ ᠵᠦᠭ ᠪᠤᠯᠭᠠᠨ ᠡᠴᠡ ᠲᠤᠰᠠᠯᠠᠮᠵᠢ ᠵᠢᠨ ᠮᠦᠨᠭᠭᠦ ᠪᠠ ᠡᠪᠡᠰᠦ ᠪᠤᠷᠳᠤᠭᠠ ᠪᠡᠨ ᠲᠡᠳᠡᠨ ᠳ᠋ᠤ ᠬᠠᠷᠠᠮ ᠦᠭᠡᠢ ᠬᠦᠷᠭᠡᠵᠤ ᠦᠭᠴᠡᠢ᠃ ᠤᠲᠤᠭ ᠤᠨ ᠡᠮᠦᠨᠡᠲᠤ ᠬᠤᠰᠢᠭᠤᠨ ᠤ ᠮᠠᠯᠴᠢᠳ ᠡᠨᠡ ᠦᠶᠡ ᠳ᠋ᠤ ᠪᠠᠰᠠ ᠦᠪᠡᠷ ᠦᠪᠡᠷ ᠤᠨ ᠰᠡᠳᠬᠢᠯ ᠵᠢᠡᠨ ᠭᠠᠷᠭᠠᠵᠤ ᠲᠡᠳᠡᠨ ᠢ ᠲᠤᠰᠠᠯᠠᠨ ᠳᠡᠮᠵᠢᠬᠦ ᠵᠢᠨ ᠬᠠᠮᠲᠤ ᠪᠤᠲᠤᠭᠤ ᠲᠤᠷᠤᠮ ᠢ ᠨᠢ ᠬᠤᠳᠠᠯᠳᠤᠨ ᠠᠪᠴᠤ ᠨᠤᠲᠤᠭ ᠲᠠᠭᠠᠨ ᠲᠡᠭᠡᠭᠡᠵᠤ ᠢᠷᠡᠵᠡᠢ᠃ ᠢᠨᠭᠭᠢᠬᠡᠳ ᠤᠬᠤᠷᠬᠠᠨ ᠬᠡᠳᠦᠨ ᠵᠢᠯ ᠤᠨ ᠬᠤᠭᠤᠷᠤᠨᠳᠤ ᠲᠤᠰ ᠬᠤᠰᠢᠭᠤᠨ ᠤ ᠮᠠᠯᠴᠢᠳ ᠤᠨ ᠡᠬᠦᠳᠡᠨ ᠳ᠋ᠤ ᠲᠡᠮᠡᠬᠡ ᠤᠯᠠᠰᠢᠷᠠᠨ᠂ ᠲᠡᠭᠡᠷᠡ ᠵᠢᠯ ᠤᠨ ᠬᠤᠪᠢ ᠳ᠋ᠤ ᠪᠠᠷᠤᠭ ᠮᠢᠨᠭᠭᠠᠨ ᠲᠤᠯᠤᠭᠠᠢ ᠬᠦᠷᠴᠡᠢ᠃
ᠬᠡᠷᠡᠨᠭᠬᠡᠲᠤ ᠭᠠᠴᠠᠭᠠᠨ ᠤ ᠭᠠᠵᠠᠷ ᠤᠨ ᠪᠠᠶᠢᠴᠠ ᠨᠢ ᠰᠢᠯᠢ ᠪᠠᠯᠠᠷ ᠵᠢᠡᠷ ᠭᠤᠤᠯᠳᠠᠵᠤ ᠪᠠᠶᠢᠭᠠ ᠪᠤᠯᠬᠤᠷ ᠲᠡᠮᠡᠬᠡ ᠮᠠᠯᠵᠢᠬᠤ ᠳ᠋ᠤ ᠶᠡᠭᠡᠳᠡ ᠲᠤᠬᠢᠷᠠᠭᠰᠠᠨ ᠪᠠᠶᠢᠳᠠᠭ᠃ ᠤᠳᠤ ᠲᠤᠰ ᠭᠠᠴᠠᠭᠠᠨ ᠳ᠋ᠤ ᠨᠡᠶᠢᠲᠡ ᠪᠠᠷᠤᠭ ᠲᠦᠴᠢᠬᠡᠳ ᠲᠡᠮᠡᠬᠡ ᠲᠠᠢ ᠪᠤᠯᠵᠤ᠂ ᠦᠨᠦᠳᠦᠷ ᠤᠨ ᠡᠨᠡᠬᠦ ᠠᠵᠢᠯᠯᠠᠭᠠ ᠳ᠋ᠤ ᠬᠤᠷᠢ ᠭᠠᠷᠤᠢ ᠲᠡᠮᠡᠬᠡ ᠢᠷᠡᠭᠰᠡᠨ ᠪᠠᠶᠢᠨᠠ᠃ ᠦᠨᠦᠳᠦᠷ ᠡᠨᠳᠡ ᠲᠡᠮᠡᠬᠡᠨ ᠭᠠᠯ ᠤᠨ ᠲᠠᠬᠢᠯᠭᠠ ᠶᠠᠪᠤᠭᠳᠠᠭᠤᠯᠬᠤ ᠵᠢᠨ ᠬᠠᠮᠲᠤ ᠪᠠᠰᠠ ᠤᠰᠤᠨ ᠵᠢᠷᠤᠭᠠ ᠮᠤᠷᠢᠨ ᠤᠷᠤᠯᠳᠤᠭᠠᠨ ᠢ ᠡᠷᠬᠢᠯᠡᠨ ᠬᠢᠭᠰᠡᠨ ᠡᠴᠡ ᠲᠤᠰ ᠭᠠᠴᠠᠭᠠᠨ ᠤ ᠠᠳᠤᠭᠤᠴᠢᠳ ᠪᠦᠷᠢᠨ ᠴᠢᠮᠡᠭᠯᠡᠯ ᠲᠠᠢ ᠵᠢᠷᠤᠭᠠ ᠮᠤᠷᠢᠳ ᠵᠢᠡᠨ ᠤᠨᠤᠵᠤ᠂ ᠦᠨᠳᠦᠰᠦᠲᠡᠨ ᠤ ᠬᠤᠪᠴᠠᠰᠤ ᠵᠠᠰᠠᠯ ᠵᠢᠡᠷ ᠭᠤᠶᠤᠯᠠᠭᠰᠠᠨ ᠡᠴᠡ ᠮᠠᠰᠢ ᠦᠵᠡᠰᠬᠦᠯᠡᠨᠭᠲᠡᠢ ᠬᠠᠷᠠᠭᠳᠠᠨᠠ᠃
ᠤᠷᠳᠤᠰ ᠨᠤᠲᠤᠭ ᠵᠢᠡᠷ ᠠᠪᠴᠤ ᠬᠡᠯᠡᠪᠡᠯ ᠲᠡᠮᠡᠬᠡᠨ ᠭᠠᠯ ᠤᠨ ᠲᠠᠬᠢᠯᠭᠠ ᠪᠤᠶᠤ ᠢᠨᠭᠭᠢᠨ ᠭᠠᠯ ᠤᠨ ᠲᠠᠬᠢᠯᠭᠠ ᠨᠢ ᠭᠤᠤᠯᠳᠠᠭᠤ ᠬᠠᠨᠭᠭᠢᠨ ᠬᠤᠰᠢᠭᠤᠨ ᠳ᠋ᠤ ᠶᠡᠭᠡ ᠬᠡᠪᠴᠢᠶᠡ ᠲᠠᠢ ᠪᠡᠷ ᠶᠠᠪᠤᠭᠳᠠᠵᠤ᠂ ᠤᠷᠳᠤᠰ ᠲᠤᠭᠠᠯᠠᠯ ᠤᠨ ᠲᠠᠪᠤᠨ ᠰᠠᠷᠠ ᠵᠢᠨ ᠠᠷᠪᠠᠨ ᠨᠢᠬᠡᠨ ᠪᠤᠶᠤ ᠲᠡᠭᠦᠨ ᠤ ᠡᠮᠦᠨᠡᠬᠦᠷ ᠬᠤᠶᠢᠭᠤᠷ ᠬᠠᠷᠠ ᠮᠤᠷᠢ᠂ ᠬᠠᠷᠠᠭᠴᠢᠨ ᠮᠤᠷᠢ ᠪᠤᠶᠤ ᠬᠠᠷᠠ ᠦᠬᠡᠷ᠂ ᠬᠠᠷᠠᠭᠴᠢᠨ ᠦᠬᠡᠷ ᠡᠳᠦᠷ ᠢ ᠰᠤᠨᠭᠭᠤᠵᠤ ᠲᠠᠬᠢᠯᠭᠠ ᠦᠢᠯᠡᠳᠳᠡᠭ᠂ ᠬᠠᠨᠭᠭᠢᠨ ᠬᠤᠰᠢᠭᠤ ᠲᠠᠢ ᠠᠳᠠᠯᠢᠳᠬᠠᠪᠠᠯ ᠲᠡᠮᠡᠬᠡ ᠪᠡᠷ ᠮᠠᠰᠢ ᠴᠦᠬᠡᠨ ᠡᠨᠡ ᠨᠤᠲᠤᠭ ᠤᠨ ᠮᠠᠯᠴᠢᠳ ᠲᠠᠪᠤᠨ ᠰᠠᠷᠠ ᠵᠢᠨ ᠰᠢᠨᠡ ᠵᠢᠨ ᠬᠤᠶᠠᠷ ᠢ ᠰᠤᠨᠭᠭᠤᠨ ᠲᠠᠬᠢᠯᠭᠠ ᠪᠡᠨ ᠦᠢᠯᠡᠳᠳᠡᠭ ᠨᠢ ᠤᠯᠠᠨᠭᠭᠢ ᠬᠦᠮᠦᠨ ᠤ ᠭᠠᠶᠢᠬᠠᠰᠢ ᠲᠦᠷᠦᠬᠦᠯᠥᠨᠡ᠃ ︽ᠭᠠᠵᠠᠷ ᠭᠠᠵᠠᠷ ᠤᠨ ᠵᠠᠡᠭ᠂ ᠬᠦᠵᠡᠭᠡ ᠬᠦᠵᠡᠬᠡᠨ ᠤ ᠪᠤᠯᠤᠡᠭ︾ᠬᠡᠵᠤ ᠮᠤᠨᠭᠭᠤᠯᠴᠤᠳ ᠬᠡᠯᠡᠳᠡᠭ ᠡᠴᠡ ᠨᠤᠲᠤᠭ ᠨᠤᠲᠤᠭ ᠲᠤ ᠶᠠᠨᠭᠵᠤ ᠪᠦᠷᠢ ᠪᠡᠷ ᠤᠯᠠᠮᠵᠢᠯᠠᠯᠲᠤ ᠰᠤᠶᠤᠯ ᠵᠠᠨᠭᠰᠢᠯ ᠵᠢᠡᠨ ᠤᠯᠠᠮᠵᠢᠯᠠᠵᠤ ᠪᠠᠶᠢᠭᠠ ᠨᠢ ᠰᠤᠶᠤᠯ ᠤᠨ ᠤᠯᠠᠨ ᠶᠠᠨᠭᠵᠤᠲᠤ ᠰᠢᠨᠵᠢ ᠵᠢᠨ ᠪᠠᠰᠠ ᠨᠢᠬᠡ ᠤᠨᠴᠠᠯᠢᠭ ᠪᠢᠯᠡ᠃ ᠮᠠᠯᠴᠢᠨ ᠵᠠᠨᠭᠭᠠ ᠵᠢᠨ ᠬᠡᠷ ᠤᠨ ᠪᠠᠷᠠᠭᠤᠨ ᠡᠮᠦᠨᠡᠬᠢ ᠵᠡᠯᠡᠨ ᠳ᠋ᠤ ᠬᠤᠷᠢᠭᠠᠳ ᠲᠡᠮᠡᠭᠡ ᠪᠠ ᠠᠵᠢᠷᠭᠠ᠂ ᠪᠤᠬᠠ᠂ ᠤᠬᠤᠨᠠ᠂ ᠬᠤᠴᠠ ᠶ᠋ᠢ ᠲᠤᠰ ᠪᠦᠷᠢ ᠨᠢᠬᠡ ᠶ᠋ᠢ ᠤᠶᠠᠭᠰᠠᠨ ᠡᠴᠡ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠪᠦᠷᠢᠳᠴᠤ ᠤᠳᠠᠯ ᠦᠭᠡᠢ ᠲᠡᠮᠡᠬᠡᠨ ᠭᠠᠯ ᠤᠨ ᠲᠠᠬᠢᠯᠭᠠ ᠶᠠᠪᠤᠭᠳᠠᠯᠠ᠃
ᠡᠨᠡᠬᠦ ᠭᠠᠯ ᠲᠠᠬᠢᠯᠭᠠ ᠨᠢ ᠮᠠᠨ ᠤ ᠮᠤᠨᠭᠭᠤᠯᠴᠤᠳ ᠤᠨ ᠦᠬᠡᠯᠵᠢᠨ ᠰᠠᠷᠠ ᠵᠢᠨ ᠬᠤᠷᠢᠨ ᠭᠤᠷᠪᠡᠨ᠂ ᠲᠦᠷᠪᠡᠨ ᠤ ᠭᠠᠯ ᠲᠠᠬᠢᠯᠭᠠ ᠲᠠᠢ ᠪᠠᠷᠤᠭ ᠠᠳᠠᠯᠢᠬᠠᠨ ᠪᠠᠶᠢᠵᠤ᠂ ᠨᠢᠬᠡ ᠢᠯᠡᠬᠦᠦ ᠶᠠᠪᠤᠳᠠᠯ ᠨᠢ ᠪᠤᠤᠷᠠ ᠪᠠᠨ ᠬᠦᠲᠦᠯᠥᠨ ᠭᠠᠯ ᠤᠨ ᠲᠡᠷᠭᠡᠳᠡ ᠠᠪᠴᠢᠷᠠᠵᠤ᠂ ᠵᠤᠭᠳᠤᠷ ᠤᠨ ᠨᠤᠤᠰᠤ ᠡᠴᠡ ᠨᠢ ᠬᠠᠶᠢᠴᠢᠯᠠᠨ ᠡᠪᠴᠢᠬᠦᠦ ᠪᠡᠨ ᠴᠢᠮᠡᠳᠡᠭ ᠠᠵᠢ᠃ ᠭᠠᠯ ᠤᠨ ᠲᠠᠬᠢᠯᠭᠠ ᠲᠠᠢ ᠵᠡᠷᠭᠡᠴᠡᠭᠡᠳ ᠲᠠᠪᠤᠨ ᠬᠤᠰᠢᠭᠤ ᠮᠠᠯ᠂ ᠲᠠᠪᠤᠨ ᠲᠠᠷᠢᠶᠠ᠂ ᠬᠦᠮᠦᠨ ᠠᠷᠠᠳ᠂ ᠨᠤᠲᠤᠭ ᠤᠰᠤᠨ ᠤ ᠳᠠᠯᠠᠯᠭᠠ ᠶᠠᠪᠤᠭᠳᠠᠯᠠ᠃ ᠡᠨᠡ ᠪᠦᠬᠦ ᠦᠢᠯᠡ ᠪᠡᠨ ᠬᠦᠢᠴᠡᠳᠬᠡᠬᠡᠳ ᠤᠰᠤᠨ ᠵᠢᠷᠤᠭᠠ ᠮᠤᠷᠢᠨ ᠤᠷᠤᠯᠳᠤᠭᠠᠨ ᠵᠢᠡᠨ ᠬᠢᠵᠤ ᠬᠤᠷᠠᠭᠰᠠᠨ ᠪᠦᠬᠦᠳᠡ ᠵᠢᠨ ᠬᠡᠶᠢᠮᠤᠷᠢ ᠰᠡᠷᠬᠦᠬᠡᠵᠤ ᠨᠢᠳᠤ ᠶ᠋ᠢ ᠪᠠᠶᠠᠰᠬᠠᠭᠰᠠᠨ ᠪᠢᠯᠡ᠃