ᠬᠠᠵᠠᠭᠠᠷ ᠤᠨ ᠴᠢᠮᠡᠭᠡ ᠲᠠᠢ ᠯᠠᠪᠰᠠᠯᠠᠬᠤ ᠴᠡᠡᠭᠭᠡᠷ ᠴᠠᠰ
2025-04-01 09:55:27
ᠮᠢᠯᠠᠭᠠ ᠳᠠᠯᠠᠶᠢᠭᠰᠠᠨ ᠰᠥᠷ ᠢᠶᠠᠷ ᠲᠡᠭ᠍ᠷᠢ ᠢᠢᠨ ᠴᠢᠷᠠᠢ ᠪᠠᠷᠣᠶᠢᠭᠰᠠᠭᠠᠷ
ᠮᠢᠨᠴᠢᠭᠡᠷ ᠬᠥᠷᠡᠩ ᠬᠠᠴᠠᠷ ᠳᠡᠭᠡᠷᠡ ᠮᠢᠨᠢ ᠯᠠᠪᠠᠢ ᠴᠡᠴᠡᠭ ᠬᠠᠶᠠᠯᠠᠨᠠ
ᠮᠢᠨᠳᠠᠰᠣᠨ ᠲᠣᠷᠭᠠᠨ ᠲᠠᠯᠠ ᠢᠢᠨ ᠥᠶᠡᠯᠵᠡᠭᠡ ᠥᠭᠡᠶᠢᠯᠡᠨ ᠳᠡᠷᠪᠡᠵᠥ
ᠮᠢᠷᠠᠯᠵᠠᠬᠤ ᠵᠥᠭᠡᠯᠡᠨ ᠵᠡᠷᠭᠡᠯᠭᠡᠨ ᠤ ᠵᠢᠷᠪᠢᠯᠵᠡᠭᠡ ᠰᠣᠷᠠᠭᠯᠠᠨ ᠪᠥᠵᠢᠵᠥ
ᠮᠢᠬᠠᠯᠢᠭ ᠬᠥᠭᠡᠷᠥᠬᠦᠨ ᠬᠡᠥᠬᠡᠳ ᠤᠨ ᠥᠷᠪᠦᠭᠡ ᠢᠯᠪᠢᠨ ᠣᠶᠠᠰᠴᠣ
ᠮᠢᠨᠳᠠᠭ ᠵᠡᠭᠦᠭ᠍ᠰᠡᠨ ᠲᠣᠭᠤᠷᠭᠠᠲᠠᠳ ᠤᠨ ᠥᠷᠭᠦᠭᠡ ᠢᠯᠢᠨ ᠣᠶᠠᠷᠠᠵᠣ
ᠮᠢᠩᠭᠠ ᠮᠢᠩᠭᠠᠨ ᠤ ᠨᠡᠭᠦᠳᠡᠯ ᠤᠨ ᠰᠠᠨᠰᠠᠷ ᠬᠥᠷᠳᠥ ᠢᠢᠨ ᠳᠡᠯᠪᠡᠭᠡ
ᠮᠢᠨᠣ ᠨᠣᠲᠤᠭ ᠤᠨ ᠬᠥᠷᠥᠰᠥᠨ ᠳᠤ ᠠᠭᠲᠠ ᠢᠢᠨ ᠬᠥᠯᠥᠰᠥ ᠲᠠᠢ ᠪᠠᠭᠤᠨᠠ
ᠠᠷᠣ ᠬᠠᠩᠭᠠᠢ ᠢᠢᠨ ᠠᠳᠣᠭᠤᠨ ᠤ ᠠᠯᠮᠠᠰ ᠲᠣᠭᠤᠷᠠᠢ ᠢᠢᠨ ᠲᠥᠪᠡᠷᠭᠡᠨ ᠢᠶᠠᠷ
ᠠᠲᠠᠷ ᠲᠠᠯᠠ ᠢᠢᠨ ᠠᠭᠤᠳᠠᠮ ᠳᠤ ᠠᠭᠠᠷ ᠤᠨ ᠪᠠᠭᠪᠠᠭᠠᠢ ᠪᠣᠲᠠᠷᠠᠨᠠ
ᠠᠯᠲᠠᠢ ᠨᠢᠷᠣᠭᠤᠨ ᠤ ᠣᠷᠢᠶᠠ ᠢᠢ ᠠᠶᠢᠷᠠᠭ ᠨᠠᠶᠢᠷᠠᠭ ᠠᠴᠠ ᠲᠠᠮᠢᠷᠯᠠᠵᠣ
ᠠᠯᠣᠰ ᠬᠡᠳᠥᠢ ᠢᠢᠨ ᠴᠣᠣᠷᠢᠶᠠ ᠢᠢ ᠠᠶᠠᠯᠭᠤ ᠳᠠᠭᠤᠨ ᠠᠴᠠ ᠠᠨᠢᠷᠯᠠᠵᠣ
ᠠᠷᠭᠠᠯ ᠬᠤᠷᠭᠤᠯ ᠤᠨ ᠣᠲᠤᠭᠠ ᠢᠢ ᠠᠶᠢᠯ ᠡᠷᠥᠬᠡ ᠠᠴᠠ ᠭᠠᠳᠠᠷᠯᠠᠵᠣ
ᠠᠭᠰᠣᠮ ᠠᠵᠢᠨᠠᠢ ᠢᠢᠨ ᠲᠣᠭᠤᠰᠣ ᠢᠢ ᠠᠳᠣᠭᠤᠴᠢᠨ ᠡᠷᠡ ᠠᠴᠠ ᠣᠴᠢᠷᠯᠠᠵᠣ
ᠠᠰᠣᠷᠢ ᠬᠤᠷᠮᠣᠰᠲᠠ ᠢᠢᠨ ᠴᠡᠭᠡᠯ ᠠᠴᠠ ᠠᠷᠢᠭᠤᠨ ᠴᠡᠴᠡᠭᠡᠰ ᠪᠣᠲᠠᠷᠠᠬᠤ ᠪᠠᠷ
ᠠᠯᠲᠠᠨ ᠳᠡᠯᠡᠬᠡᠢ ᠢᠢᠨ ᠥᠷᠥᠴᠡᠨ ᠳᠤ ᠠᠮᠠᠭᠠᠢ ᠰᠢᠭ᠍ᠰᠢᠷᠡᠭᠡ ᠬᠠᠩᠭᠢᠨᠠᠨᠠ
ᠨᠠᠢᠮᠠᠨ ᠵᠠᠭᠤᠨ ᠤ ᠣᠭᠲᠠᠷᠭᠤᠢ ᠳᠤ ᠨᠠᠷᠠᠨ ᠤ ᠰᠣᠷᠮᠣᠣᠰᠣ ᠴᠠᠩᠳᠣᠵᠣ
ᠨᠠᠷᠠᠯᠠᠭ ᠬᠤᠷᠸᠠ ᠢᠢᠨ ᠵᠣᠯᠠᠢ ᠳᠤ ᠨᠠᠪᠴᠢᠰ ᠤᠨ ᠭᠡᠯᠲᠡᠰ ᠬᠡᠶᠢᠰᠥᠨᠡ
ᠨᠠᠢᠮᠠᠨ ᠰᠢᠷᠭᠠ ᠢᠢᠨ ᠥᠥᠷᠰᠡᠭᠡ ᠪᠠᠷ ᠵᠡᠭᠦᠳᠥᠨ ᠤ ᠭᠤᠪᠢ ᠢᠢ ᠰᠡᠷᠡᠭᠡᠵᠥ
ᠨᠠᠮᠲᠠᠷ ᠲᠣᠣᠯᠢ ᠢᠢᠨ ᠳᠠᠭᠤᠷᠢᠰᠥᠭᠠ ᠪᠠᠷ ᠵᠢᠷᠥᠬᠡᠨ ᠤ ᠡᠭᠡᠰᠢᠭ ᠢ ᠬᠥᠭ᠍ᠯᠡᠵᠥ
ᠨᠠᠮᠰᠠᠷᠠᠢ ᠪᠣᠷᠬᠠᠨ ᠤ ᠢᠪᠡᠭᠡᠯ ᠢ ᠪᠣᠷᠵᠢᠭᠢᠨ ᠤ ᠪᠠᠭᠤᠴᠠᠨ ᠳᠤ ᠬᠤᠷᠣᠶᠢᠯᠠᠵᠣ
ᠨᠠᠷᠮᠠᠢ ᠳᠡᠭᠡᠳᠥ ᠢᠢᠨ ᠢᠷᠥᠭᠡᠯ ᠮᠣᠷᠢᠲᠠᠨ ᠤ ᠰᠠᠭᠤᠴᠠᠨ ᠳᠤ ᠳᠠᠯᠠᠯᠵᠣ
ᠨᠠᠯᠠᠭᠠᠷ ᠳᠣᠷᠣᠨᠠ ᠢᠢᠨ ᠬᠠᠭᠤᠳᠠᠰᠣᠨ ᠳᠤ ᠴᠡᠭᠡᠨ ᠯᠠᠪᠰᠠ ᠬᠠᠶᠠᠯᠠᠬᠤ ᠪᠠᠷ
ᠨᠠᠷᠠᠲᠣ ᠶ᠋ᠢᠷᠲᠢᠨᠴᠥ ᠢᠢᠨ ᠵᠣᠶᠢᠳᠡᠰᠥᠨ ᠳᠤ ᠲᠣᠯᠢᠨ ᠬᠠᠵᠠᠭᠠᠷ ᠱᠠᠷᠭᠢᠨᠠ
ᠰᠥᠰᠦᠭ ᠤᠨ ᠮᠥᠩᠬᠡ ᠽᠠᠮᠪᠤᠲᠢᠪ ᠨᠣᠶᠢᠷ ᠤᠨ ᠳᠤᠮᠳᠠ ᠪᠠᠨ ᠪᠣᠭᠤᠷᠣᠯᠲᠣᠨ
ᠰᠥᠷᠯᠢᠭ ᠥᠨᠳᠥᠷ ᠠᠭᠤᠯᠠᠰ ᠮᠥᠩᠭᠦᠨ ᠳᠡᠪᠡᠯ ᠲᠠᠢ ᠳᠣᠭᠵᠢᠷᠠᠬᠤ ᠪᠠᠷ
ᠰᠥᠰᠥᠭ ᠤᠨ ᠣᠶᠠᠬᠠᠨ ᠴᠢᠪᠬᠠᠳᠠᠰᠣ ᠰᠡᠣᠬᠢᠯ ᠤᠨ ᠳᠣᠮᠳᠠ ᠪᠠᠨ ᠣᠶᠠᠩᠭᠠᠷᠠᠵᠣ
ᠰᠥᠪᠡᠰᠢ ᠢᠢᠨ ᠬᠡ ᠲᠠᠢ ᠽᠠᠮᠪᠣᠯᠢᠩ ᠭᠡᠭᠡᠨ ᠰᠣᠪᠢᠨ ᠬᠤᠷᠣᠶᠢᠯᠠᠬᠤ ᠪᠠᠷ
ᠰᠥᠯᠳᠡ ᠢᠢᠨ ᠰᠠᠬᠢᠶᠠ ᠲᠠᠢ ᠲᠠᠪᠢᠯᠠᠩ ᠳᠤ ᠰᠠᠷᠠᠨ ᠤ ᠭᠡᠷᠡᠯ ᠠᠰᠬᠠᠷᠠᠵᠣ
ᠰᠥᠨ ᠤ ᠥᠩᠭᠡ ᠲᠠᠢ ᠳᠠᠶᠠᠩ ᠳᠤ ᠣᠳᠣᠳ ᠤᠨ ᠭᠡᠭᠡ ᠰᠡᠮᠡᠷᠡᠭ᠍ᠰᠡᠭᠡᠷ
ᠰᠥᠪᠡᠭᠡ ᠴᠠᠭᠠᠨ ᠪᠣᠯᠵᠣᠮᠣᠷ ᠤᠳ ᠥᠷ ᠢᠶᠠᠨ ᠣᠭᠲᠣᠨ ᠵᠢᠷᠭᠢᠵᠥ ᠰᠥᠷᠥᠭ
ᠰᠥᠷᠥᠭ ᠵᠡᠭᠡᠷᠡ ᠲᠡᠭ᠍ᠷᠢ ᠢᠢᠨ ᠬᠠᠶᠠᠭᠠᠨ ᠠᠴᠠ ᠨᠠᠭᠠᠰᠢᠯᠢᠨᠠ᠁
ᠬᠠᠵᠠᠭᠠᠷ ᠤᠨ ᠴᠢᠮᠡᠭᠡ ᠲᠠᠢ ᠯᠠᠪᠰᠠᠯᠠᠭᠰᠠᠨ ᠴᠡᠩᠬᠡᠷ ᠴᠠᠰᠣᠨ ᠳᠠᠯᠠᠢ ᠳᠤ
ᠬᠠᠭᠳᠠ ᠢᠢᠨ ᠨᠠᠬᠢᠶᠠ ᠨᠢᠭᠤᠭᠳᠠᠵᠣ ᠬᠠᠶᠢᠯᠭᠠᠨ ᠴᠠᠭ ᠢ ᠳᠣᠷᠠᠰᠬᠤ ᠪᠠᠷ
ᠬᠠᠨ ᠪᠠᠶᠢᠭᠠᠯᠢ ᠢᠢᠨ ᠣᠷᠴᠢᠯ ᠳᠤ ᠪᠥᠮᠪᠥᠷᠴᠡᠭ ᠤᠨ ᠬᠥᠷᠳᠥ ᠰᠢᠵᠢᠷᠲᠡᠨ
ᠬᠠᠩᠭᠠᠢ ᠬᠥᠪᠴᠢ ᠢᠢᠨ ᠡᠯᠢᠭᠡᠨ ᠠᠴᠠ ᠬᠠᠶᠢᠯ ᠤᠨ ᠮᠥᠰᠥ ᠣᠶᠠᠰᠴᠦ
ᠬᠠᠬᠢᠷ ᠡᠪᠥᠯ ᠤᠨ ᠬᠥᠰᠢᠭᠡᠨ ᠠᠴᠠ ᠬᠠᠪᠣᠷ ᠤᠨ ᠢᠷᠭᠤᠢ ᠨᠢᠳᠥᠯᠡᠵᠥ
ᠬᠠᠨᠠᠭᠠᠷ ᠭᠠᠯᠪᠠ ᠢᠢᠨ ᠡᠪᠥᠷ ᠠᠴᠠ ᠬᠠᠲᠣᠨ ᠲᠣᠣᠯᠠ ᠡᠪᠰᠢᠶᠡᠬᠦ ᠪᠠᠷ
ᠬᠠᠮᠤᠭ ᠬᠥᠬᠡ ᠲᠣᠯᠪᠣᠲᠠᠨ ᠤ ᠮᠠᠨᠳᠣᠨ ᠪᠠᠳᠠᠷᠠᠬᠤ ᠢᠢᠨ ᠣᠴᠢᠷ ᠲᠤ
ᠬᠠᠶᠠᠩᠭᠢᠷᠸᠠ ᠢᠢᠨ ᠲᠠᠷᠨᠢ ᠳᠣᠭᠰᠢᠷᠠᠨ ᠬᠥᠯᠥᠭ ᠤᠨ ᠬᠡᠶᠢᠮᠣᠷᠢ ᠰᠡᠷᠭᠦᠨᠡ᠁
（ᠬᠤᠨᠢᠴᠢᠨ ᠨᠠ᠊· ᠮᠥᠩᠬᠡᠪᠠᠭᠠᠲᠣᠷ）