ᠲᠠᠣᠯᠠᠢ ᠢᠮᠠᠭᠠ ᠬᠤᠶᠠᠷ
᠄ 2025-03-20 09:22:16
ᠲᠠᠣᠯᠠᠢ ᠯᠣᠣᠪᠠᠩ ᠢᠳᠡᠵᠦ ᠪᠠᠶᠢᠪᠠ᠃ ᠢᠮᠠᠭᠠ ᠬᠠᠷᠠᠭᠠᠳ ᠲᠣᠷᠠᠯᠠᠵᠣ᠄
︽ᠨᠠᠳᠠ ᠳᠤ ᠵᠢᠭᠠᠬᠠᠨ ᠦᠭ᠍ᠭᠦᠭᠡᠴᠢ︕︾ ᠬᠡᠮᠡᠨ ᠭᠤᠶᠣᠯᠠ᠃ ᠲᠠᠣᠯᠠᠢ ᠦᠯᠡᠳᠡᠭ᠍ᠰᠡᠨ ᠯᠣᠣᠪᠠᠩ ᠢᠶᠠᠨ ᠬᠠᠷᠠᠬᠤ ᠳᠤ ᠴᠢᠮᠠᠯᠠᠮᠠᠷ ᠵᠢᠭᠠᠬᠠᠨ ᠪᠠᠶᠢᠪᠠ᠃ ᠬᠠᠷᠠᠮᠨᠠᠬᠤ ᠰᠡᠳᠬᠢᠯ ᠲᠦᠷᠤᠵᠤ᠄
︽ᠨᠠᠳᠠ ᠳᠤ ᠴᠣ ᠭᠡᠰᠡᠨ ᠡᠳᠦᠢ ᠪᠣᠯᠣᠯᠠ ᠰᠢᠣ︕︾ ᠭᠡᠳ ᠢᠳᠡᠭ᠍ᠰᠡᠨ ᠢᠶᠠᠨ ᠦᠵᠡᠭᠦᠯᠪᠡ᠃ ᠢᠮᠠᠭᠠ ᠰᠢᠯᠦᠰᠦ ᠪᠠᠨ ᠵᠠᠯᠬᠢᠵᠦ᠄
︽ᠠᠮᠰᠠᠴᠢᠬᠠᠪᠠᠯ ᠪᠣᠯᠴᠢᠬᠠᠨᠠ︾ᠭᠡᠬᠦ ᠳᠤ ᠲᠠᠣᠯᠠᠢ᠄ ︽ᠠᠮᠰᠠᠬᠤ ᠢᠢᠨ ᠲᠠᠳᠤᠢ ᠶᠣᠮ ᠪᠣᠯ ᠢᠳᠡᠭᠡᠳ ᠶᠠᠭᠤ ᠪᠠᠶᠢᠨᠠ︖ ᠨᠢᠭᠡ ᠯᠠ ᠴᠠᠳᠣᠭᠰᠠᠨ ᠲᠡᠭᠡᠷᠡ ᠪᠢᠰᠢ ᠶᠣᠮ ᠦᠦ︖︾ᠭᠡᠳ ᠢᠳᠡᠨᠡ᠃
ᠢᠮᠠᠭᠠ ᠲᠠᠣᠯᠠᠢ ᠢᠢᠨ ᠬᠠᠷᠠᠮᠴᠢ ᠵᠠᠩ ᠳᠤ ᠲᠣᠷᠠ ᠦᠬᠡᠶᠢᠴᠡᠵᠦ᠄
︽ᠴᠢ ᠮᠢᠨᠦ ᠰᠢᠭᠡᠰᠦ ᠪᠠᠭᠠᠰᠣ ᠢᠢ ᠢᠳᠡᠵᠦ ᠪᠠᠶᠢᠨᠠ︾ ᠭᠡᠪᠡ᠃ ᠯᠣᠣᠪᠠᠩ ᠠᠮᠳᠠᠷᠬᠠᠨ ᠢᠳᠡᠭ᠍ᠰᠡᠨ ᠲᠠᠣᠯᠠᠢ ᠵᠠᠵᠢᠯᠬᠤ ᠪᠠᠨ ᠵᠣᠭᠰᠣᠨ᠄
︽ᠪᠢ ᠶᠠᠭᠠᠬᠢᠭᠠᠳ ᠴᠢᠨᠦ ᠰᠢᠭᠡᠰᠦ ᠪᠠᠭᠠᠰᠣ ᠢᠢ ᠢᠳᠡᠵᠦ ᠪᠠᠶᠢᠬᠤ ᠶᠣᠮ︖︾ᠭᠡᠵᠦ ᠰᠣᠨᠢᠷᠬᠠᠨ ᠠᠰᠠᠭᠤᠬᠤ ᠵᠠᠭᠤᠷᠠ ᠪᠠᠨ︽ᠴᠢ ᠯᠣᠣᠪᠠᠩ ᠳᠤ ᠲᠣᠷᠠᠯᠠᠭᠠᠳ ᠠᠷᠭᠠ ᠵᠠᠷᠣᠵᠣ ᠪᠠᠶᠢᠨᠠ᠃ ᠡᠨᠡ ᠵᠠᠯᠢ ᠢᠢ ᠴᠢᠨᠢ ᠭᠡᠨ ᠮᠡᠳᠡᠬᠦ ᠦᠭᠡᠢ ᠶᠣᠮ︾ ᠭᠡᠪᠡ᠃
ᠢᠮᠠᠭᠠ ᠢᠨᠢᠶᠡᠵᠦ︽ᠴᠢ ᠢᠳᠡᠭᠡᠬᠦ ᠦᠭᠡᠢ ᠪᠣᠯ ᠨᠠᠮᠠ ᠵᠢ ᠳᠠᠭᠠᠭᠠᠳ ᠢᠷᠡ︾ ᠭᠡᠯᠡ᠃
ᠬᠤᠶᠠᠭᠤᠯᠠ ᠯᠣᠣᠪᠠᠩ ᠤᠨ ᠲᠡᠷᠢᠶᠡᠨ ᠳᠤ ᠬᠦᠷᠪᠡ᠃
ᠰᠠᠷᠠᠯᠵᠢᠨ ᠬᠠᠰᠢᠶᠠ ᠲᠠᠢ᠃ ᠢᠮᠠᠭᠠ ᠣᠷᠤᠵᠣ ᠲᠡᠶᠢᠯᠬᠦ ᠦᠭᠡᠢ ᠴᠣ ᠵᠠᠪᠰᠠᠷ ᠢᠶᠠᠷ ᠨᠢ ᠲᠠᠣᠯᠠᠢ ᠰᠢᠷᠭᠤᠴᠢᠬᠠᠨᠠ᠃ ᠢᠮᠠᠭᠠ ᠲᠠᠷᠢᠶᠠᠨ ᠵᠠᠬᠠ ᠳᠤ ᠣᠪᠣᠭᠠᠯᠠᠭᠰᠠᠨ ᠰᠢᠭᠡᠭ ᠪᠣᠷᠳᠣᠭᠤᠷ ᠢ ᠵᠢᠭᠠᠵᠦ᠄
︽ᠡᠨᠡ ᠴᠢᠨᠢ ᠮᠠᠨ ᠤ ᠰᠢᠭᠡᠰᠦ ᠪᠠᠭᠠᠰᠣ᠃ ᠬᠦᠮᠦᠨ ᠡᠭᠦᠨ ᠢ ᠲᠠᠷᠢᠶᠠᠨ ᠳᠤ ᠬᠢᠨᠡ᠃ ᠭᠠᠵᠠᠷ ᠰᠢᠮᠠ ᠲᠠᠢ ᠪᠣᠯᠣᠨᠠ᠃ ᠲᠡᠭᠡᠭᠡᠳ ᠰᠠᠶ᠋ᠢ ᠰᠠᠶᠢᠬᠠᠨ ᠣᠷᠭᠤᠨᠠ᠃ ᠡᠨᠡ ᠴᠢᠨᠢ ᠶᠠᠭᠤ ᠢᠢ ᠬᠠᠷᠠᠭᠤᠯᠵᠣ ᠪᠠᠶᠢᠨᠠ︖ ᠪᠢᠳᠠᠨ ᠤ ᠪᠠᠭᠠᠰᠣ ᠰᠢᠭᠡᠰᠦ ᠢᠢ ᠴᠢ ᠢᠳᠡᠵᠦ ᠪᠠᠶᠢᠭᠠ ᠬᠡᠷᠡᠭ ᠪᠢᠰᠢ ᠶᠣᠮ ᠦᠦ︖︾ ᠭᠡᠳ ᠦᠪᠡᠷ ᠢᠶᠠᠨ ᠪᠠᠰᠠ ᠪᠠᠭᠠᠯᠠ᠃ ᠲᠡᠭᠦᠨ ᠤ ᠣᠨᠠᠭᠠᠭᠰᠠᠨ ᠬᠤᠷᠭᠤᠯ ᠣᠪᠣᠭᠠᠯᠠᠭᠰᠠᠨ ᠰᠢᠭᠡᠭ ᠲᠣᠳᠤᠷᠠ ᠲᠠᠨᠤᠭ ᠦᠭᠡᠢ ᠠᠷᠪᠢᠨ ᠪᠠᠶᠢᠪᠠ᠃
ᠲᠠᠣᠯᠠᠢ ᠬᠠᠷᠠᠨ ᠬᠠᠷᠠᠨ ᠣᠭᠰᠢᠭᠤᠯᠵᠣ ᠪᠠᠷᠢᠭᠰᠠᠨ ᠢᠶᠠᠨ ᠬᠠᠶᠠᠬᠤ ᠳᠤ ᠢᠮᠠᠭᠠ ᠲᠡᠭᠦᠵᠦ ᠠᠪᠣᠭᠠᠳ ᠠᠮᠳᠠᠷᠬᠠᠨ ᠢᠳᠡᠯᠡ᠃
︽ᠴᠢ ᠦᠪᠡᠷ ᠤᠨ ᠪᠠᠭᠠᠰᠣ ᠰᠢᠭᠡᠰᠦ ᠪᠠᠨ ᠦᠪᠡᠷ ᠢᠶᠠᠨ ᠢᠳᠡᠴᠢᠬᠡᠭ᠍ᠰᠡᠨ︾ ᠭᠡᠵᠦ ᠲᠠᠣᠯᠠᠢ ᠱᠣᠭᠯᠠᠯᠠ᠃ ᠯᠣᠣᠪᠠᠩ ᠣᠯᠵᠣ ᠢᠳᠡᠭ᠍ᠰᠡᠨ ᠢᠮᠠᠭᠠ ᠢᠨᠢᠶᠡᠵᠦ᠄
︽ᠪᠢ ᠦᠪᠡᠷ ᠤᠨ ᠪᠠᠭᠠᠰᠣ ᠰᠢᠬᠡᠰᠦ ᠪᠠᠨ ᠢᠳᠡᠬᠦ ᠳᠤ ᠶᠠᠭᠠᠬᠢᠳᠠᠭ ᠶᠣᠮ︖ ᠡᠨᠡ ᠴᠢᠨᠢ ᠮᠢᠨᠦ ᠶᠠᠭᠤᠮᠠ ᠰᠢᠣ︾ ᠭᠡᠪᠡ᠃ ᠢᠮᠠᠭᠠ ᠢᠢᠨ ᠪᠠᠭᠠᠰᠣ ᠰᠢᠭᠡᠰᠦ ᠲᠠᠢ ᠯᠣᠣᠪᠠᠩ ᠢᠳᠡᠭ᠍ᠰᠡᠨ ᠲᠠᠣᠯᠠᠢ ᠪᠣᠳᠤᠨ ᠪᠣᠳᠤᠨ ᠣᠭᠰᠢᠭᠤᠯᠵᠣ ᠬᠡᠳᠦ ᠣᠳᠠᠭᠠ ᠪᠦᠭᠡᠯᠵᠢᠭ᠍ᠰᠡᠨ ᠴᠣ ᠡᠪ ᠦᠭᠡᠢ ᠰᠠᠨᠠᠭᠳᠠᠭᠠᠳ ᠯᠣᠣᠪᠠᠩ ᠪᠣᠳᠤᠬᠤ ᠠᠴᠠ ᠲᠣᠳᠤᠷᠠ ᠨᠢ ᠮᠠᠭᠤᠬᠠᠶᠢᠷᠠᠳᠠᠭ ᠪᠣᠯᠵᠠᠢ᠃
ᠨᠢᠭᠡ ᠡᠳᠦᠷ ᠲᠠᠣᠯᠠᠢ ᠢᠢᠨ ᠳᠤ ᠱᠠᠭᠠᠵᠠᠭᠠᠢ ᠠᠶᠢᠯᠴᠢᠯᠠᠬᠤ ᠳᠠᠭᠠᠨ ᠠᠶᠢᠯ ᠳᠤ ᠭᠠᠷ ᠬᠤᠭᠤᠰᠣᠨ ᠣᠷᠤᠳᠠᠭ ᠦᠭᠡᠢ ᠶᠣᠮ᠂ ᠭᠠᠷ ᠤᠨ ᠪᠡᠯᠡᠭ ᠭᠡᠵᠦ ᠪᠡᠯᠭᠡᠰᠢᠶᠡᠨ ᠯᠣᠣᠪᠠᠩ ᠠᠪᠴᠣ ᠢᠷᠡᠵᠡᠢ᠃ ᠲᠠᠣᠯᠠᠢ ᠪᠣᠯᠢᠶᠠᠨ ᠠᠪᠴᠣ ᠡᠭᠦᠳᠡ ᠪᠠᠷ ᠴᠣᠬᠢᠵᠦ ᠭᠠᠷᠭᠠᠭᠠᠳ᠄
︽ᠡᠨᠡ ᠶᠠᠭᠤᠮᠠ ᠪᠠᠨ ᠭᠡᠨ ᠳᠡᠭᠡᠨ ᠦᠭ᠍ᠳᠡᠭ ᠪᠣᠯ ᠲᠡᠭᠦᠨ ᠳᠡᠭᠡᠨ ᠦᠭ᠃ ᠨᠠᠭᠠᠰᠢ ᠪᠠᠨ ᠪᠢᠳᠡᠭᠡᠢ ᠬᠠᠨᠳᠣᠭᠤᠯ︕︾ ᠭᠡᠵᠦ ᠬᠤᠭᠤᠯᠠᠢ ᠪᠡᠨ ᠬᠠᠭᠠᠷᠠᠳᠠᠯᠠ ᠬᠠᠰᠭᠢᠷᠴᠠᠢ᠃
ᠱᠠᠭᠠᠵᠠᠭᠠᠢ ᠰᠣᠴᠢᠵᠦ᠄
︽ᠲᠠᠣᠯᠠᠢ ᠡᠭᠡᠴᠢ ᠮᠢᠨᠢ ᠶᠠᠭᠠᠬᠢᠴᠢᠬᠠᠪᠠ︖ ᠲᠠ ᠴᠢᠨᠢ ᠁︾ ᠭᠡᠵᠦ ᠦᠭᠦᠯᠡᠨ ᠨᠢᠳᠦ ᠴᠢᠷᠮᠠᠯ ᠦᠭᠡᠢ ᠬᠠᠷᠠᠬᠤ ᠳᠤ︽ᠪᠢ ᠢᠮᠠᠭᠠ ᠢᠢᠨ ᠪᠠᠭᠠᠰᠣ ᠰᠢᠭᠡᠰᠦ ᠲᠠᠢ ᠶᠠᠭᠤᠮᠠ ᠢᠢ ᠲᠠᠬᠢᠵᠣ ᠶᠠᠭ ᠢᠳᠡᠬᠦ ᠦᠭᠡᠢ︾ᠭᠡᠵᠦ ᠰᠢᠳᠦ ᠵᠠᠭᠤᠵᠣ ᠨᠢᠳᠤᠷᠭᠠ ᠵᠠᠡᠭᠬᠢᠳᠪᠠ᠃ ᠱᠠᠭᠠᠵᠠᠭᠠᠢ ᠣᠴᠢᠷ ᠣᠬᠠᠭᠠᠨ ᠢ ᠨᠢ ᠣᠯᠠᠮ ᠣᠯ ᠶᠠᠳᠠᠪᠠ᠃
︽ᠶᠠᠭᠠᠬᠢᠭᠠᠳ︖︾
︽ᠯᠣᠣᠪᠠᠩ ᠭᠡᠳᠡᠭ ᠴᠢᠨᠢ ᠁︾ ᠭᠡᠳ ᠲᠠᠣᠯᠠᠢ ᠱᠠᠭᠠᠵᠠᠭᠠᠢ ᠳᠤ ᠵᠢᠭ᠍ᠰᠢᠭ᠍ᠰᠡᠨ ᠦᠯᠢᠭᠡᠷ ᠢᠶᠠᠨ ᠶᠠᠷᠢᠭᠠᠳ︽ᠡᠶᠢᠮᠦ ᠶᠠᠭᠤᠮᠠ ᠢᠢ ᠣᠳᠤ ᠬᠡᠨ ᠢᠳᠡᠬᠦ ᠶᠣᠮ︖ ᠱᠠᠭᠠᠵᠠᠭᠠᠢ ᠴᠢ ᠴᠣ ᠭᠡᠰᠡᠨ ᠢᠳᠡᠬᠦ ᠦᠭᠡᠢ ᠰᠢᠣ︕︾ ᠭᠡᠪᠡ᠃
ᠱᠠᠭᠠᠵᠠᠭᠠᠢ ᠰᠣᠨᠣᠰᠣᠭᠰᠠᠭᠠᠷ ᠪᠠᠶᠢᠵᠦ ᠬᠠᠯ᠂ ᠬᠠᠯ ᠢᠨᠢᠶᠡᠭ᠍ᠰᠡᠭᠡᠷ ᠡᠯᠢᠭᠡ ᠨᠢ ᠬᠦᠰᠢᠭᠡᠳ ᠴᠠᠭᠠᠰᠢ ᠪᠠᠨ ᠣᠬᠢᠯᠠᠴᠢᠬᠠᠪᠠ᠃
ᠲᠠᠣᠯᠠᠢ᠄︽ᠨᠠᠶᠢᠵᠠ ᠮᠢᠨᠢ ᠴᠢ᠂ ᠡᠷᠡᠭᠡ ᠦᠭᠡᠢ ᠪᠢᠵᠡ︖︾
ᠣᠬᠢᠯᠠᠩᠬᠠᠢ ᠨᠢᠳᠦ ᠪᠠᠷ ᠦᠪᠡᠷ ᠢ ᠨᠢ ᠬᠠᠷᠠᠭᠰᠠᠨ ᠱᠠᠭᠠᠵᠠᠭᠠᠢ᠄
︽ᠴᠢ ᠮᠢᠨᠢ ᠬᠦᠭᠡᠷᠦᠬᠦᠢ ᠪᠠᠶᠢᠨᠠ᠂ ᠢᠮᠠᠭᠠ ᠢᠢᠨ ᠠᠷᠭᠠ ᠳᠤ ᠤᠨᠠᠴᠢᠬᠠᠭᠰᠠᠨ ᠪᠠᠶᠢᠨᠠ ᠰᠢᠣ︾ᠭᠡᠳ ᠨᠢᠯᠪᠣᠰᠣ ᠪᠠᠨ ᠠᠷᠴᠢᠬᠤ ᠳᠤ ᠲᠠᠣᠯᠠᠢ ᠴᠣ ᠪᠦᠯᠳᠡᠶᠢᠴᠢᠬᠡᠪᠡ᠃ ᠢᠮᠠᠭᠠ ᠢᠢᠨ ᠶᠠᠮᠠᠷ ᠮᠡᠭᠡ ᠳᠤ ᠦᠭ᠍ᠳᠡᠴᠢᠬᠡᠪᠡ︖ ᠱᠠᠭᠠᠵᠠᠭᠠᠢ ᠴᠣᠬᠢᠭᠰᠠᠨ ᠯᠣᠣᠪᠠᠩ ᠢᠶᠠᠨ ᠲᠡᠬᠦᠨ ᠠᠪᠴᠢᠷᠠᠭᠠᠳ ᠰᠢᠷᠡᠭᠡᠨ ᠳᠡᠭᠡᠷᠡ ᠨᠢ ᠲᠠᠯᠪᠢᠬᠤ ᠵᠠᠭᠤᠷᠠ᠄
︽ᠮᠦᠨ᠂ ᠮᠦᠨ᠂ ᠶᠠᠭ ᠲᠠᠭᠠᠷᠠᠵᠣ ᠪᠠᠶᠢᠨᠠ᠃ ᠲᠠᠷᠢᠶᠠ ᠪᠣᠳᠠᠭᠠ ᠲᠠᠷᠢᠬᠤ ᠳᠤ ᠮᠠᠯ ᠤᠨ ᠰᠢᠭᠡᠭ ᠪᠣᠷᠳᠣᠭᠤᠷ ᠣᠷᠣᠭᠤᠯᠬᠤ ᠨᠢ ᠲᠠᠭᠠᠷᠠᠨᠠ᠃ ᠴᠢᠨᠦ ᠪᠠᠭᠠᠰᠣ ᠰᠢᠭᠡᠰᠦ ᠴᠣ ᠭᠡᠰᠡᠨ ᠭᠠᠵᠠᠷ ᠲᠤ ᠣᠷᠤᠭᠠᠳ ᠰᠢᠮᠡ ᠲᠡᠵᠢᠭᠡᠯ ᠪᠣᠯᠣᠨᠠ᠃ ᠡᠶᠢᠮᠦ ᠣᠯᠠᠨ ᠠᠮᠢᠳᠠᠨ ᠵᠢᠬᠦᠷᠳᠡᠨ ᠤ ᠪᠠᠭᠠᠰᠣ ᠰᠢᠭᠡᠰᠦ ᠭᠠᠵᠠᠷ ᠤᠨ ᠰᠢᠮᠠ ᠪᠣᠯᠳᠠᠭ᠃ ᠡᠨᠡ ᠰᠢᠮᠡ ᠲᠡᠵᠢᠭᠡᠯ ᠵᠢᠡᠷ ᠡᠪᠡᠰᠣ ᠨᠣᠭᠤᠭᠠ ᠡᠯᠪᠡᠭ ᠣᠷᠭᠤᠨᠠ᠃ ᠬᠤᠷᠤᠬᠠᠢ ᠰᠢᠪᠡᠵᠢ᠂ ᠠᠮᠢᠳᠠᠨ ᠭᠤᠣᠯᠳᠠᠨ ᠲᠠᠩᠰᠤᠭ ᠪᠣᠯᠣᠨᠠ︾ ᠭᠡᠵᠦ ᠦᠬᠦᠯᠡᠬᠦ ᠳᠤ᠄
︽ᠮᠢᠨᠦ ᠪᠠᠭᠠᠰᠣ ᠰᠢᠭᠡᠰᠦ ᠪᠠᠷ ᠣᠷᠭᠤᠭᠰᠠᠨ ᠡᠪᠡᠰᠦ ᠨᠣᠭᠤᠭᠠ ᠢᠢ ᠢᠮᠠᠭᠠ ᠬᠦᠷᠳᠡᠯᠡ ᠢᠳᠡᠵᠦ ᠪᠠᠶᠢᠨᠠ ᠭᠡᠰᠡᠨ ᠦᠭᠡ ᠦᠦ︖︾ ᠭᠡᠵᠦ ᠲᠠᠣᠯᠠᠢ ᠰᠣᠨᠢᠷᠬᠠᠯᠠ᠄
︽ᠪᠢ ᠴᠢᠨᠦᠬᠢ ᠢᠢ ᠢᠳᠡᠵᠦ ᠪᠠᠶᠢᠬᠤ ᠳᠤ ᠴᠢ ᠴᠣ ᠭᠡᠰᠡᠨ ᠮᠢᠨᠦᠬᠢ ᠢᠢ ᠢᠳᠡᠵᠦ ᠪᠠᠶᠢᠭᠠ ᠰᠢᠣ ᠳ᠋ᠠ᠃ ᠪᠢᠳᠠ ᠪᠦᠬᠦᠨ ᠬᠤᠭᠤᠷᠤ ᠬᠤᠭᠤᠷᠤᠨᠳᠣ ᠪᠠᠨ ᠡᠶᠢᠮᠦ ᠬᠤᠯᠪᠣᠭᠠ ᠲᠠᠢ ᠰᠢᠣ︕︾ ᠭᠡᠪᠡ᠃
ᠲᠠᠣᠯᠠᠢ ᠮᠠᠩᠨᠠᠢ ᠪᠠᠨ ᠠᠯᠠᠭᠠᠳᠠᠨ ᠢᠨᠢᠶᠡᠵᠦ᠄
︽ᠢᠮᠠᠭᠠ ᠭᠤᠸᠠᠢ ᠯᠣᠣᠪᠠᠩ ᠣᠯᠵᠣ ᠢᠳᠡᠬᠦ ᠢᠢᠨ ᠲᠦᠯᠦᠭᠡ ᠨᠠᠮᠠ ᠵᠢ ᠬᠠᠭᠤᠷᠴᠢᠬᠠᠵᠠᠢ︕︾ ᠭᠡᠯᠡ᠃
(ᠬᠤᠨᠢᠴᠢᠨ ᠪᠠᠶᠠᠰᠬᠤᠯᠠᠩ)
