ᠦᠷ ᠴᠠᠢᠬᠤ ᠶᠢ ᠬᠦᠯᠢᠶᠡᠵᠦ ᠨᠣᠢᠷ ᠬᠤᠯᠵᠢᠪᠠ᠃ ᠵᠥᠪᠭᠡᠨ ᠡᠨᠡ ᠰᠥᠨᠢ ᠪᠢᠰᠢ᠂ ᠬᠦᠯᠢᠶᠡᠭ᠍ᠰᠡᠨ ᠶᠠᠭᠤᠮᠠ ᠤᠳᠠᠭᠠᠨ ᠬᠥᠭᠡᠭᠡᠭ᠍ᠰᠡᠨ ᠶᠠᠭᠤᠮᠠ ᠬᠣᠯᠠ ᠭᠡᠳᠡᠭ᠍ᠴᠢᠯᠡᠨ 《ᠨᠣᠮᠢᠨ ᠴᠡᠴᠡᠭ᠍ᠯᠡᠯ ᠤᠨ ᠠᠯᠲᠠᠨ ᠬᠠᠭᠤᠳᠠᠰᠤ ᠮᠠᠯᠵᠢᠬᠤ ᠳ᠋ᠠᠵᠠᠢ ᠶᠢᠨ ᠰᠢᠨᠡ ᠲᠡᠮᠡᠦᠯᠦᠯ》 ᠭᠡᠬᠦ ᠪᠦᠷᠢᠳᠦ ᠭᠠᠴᠠᠭᠠ ᠶᠢᠨ ᠨᠠᠭᠠᠳᠤᠮ ᠤᠨ ᠬᠤᠷᠠᠯ ᠤᠨ ᠤᠷᠢᠯᠭᠠ ᠶᠢ ᠣᠯᠣᠭᠰᠠᠨ ᠡᠴᠡ ᠬᠣᠢᠰᠢ ᠶᠡᠷᠦ ᠯᠠ ᠨᠣᠢᠷ ᠬᠤᠯᠵᠢᠬᠤ ᠪᠣᠯᠵᠤ᠂ ᠡᠳᠦᠷ ᠰᠠᠷᠠ ᠥᠩᠭᠡᠷᠡᠬᠦ ᠨᠢ ᠤᠳᠠᠭᠠᠰᠢᠷᠠᠭᠰᠠᠨ ᠰᠢᠭ᠋ ᠪᠣᠯᠤᠭᠰᠠᠨ ᠢ ᠬᠡᠯᠡᠬᠦ ᠶᠠᠭᠤᠨ᠃
ᠨᠠᠷᠠ ᠬᠤᠷᠠ ᠲᠡᠩᠴᠡᠵᠦ᠂ ᠨᠠᠪᠴᠢ ᠴᠡᠴᠡᠭ ᠳᠡᠯᠭᠡᠷᠡᠵᠦ᠂ ᠨᠠᠢᠢᠷ ᠨᠠᠭᠠᠳᠤᠮ ᠪᠣᠯᠤᠭᠰᠠᠨ ᠨᠠᠢ᠍ᠮᠠᠨ ᠰᠠᠷᠠ ᠶᠢᠨ ᠨᠠᠢ᠍ᠮᠠᠨ ᠤ ᠨᠠᠮᠤᠷ ᠴᠠᠭ ᠤᠨ ᠲᠡᠷᠡ ᠥᠷᠯᠥᠭᠡ᠃ ᠦᠷ ᠤᠨ ᠬᠢᠷᠠᠭᠠ ᠪᠠᠷ ᠡᠪᠦᠭᠡᠨ ᠡᠮᠡᠭᠡᠨ ᠪᠢᠳᠠ ᠬᠣᠶᠠᠭᠤᠯᠠ ᠶᠠᠭᠠᠷᠠᠪᠴᠢᠯᠠᠨ ᠪᠣᠰᠴᠤ᠂ ᠴᠠᠢ ᠴᠦᠢ ᠪᠠᠨ ᠬᠠᠯᠲᠤ ᠮᠥᠯᠲᠥ ᠤᠤᠭᠤᠮᠠᠭᠴᠠ ᠡᠮᠦᠰᠴᠦ ᠵᠡᠭᠦᠵᠦ ᠶᠠᠩᠵᠤᠯᠠᠴᠢᠬᠠᠭᠠᠳ ᠥᠯᠥᠭᠡᠢ ᠨᠤᠲᠤᠭ ᠪᠦᠷᠢᠳᠦ ᠶᠢᠨ ᠨᠠᠭᠠᠳᠤᠮ ᠳᠤ ᠣᠷᠤᠯᠴᠠᠬᠤ ᠪᠠᠷ ᠵᠠᠮ ᠢᠶᠠᠨ ᠡᠯᠭᠦᠵᠦ ᠪᠢᠯᠡ᠃
ᠮᠢᠨᠤ ᠭᠡᠷᠭᠡᠢ ᠪᠠ᠊·ᠴᠠᠭᠠᠨᠬᠡᠦᠬᠡᠨ ᠳᠠᠯᠠ ᠶᠢᠨ ᠳᠠᠪᠠᠭᠠ ᠶᠢ ᠳᠠᠪᠠᠭᠰᠠᠨ ᠪᠤᠯᠪᠠᠴᠤ ᠡ᠊ᠩ ᠤᠨ ᠦᠶᠡ ᠳᠤ ᠵᠠᠯᠠᠭᠤ ᠬᠥᠮᠥᠨ ᠡᠴᠡ ᠰᠠᠭᠤᠭᠳᠠᠬᠤ ᠦᠭᠡᠢ ᠮᠠᠰᠢᠨ ᠪᠠᠷᠢᠵᠤ ᠳᠠᠪᠬᠢᠭᠤᠯᠳᠠᠭ ᠬᠥᠮᠥᠨ ᠪᠠᠢᠲᠠᠯᠠ ᠥᠨᠥᠳᠥᠷ ᠬᠠᠷᠢᠨ ᠨᠠᠳᠠᠳᠤ ᠲᠤᠩ ᠤᠳᠠᠭᠠᠨ ᠰᠠᠨᠠᠭᠳᠠᠪᠠ᠃ ᠪᠢ ᠲᠡᠷᠭᠡᠨ ᠤ ᠬᠤᠷᠳᠤᠴᠠ ᠶᠢᠨ ᠢᠯᠡᠳᠬᠡᠮᠵᠢ ᠶᠢ ᠥᠨᠳᠡᠢᠨ ᠦᠵᠡᠭ᠍ᠰᠡᠨ ᠳᠤ ᠡ᠊ᠩ ᠤᠨ ᠬᠤᠷᠳᠤᠴᠠ ᠡᠴᠡ ᠴᠤ ᠬᠤᠷᠳᠤᠨ ᠭᠠᠷᠲᠠᠯᠠ ᠳᠠᠪᠬᠢᠵᠤ ᠪᠠᠢᠪᠠ᠃ ᠭᠡᠲᠡᠯᠡ ᠬᠥᠭ᠍ᠰᠡᠵᠦ ᠬᠥᠭᠡᠷᠦᠭ᠍ᠰᠡᠨ ᠨᠠᠳᠠᠳᠤ ᠮᠥᠨ ᠯᠠ ᠦᠬᠡᠷ ᠬᠠᠰᠠᠭ ᠰᠢᠭ᠋ ᠤᠳᠠᠭᠠᠨ ᠰᠠᠨᠠᠭᠳᠠᠬᠤ ᠠᠵᠢ᠃
ᠵᠠᠮ ᠡᠴᠡ ᠪᠠᠭᠤᠬᠤ ᠳᠤ ᠰᠢᠯ ᠪᠣᠯᠣᠷ ᠰᠢᠭ᠋ ᠭᠥᠯᠢᠭᠡᠷ ᠲᠣᠰᠣᠨ ᠵᠠᠮ ᠡᠮᠦᠨᠡ ᠮᠢᠨᠢ ᠰᠤᠨᠤᠯᠵᠠᠨᠠ᠃ ᠬᠡᠳᠦᠢ ᠳ᠋ᠤᠨᠢ ᠡᠢᠮᠦ ᠲᠡᠷᠳᠠᠡᠭ ᠰᠠᠷᠠᠭᠤᠯ ᠵᠠᠮ ᠵᠠᠰᠠᠴᠢᠬᠠᠭᠰᠠᠨ ᠪᠤᠢ︖ ᠲᠥᠷᠥᠭ᠍ᠰᠡᠨ ᠨᠤᠲᠤᠭ ᠲᠠᠭᠠᠨ ᠢᠷᠡᠭᠡᠳ ᠲᠥᠭᠡᠷᠢᠴᠢᠬᠡᠭ᠍ᠰᠡᠨ ᠴᠤ ᠶᠤᠮ ᠤᠤ ︖ ᠭᠡᠵᠦ ᠪᠢ ᠭᠠᠢᠬᠠᠰᠢ ᠠᠯᠳᠠᠵᠤ᠂ ᠡᠭ ᠵᠣᠭ ᠭᠡᠰᠡᠨ ᠳᠤ ᠵᠠᠮᠴᠢᠯᠠᠭᠤᠷ ᠬᠠᠷᠢᠨ《ᠳᠠᠭᠠᠷᠠᠨᠠ! ᠤᠷᠤᠭᠰᠢᠯᠠ!》 ᠭᠡᠵᠦ ᠯᠠ ᠪᠠᠢᠪᠠ᠃ ᠲᠥᠷᠥ ᠭᠦᠷᠦᠨ ᠤ ᠬᠠᠢᠷᠠ ᠪᠠᠷ ᠲᠦᠮᠡᠨ ᠣᠯᠠᠨ ᠤ ᠬᠦᠴᠦ ᠪᠠᠷ ᠰᠢᠨᠡᠬᠡᠨ ᠵᠠᠰᠠᠭᠰᠠᠨ ᠵᠠᠮ ᠪᠠᠢᠭᠰᠠᠨ ᠶᠤᠮ ᠠᠵᠢ᠃
ᠵᠠᠮ ᠤᠨ ᠬᠣᠶᠠᠷ ᠲᠠᠯᠠ ᠪᠠᠷ ᠬᠥᠮᠥᠨ ᠤ ᠬᠦᠴᠦ ᠪᠠᠷ ᠳᠠᠷᠢᠭ᠌ᠰᠠᠨ ᠮᠣᠳᠣ ᠪᠤᠷᠭᠠᠰᠤ ᠮᠥᠷ ᠮᠥᠷ ᠢᠶᠠᠷ ᠵᠢᠭ᠍ᠳᠡᠷᠡᠵᠦ᠂ ᠲᠣᠭᠣᠰ ᠰᠢᠪᠠᠭᠤ ᠰᠢᠭ᠋ ᠰᠤᠨᠤᠨ ᠭᠤᠷᠭᠤᠤᠯ ᠮᠥᠴᠢᠷ ᠳᠠᠮᠵᠢᠨ ᠳᠣᠩᠭᠣᠳᠤᠨᠠ᠃ ᠪᠥᠬᠥᠩ ᠲᠠᠤᠯᠠᠢ ᠡᠴᠡ ᠡᠬᠢᠯᠡᠨ ᠨᠡᠷᠡ ᠮᠢᠨᠳᠠᠭ ᠢ ᠨᠢ ᠴᠤ ᠥᠯᠥ ᠮᠡᠳᠡᠬᠦ ᠠᠮᠢᠳᠠᠨ ᠵᠢᠭᠦᠷᠲᠡᠨ ᠨᠦ᠋ᠭᠦᠳ ᠵᠠᠮ ᠣᠭᠲᠣᠯᠣᠨ ᠭᠦᠶᠦᠯᠳᠦᠨᠡ᠃ ᠲᠡᠭᠦᠨ ᠡᠴᠡ ᠴᠢᠨᠠᠭᠰᠢᠯᠠᠨ ᠲᠡᠮᠦᠷ ᠤᠲᠠᠰᠤ ᠪᠠᠷ ᠵᠠᠭᠠᠭᠯᠠᠭᠰᠠᠨ ᠪᠦᠯᠦᠭ ᠪᠦᠯᠦᠭ ᠡᠪᠡᠰᠦᠨ ᠬᠦᠷᠢᠶᠡᠨ ᠳᠤ ᠦᠬᠡᠷ ᠬᠣᠨᠢᠳ ᠠᠯᠠᠭ᠌ᠰᠢᠨ ᠪᠡᠯᠴᠢᠨᠡ᠃
ᠪᠦᠷᠢᠳᠦ ᠭᠠᠴᠠᠭᠠᠨ ᠤ ᠲᠥᠪ ᠨᠢ 《ᠪᠦᠷᠢᠳᠦ ᠶᠢᠨ ᠣᠷᠣᠢ》 ᠭᠡᠰᠡᠨ ᠭᠠᠵᠠᠷ ᠲᠤ ᠪᠠᠢᠷᠢᠰᠢᠳᠠᠭ᠃ ᠥᠩᠭᠡᠷᠡᠭ᠍ᠰᠡᠨ ᠳᠤ ᠲᠡᠨᠳᠡ ᠬᠡᠳᠦᠨ ᠠᠷᠠᠮᠠᠭ ᠲᠠᠷᠠᠮᠠᠭ ᠰᠢᠷᠠ ᠰᠢᠪᠠᠭ ᠲᠠᠢ ᠰᠢᠷᠭᠠᠯ ᠥᠨᠳᠥᠷ ᠮᠠᠩᠬᠠᠨ ᠣᠷᠣᠢ ᠪᠠᠢᠭᠰᠠᠨ ᠡᠴᠡ 《ᠪᠦᠷᠢᠳᠦ ᠶᠢᠨ ᠣᠷᠣᠢ》 ᠭᠡᠵᠦ ᠨᠡᠷᠡᠯᠡᠭ᠍ᠰᠡᠨ ᠭᠡᠳᠡᠭ᠃ ᠬᠠᠭᠤᠴᠢᠨ ᠳᠤ ᠲᠡᠷᠡ ᠣᠷᠣᠢ ᠶᠢᠨ ᠡ᠊ᠩᠭᠡᠷ ᠲᠤ《ᠪᠦᠷᠢᠳᠦ ᠶᠢᠨ ᠰᠦᠮᠡ》 ᠬᠡᠮᠡᠬᠦ ᠰᠦᠮᠡ ᠪᠠᠢᠵᠠᠢ᠃ ᠴᠢᠯᠦᠭᠡᠯᠡᠭ᠍ᠳᠡᠭ᠍ᠰᠡᠨ ᠤ ᠳᠠᠷᠠᠭᠠ ᠲᠡᠷᠡ ᠰᠦᠮᠡ ᠶᠢᠨ ᠰᠠᠭᠤᠷᠢᠨ ᠳᠡᠭᠡᠷᠡ ᠪᠦᠷᠢᠳᠦ ᠭᠠᠴᠠᠭᠠᠨ ᠤ ᠲᠥᠪ ᠢ ᠪᠠᠢᠭᠤᠯᠤᠭᠰᠠᠨ ᠶᠤᠮ᠃ ᠲᠠᠪᠢᠨ ᠵᠢᠯ ᠤᠨ ᠡᠮᠦᠨᠡ ᠪᠢ ᠪᠦᠷᠢᠳᠦ ᠶᠢᠨ ᠠᠷᠠᠳ ᠡᠴᠡ ᠡᠷᠭᠢᠯᠡᠭ᠍ᠰᠡᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠳᠤ ᠪᠠᠭᠰᠢᠯᠠᠵᠤ ᠪᠠᠢᠬᠤ ᠳᠤ ᠠᠯᠳᠠᠷᠲᠤ ᠵᠣᠬᠢᠶᠠᠯᠴᠢ ᠮᠠᠯᠴᠢᠨᠬᠦᠦ᠂ ᠴᠣᠭᠲᠤᠨᠠᠷᠠᠨ ᠨᠠᠷ ᠢᠷᠠᠵᠤ ᠲᠡᠷᠡ ᠣᠷᠣᠢ ᠳᠤ ᠭᠠᠷᠴᠤ᠂ ᠪᠦᠷᠢᠳᠦ ᠶᠢᠨ ᠣᠷᠣᠢ ᠡᠴᠡ ᠬᠣᠢᠰᠢ ᠪᠠᠷᠠᠭᠤᠨᠰᠢ ᠵᠠᠯᠭᠠᠯᠳᠤᠭᠰᠠᠨ ᠥᠨᠳᠥᠷ ᠴᠢᠯᠢᠩ ᠮᠠᠩᠬᠠᠳ ᠢ ᠳᠤᠷᠠᠨ ᠢᠶᠠᠷ ᠪᠠᠷᠠᠯᠠᠭᠠᠳ᠂ 《ᠡᠳᠦᠢᠬᠡᠨ ᠬᠥᠮᠥᠨ ᠠᠮᠠ ᠲᠠᠢ ᠪᠠᠷᠢᠭᠠᠳᠠ ᠡᠨᠡ ᠶᠡᠬᠡ ᠡᠯᠡᠰᠦ ᠮᠠᠩᠬᠠ ᠶᠢ ᠬᠡᠵᠢᠶᠡ ᠪᠦᠷ ᠨᠣᠭᠣᠭᠠᠷᠠᠭᠤᠯᠵᠤ ᠳᠡᠢᠯᠳᠡᠭ ᠶᠤᠮ ᠪᠣᠯ︖》 ᠭᠡᠵᠦ ᠰᠠᠨᠠᠭᠠᠰᠢᠷᠠᠨ ᠬᠡᠯᠡᠯᠴᠡᠵᠦ ᠪᠠᠢᠭᠰᠠᠨ ᠶᠤᠮ᠃
ᠲᠤᠬᠠᠢ ᠶᠢᠨ ᠦᠶᠡ ᠳᠤ ᠪᠢ ᠡᠨᠡ ᠦᠭᠡ ᠶᠢ ᠨᠢ ᠳᠡᠮᠡᠢ ᠲᠣᠭᠣᠵᠤ ᠪᠠᠢᠭᠰᠠᠨ ᠦᠭᠡᠢ᠂ ᠮᠠᠨ ᠤ ᠪᠦᠷᠢᠳᠦ ᠶᠢᠨ ᠥᠷᠭᠡᠨ ᠣᠯᠠᠨ ᠮᠠᠯᠴᠢᠨ ᠲᠦᠮᠡᠨ ᠲᠠᠪᠢᠭᠠᠳ ᠣᠨ ᠡᠴᠡ ᠡᠬᠢᠯᠡᠵᠦ᠂ ᠲᠡᠰᠪᠦᠷᠢ ᠬᠠᠲᠠᠭᠤᠵᠢᠯᠲᠠᠢ ᠲᠡᠮᠡᠴᠡᠵᠦ ᠡᠯᠡᠰᠦ ᠮᠠᠩᠬᠠ ᠶᠢ ᠥᠭᠡᠷᠡᠴᠢᠯᠡᠵᠦ ᠢᠷᠡᠭ᠍ᠰᠡᠨ ᠲᠡᠦᠬᠡ ᠪᠠᠨ ᠡᠷᠭᠢᠴᠡᠭᠦᠯᠦᠨ ᠪᠤᠳᠣᠵᠤ᠂ ᠯᠠᠪᠲᠠᠢ ᠨᠢᠭᠡᠨ ᠡᠳᠦᠷ ᠨᠡᠯᠦᠭᠡᠷ ᠶᠡᠬᠡ ᠡᠯᠡᠰᠦ ᠪᠠᠨ ᠥᠪᠴᠢ ᠨᠣᠭᠣᠭᠠᠨ ᠪᠤᠯᠭᠠᠵᠤ ᠴᠢᠳᠠᠨᠠ ᠭᠡᠳᠡᠭ ᠲᠤ ᠢᠲᠡᠭᠡᠯ ᠳᠦᠭᠦᠷᠡᠩ ᠪᠠᠢᠵᠤ᠂ ᠮᠥᠨ ᠲᠡᠷᠡ ᠵᠢᠯ 《ᠨᠣᠮᠢᠨ ᠪᠦᠷᠢᠳᠦ ᠶᠢᠨ ᠳᠠᠪᠠᠯᠭᠠᠨ》ᠭᠡᠬᠦ ᠰᠢᠯᠦᠭ ᠪᠢᠴᠢᠵᠦ᠂ 《ᠦᠦᠰᠢᠨᠵᠤᠤ ᠶᠢᠨ ᠥᠩᠭᠡ ᠦᠵᠡᠮᠵᠢ》 ᠬᠡᠮᠡᠬᠦ ᠨᠣᠮ ᠳᠤ ᠨᠡᠢᠲᠡᠯᠡᠭᠦᠯᠦᠭ᠍ᠰᠡᠨ ᠶᠤᠮ᠃
ᠡᠳᠡᠭᠡᠷ ᠶᠠᠪᠤᠳᠠᠯ ᠤᠳ ᠮᠢᠨᠤ ᠲᠠᠷᠢᠬᠢᠨ ᠳᠤ ᠵᠡᠭᠦᠳᠦ ᠵᠡᠷᠭᠡᠯᠭᠡᠨ ᠰᠢᠭ ᠬᠠᠷᠪᠤᠨ ᠥᠩᠭᠡᠷᠡᠬᠦ ᠲᠠᠢ ᠵᠡᠷᠭᠡ ᠨᠢᠭᠡᠨᠲᠡ ᠪᠦᠷᠢᠳᠦ ᠶᠢᠨ ᠣᠷᠣᠢ ᠳᠤ ᠣᠢᠷᠠᠲᠤᠨ ᠢᠷᠡᠭ᠍ᠰᠡᠨ ᠪᠠᠢᠯᠠ᠃
ᠡᠪᠦᠭᠡᠨ ᠪᠤᠭᠤᠷᠤᠯ ᠪᠦᠷᠢᠳᠦ ᠶᠢᠨ ᠣᠷᠣᠢ ᠥᠩᠭᠡ ᠵᠢᠰᠦ ᠨᠢ ᠬᠤᠪᠢᠷᠠᠭᠠᠳ᠂ ᠡᠪᠦᠯ ᠵᠤᠨ ᠦᠭᠡᠢ ᠬᠥᠬᠡᠷᠡᠳᠡᠭ ᠬᠢᠩᠭᠠᠨ ᠳᠠᠪᠠᠭᠠ ᠰᠢᠭ᠋ ᠥᠪᠴᠢ ᠨᠣᠭᠣᠭᠠᠨ ᠢᠶᠠᠷ ᠬᠤᠪᠴᠠᠯᠠᠴᠢᠬᠠᠭᠠᠳ ᠰᠡᠬᠦᠢᠨ ᠵᠣᠭᠰᠣᠨᠠ᠃ ᠲᠡᠭᠦᠨ ᠤ ᠡ᠊ᠩᠭᠡᠷ ᠢᠶᠠᠷ ᠳᠦᠭᠦᠷᠡᠩ ᠭᠠᠩᠭᠠᠩ ᠬᠡᠭᠡᠨᠴᠢᠷ ᠮᠠᠰᠢᠨ ᠲᠡᠷᠭᠡ᠂ ᠭᠠᠵᠠᠷ ᠳᠡᠯᠡᠬᠡᠢ ᠳᠠᠭᠠᠭᠠ ᠠᠯᠳᠠᠮᠠᠷ ᠬᠡᠢ ᠵᠠᠢ ᠦᠭᠡᠢ ᠡ᠊ᠩᠨᠡᠷᠡᠨ ᠵᠢᠭ᠌ᠰᠠᠨᠠ᠃
ᠪᠢᠳᠠ ᠬᠣᠶᠠᠭᠤᠯᠠ ᠪᠠᠬᠠᠨ ᠤᠷᠤᠭᠰᠢᠯᠠᠨ ᠶᠠᠪᠤᠵᠤ ᠭᠠᠴᠠᠭᠠᠨ ᠤ ᠲᠥᠪ ᠣᠷᠴᠢᠮ ᠣᠢᠷᠠᠲᠤᠵᠤ ᠢᠷᠠᠨ᠂ ᠳᠥᠩᠭᠡᠵᠦ ᠨᠢᠭᠡᠨ ᠵᠠᠢ ᠵᠠᠪᠰᠠᠷ ᠣᠯᠵᠤ ᠲᠡᠷᠭᠡ ᠪᠠᠨ ᠵᠣᠭᠰᠣᠭᠠᠵᠤ᠂ ᠪᠠᠭᠤᠵᠤ ᠢᠷᠡᠭᠡᠳ ᠬᠦᠷᠢᠶᠡᠨ ᠤ ᠵᠡᠭᠦᠨ ᠲᠠᠯᠠ ᠳᠠᠬᠢ ᠠᠭᠤᠳᠠᠮ ᠲᠠᠯᠠᠪᠠᠢ ᠳᠤ ᠬᠦᠷᠬᠦ ᠳᠤ ᠲᠠᠯᠠ ᠨᠤᠲᠤᠭ ᠤᠨ ᠰᠣᠷᠭᠣᠭ ᠴᠡᠴᠡᠭ ᠰᠢᠭ ᠨᠢᠳᠦ ᠡᠷᠢᠶᠡᠯᠵᠡᠮᠡ ᠥᠩᠭᠡ ᠶᠢᠨ ᠬᠤᠪᠴᠠᠰᠤ ᠲᠠᠢ ᠬᠥᠮᠥᠰ ᠠᠭᠤᠳᠠᠮ ᠲᠠᠯᠠᠪᠠᠢ ᠳᠤ ᠪᠠᠭᠲᠠ ᠠᠯᠳᠠᠮᠠ ᠨᠠᠭᠠᠰᠢ ᠴᠠᠭᠠᠰᠢ ᠵᠥᠷᠢᠯᠳᠦᠨᠡ᠃
ᠲᠡᠭᠦᠨ ᠤ ᠳᠤᠮᠳᠠ ᠡᠴᠡ ᠠᠯᠳᠠ ᠬᠠᠳᠠᠭ ᠳᠡᠯᠭᠡᠨ᠂ ᠨᠢᠭᠤᠷ ᠢ ᠨᠢ ᠲᠠᠨᠢᠮᠠᠷ ᠬᠥᠪᠡᠭᠦᠳ ᠥᠬᠢᠳ ᠢᠷᠠᠵᠤ᠂ ᠬᠥᠬᠦᠦᠷ ᠲᠠᠮᠠᠬᠢᠯᠠᠨ ᠠᠮᠤᠷ ᠮᠡᠨᠳᠦ ᠰᠣᠯᠢᠯᠴᠠᠵᠤ᠂ ᠴᠠᠭᠠᠨᠲᠠᠢ ᠠᠮᠰᠠᠭᠤᠯᠤᠨ ᠪᠢᠳᠠᠨ ᠢ ᠤᠭᠲᠤᠨ ᠠᠪᠴᠤ ᠥᠷᠯᠥᠭᠡ ᠶᠢᠨ ᠴᠠᠢᠯᠠᠯᠭᠠ ᠶᠢᠨ ᠭᠡᠷ ᠲᠤ ᠣᠷᠣᠭᠤᠯᠪᠠ᠃
ᠭᠠᠴᠠᠭᠠᠨ ᠤ ᠴᠠᠢᠯᠠᠯᠭᠠ ᠶᠢᠨ ᠭᠡᠷ ᠲᠤ ᠮᠠᠯᠵᠢᠯ ᠤᠨ ᠬᠣᠷᠰᠢᠶᠠ ᠪᠠᠷ ᠨᠢᠭᠡᠴᠡᠯᠡᠨ᠂ ᠰᠢᠷᠡᠭᠡ ᠪᠦᠷᠢ ᠳᠤ ᠲᠣᠬᠢᠷᠠᠭᠤᠯᠤᠯᠲᠠ ᠲᠠᠢ ᠪᠠᠢᠯᠠ᠃ ᠪᠢᠳᠠ ᠬᠣᠶᠠᠭᠤᠯᠠ 《ᠪᠠᠭᠠᠴᠠᠢᠢᠳᠠᠮ》 ᠭᠡᠬᠦ ᠪᠢᠴᠢᠭᠡᠰᠦ ᠲᠠᠢ ᠰᠢᠷᠡᠭᠡᠨ ᠳ᠋ᠤᠨᠢ ᠬᠦᠷᠴᠦ ᠤᠳᠠᠭᠠᠨ ᠡᠳᠦᠷ ᠵᠤᠵᠠᠭᠠᠨ ᠬᠣᠨᠣᠭ ᠠᠭᠤᠯᠵᠠᠭᠰᠠᠨ ᠦᠭᠡᠢ ᠨᠠᠢᠢᠵᠠ ᠨᠥᠬᠥᠳ ᠲᠥᠷᠥᠯ ᠰᠠᠳᠤᠨ ᠲᠠᠢ ᠪᠠᠨ ᠠᠮᠤᠷ ᠮᠡᠨᠳᠦ ᠰᠣᠯᠢᠯᠴᠠᠨ ᠬᠠᠮᠲᠤ ᠪᠠᠷ ᠴᠠᠢᠯᠠᠪᠠ᠃
ᠴᠠᠢᠯᠠᠯᠭᠠ ᠶᠢᠨ ᠰᠢᠷᠡᠭᠡᠨ ᠳᠤ ᠲᠤᠰ ᠨᠤᠲᠤᠭ ᠤᠨ ᠬᠣᠨᠢᠨ ᠮᠢᠬᠠ᠂ ᠮᠠᠯᠴᠢᠳ ᠤᠨ ᠥᠪᠡᠷ ᠢᠶᠠᠨ ᠬᠢᠭ᠍ᠰᠡᠨ ᠴᠥᠷᠮᠡ ᠲᠣᠰᠣ᠂ ᠠᠢᠷᠠᠭ ᠲᠠᠷᠠᠭ ᠵᠡᠷᠭᠡ ᠶᠢ ᠰᠢᠷᠡᠭᠡ ᠳᠦᠭᠦᠷᠡᠩ ᠦᠷᠦᠭ᠍ᠰᠡᠨ ᠪᠠᠢᠪᠠ᠃
ᠴᠠᠢᠯᠠᠯᠭᠠ ᠪᠠᠷᠠᠮᠠᠭᠴᠠ ᠳᠠᠶᠠᠭᠠᠷ ᠢᠶᠠᠨ ᠶᠡᠬᠡ ᠬᠤᠷᠠᠯ ᠤᠨ ᠠᠭᠤᠳᠠᠮ ᠲᠠᠯᠠᠪᠠᠢ ᠵᠦᠭ ᠶᠠᠪᠤᠵᠠᠭᠠᠪᠠ᠃ ᠴᠠᠭᠠᠨ ᠰᠠᠷᠠ ᠶᠢᠨ ᠲᠥᠷᠥᠯ ᠤᠨ ᠴᠠᠢᠯᠠᠯᠭᠠ ᠳᠤ ᠢᠷᠠᠵᠤ ᠳᠡᠢᠯᠳᠡᠭ ᠦᠭᠡᠢ ᠶᠡᠷᠡ ᠶᠢᠨ ᠳᠠᠪᠠᠭᠠ ᠶ᠋ᠢ ᠳᠥᠬᠥᠭ᠍ᠰᠡᠨ ᠰᠡᠴᠡᠩᠬᠤᠸᠠᠷ ᠡᠭᠡᠴᠢ ᠴᠤ ᠲᠠᠶᠠᠭ ᠲᠤᠯᠤᠨ ᠣᠯᠠᠨ ᠤ ᠳᠤᠮᠳᠠ ᠮᠠᠢᠵᠢᠭᠢ ᠠᠯᠬᠤᠯᠠᠨᠠ᠃ ᠤᠷᠳᠤ ᠡᠳᠦᠷ ᠨᠢ ᠡᠮᠨᠡᠯᠭᠡ ᠶᠢᠨ ᠬᠣᠷᠢᠶᠠᠨ ᠡᠴᠡ ᠳᠥᠩᠭᠡᠵᠦ ᠭᠠᠷᠤᠭᠰᠠᠨ ᠨᠠᠶᠠᠨ ᠬᠡᠳᠦᠲᠡᠢ ᠪᠤᠯᠠᠭ ᠠᠬᠠ ᠴᠤ ᠪᠢᠳᠠᠨ ᠡᠴᠡ ᠤᠷᠢᠳᠴᠢᠯᠠᠨ ᠭᠢᠶᠠ ᠪᠠᠭ᠌ᠰᠢ ᠲᠣᠭᠣᠷᠢᠭ ᠡᠴᠡ ᠢᠷᠡᠭᠡᠳ ᠣᠯᠠᠨ ᠤ ᠳᠤᠮᠳᠠ ᠶᠠᠪᠤᠵᠤ ᠪᠠᠢᠪᠠ᠃ ᠡᠪᠡᠳᠴᠢᠨ ᠬᠡᠨᠡᠭᠡ ᠲᠠᠢ ᠬᠥᠭ᠍ᠰᠢᠨ ᠪᠤᠭᠤᠷᠤᠯᠴᠤᠳ ᠴᠤ ᠥᠩᠭᠡᠲᠦ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ ᠬᠦᠷᠳᠦᠲᠦ ᠰᠠᠨᠳᠠᠯᠢ ᠳᠡᠭᠡᠷᠡ ᠰᠠᠭᠤᠴᠢᠬᠠᠭᠰᠠᠨ ᠪᠠᠶᠠᠷ ᠭᠦᠷ ᠲᠠᠢ ᠶᠠᠪᠤᠵᠠᠭᠠᠨᠠ᠃ ᠡᠯᠡ ᠭᠠᠵᠠᠷ ᠡᠴᠡ ᠢᠷᠡᠭ᠍ᠰᠡᠨ ᠦᠵᠡᠭ᠍ᠴᠢᠳ ᠪᠦᠷᠢᠳᠦ ᠶᠢᠨ ᠣᠷᠣᠢ ᠶᠢ ᠲᠡᠭ᠍ᠰᠢᠯᠡᠮᠡᠷ ᠤᠯᠠᠨ ᠴᠤᠭᠯᠠᠷᠠᠭᠰᠠᠨ ᠪᠠᠢᠯᠠ᠃
ᠵᠠᠷᠢᠮ ᠨᠢᠭᠡ ᠨᠢ ᠭᠡᠷ ᠡᠭᠦᠳᠡᠨ ᠡᠴᠡ ᠪᠠᠨ ᠳᠡᠮᠡᠢ ᠭᠠᠷᠳᠠᠭ ᠦᠭᠡᠢ ᠪᠤᠯᠣᠯᠲᠠᠢ᠃
《ᠠᠱ! ᠴᠢ ᠪᠢᠳᠠᠨ ᠠᠢᠯ ᠰᠠᠭᠠᠬᠠᠯᠲᠠ ᠪᠠᠢᠭᠠᠳ ᠲᠣᠰ ᠲᠣᠰ ᠤᠨ ᠢᠶᠠᠨ ᠠᠵᠢᠯ ᠠᠮᠢᠳᠤᠷᠠᠯ ᠳᠠᠭᠠᠨ ᠮᠤᠩᠭᠠᠨᠢᠭᠠᠳ ᠣᠢᠷᠠ ᠳᠤ ᠶᠡᠷᠦ ᠠᠭᠤᠯᠵᠠᠭᠰᠠᠨ ᠰᠠᠨᠠᠭᠠᠨ ᠳᠤ ᠦᠭᠡᠢ᠃ ᠡᠨᠡ ᠰᠠᠢᠬᠠᠨ ᠨᠠᠭᠠᠳᠤᠮ ᠤᠨ ᠬᠤᠷᠠᠯ ᠬᠠᠷᠢᠨ ᠪᠢᠳᠠᠨ ᠤ ᠮᠠᠷᠲᠠᠭᠰᠠᠨ ᠢ ᠰᠠᠨᠠᠭᠠᠨ ᠳᠤ ᠣᠷᠣᠭᠤᠯᠤᠯᠠ ᠰᠢᠦ!》ᠭᠡᠵᠦ ᠰᠠᠷᠠ ᠵᠢᠯ ᠢᠶᠠᠷ ᠠᠭᠤᠯᠵᠠᠭᠰᠠᠨ ᠦᠭᠡᠢ ᠶᠤᠮ ᠰᠢᠭ᠋ ᠬᠠᠯᠠᠭᠤᠨ ᠳᠣᠲᠣᠨᠣ ᠭᠡᠭ᠍ᠴᠢ ᠨᠢ ᠠᠷᠭᠠ ᠦᠭᠡᠢ᠂ ᠮᠥᠷᠥ ᠳᠠᠯᠤ ᠪᠠᠨ ᠲᠠᠪᠰᠢᠯᠴᠠᠨ ᠬᠥᠭᠡᠷᠦᠯᠳᠦᠨ ᠨᠠᠷᠭᠢᠵᠠᠭᠠᠨᠠ᠃
ᠶᠡᠬᠡ ᠬᠤᠷᠠᠯ ᠡᠬᠢᠯᠡᠬᠦ ᠡᠴᠡ ᠡᠮᠦᠨᠡᠬᠡᠨ ᠠᠭᠤᠳᠠᠮ ᠲᠠᠯᠠᠪᠠᠢ ᠶᠢᠨ ᠲᠡᠭ ᠳᠤᠮᠳᠠᠭᠤᠷ ᠨᠠᠢ᠍ᠮᠠᠨ ᠰᠠᠷᠠ ᠶᠢᠨ ᠨᠠᠪᠴᠢ ᠴᠡᠴᠡᠭ ᠰᠢᠭ ᠭᠣᠶᠣᠯᠠᠵᠤ ᠬᠤᠪᠴᠠᠰᠤᠯᠠᠭᠰᠠᠨ ᠨᠠᠰᠤᠲᠠᠨ ᠪᠤᠭᠤᠷᠤᠯᠴᠤᠳ ᠡ᠊ᠩᠨᠡᠷᠡᠨ ᠰᠠᠭᠤᠵᠠᠭᠠᠨᠠ᠃ ᠭᠠᠴᠠᠭᠠᠨ ᠤ ᠤᠳᠤᠷᠢᠳᠤᠯᠭᠠ ᠨᠠᠷ ᠮᠥᠷᠭᠥᠵᠦ ᠰᠥᠬᠥᠷᠡᠨ᠂ ᠬᠥᠬᠦᠦᠷ ᠲᠠᠮᠠᠬᠢᠯᠠᠨ ᠠᠮᠤᠷ ᠮᠡᠨᠳᠦ ᠰᠣᠯᠢᠵᠤ ᠪᠡᠯᠡᠭ ᠬᠦᠷᠭᠡᠪᠡ᠃
ᠬᠤᠷᠠᠯ ᠤᠨ ᠲᠠᠢᠰᠠᠨ ᠳᠤ ᠬᠦᠷᠦᠯᠴᠡᠨ ᠢᠷᠡᠭ᠍ᠰᠡᠨ ᠡᠯᠡ ᠱᠠᠲᠤᠨ ᠤ ᠨᠠᠮ ᠵᠠᠰᠠᠭ ᠤᠨ ᠤᠳᠤᠷᠢᠳᠤᠯᠭᠠ ᠪᠠ ᠭᠠᠳᠠᠨᠠ ᠡᠴᠡ ᠢᠷᠡᠭ᠍ᠰᠡᠨ ᠬᠦᠨᠳᠦᠲᠦ ᠵᠣᠴᠢᠳ ᠢ ᠤᠷᠢᠵᠤ ᠰᠠᠭᠤᠯᠭᠠᠪᠠ᠃
ᠶᠢᠰᠦᠨ ᠴᠠᠭ ᠪᠤᠯᠬᠤ ᠳᠤ ᠨᠠᠯᠠᠭᠠᠷ ᠨᠠᠮᠤᠷ ᠤᠨ ᠠᠯᠲᠠᠨ ᠨᠠᠷᠠ ᠪᠦᠷᠢᠳᠦ ᠶᠢᠨ ᠣᠷᠣᠢ ᠶᠢ ᠨᠡᠢᠳᠡᠮ ᠭᠡᠢᠭᠦᠯᠵᠦ᠂ ᠶᠡᠬᠡ ᠬᠤᠷᠠᠯ ᠤᠨ ᠡᠭᠢᠯᠡᠯᠲᠡ ᠶᠢᠨ ᠪᠦᠷᠢᠶᠡ ᠬᠠᠩᠭᠢᠨᠠᠨ᠂ ᠨᠠᠮ ᠵᠠᠰᠠᠭ ᠤᠨ ᠤᠳᠤᠷᠢᠳᠤᠯᠭᠠ ᠡᠴᠡ ᠨᠠᠭᠠᠳᠤᠮ ᠤᠨ ᠬᠤᠷᠠᠯ ᠡᠬᠢᠯᠡᠭ᠍ᠰᠡᠨ ᠢ ᠲᠤᠩᠬᠠᠭᠯᠠᠵᠤ᠂ ᠳᠠᠶᠠᠭᠠᠷ ᠢᠶᠠᠨ ᠪᠣᠰᠴᠤ ᠵᠣᠭᠰᠣᠨ ᠤᠯᠤᠰ ᠤᠨ ᠲᠤᠭ ᠢᠶᠠᠨ ᠥᠨᠳᠥᠷ ᠮᠠᠨᠳᠤᠭᠤᠯᠪᠠ᠃
ᠨᠠᠮ ᠵᠠᠰᠠᠭ ᠤᠨ ᠰᠣᠳᠣ ᠮᠡᠷᠭᠡᠨ ᠵᠢᠭᠠᠪᠤᠷᠢ ᠪᠠᠷ ᠡᠯᠡᠰᠦ ᠮᠠᠩᠬᠠ ᠪᠠᠨ ᠥᠭᠡᠷᠡᠴᠢᠯᠡᠵᠦ᠂ ᠠᠮᠢ ᠠᠬᠤᠢ ᠪᠠᠨ ᠬᠠᠮᠠᠭᠠᠯᠠᠨ᠂ ᠡᠪ ᠨᠢᠭᠡᠳᠦᠯ ᠢ ᠡᠷᠬᠢᠮᠯᠡᠵᠦ᠂ ᠪᠦᠯᠬᠦᠮᠳᠡᠯ ᠳᠠᠪᠰᠢᠯᠲᠠ ᠪᠠᠨ ᠠᠬᠢᠭᠤᠯᠤᠭᠰᠠᠨ ᠰᠢᠯᠢᠳᠡᠭ ᠤᠯᠠᠮᠵᠢᠯᠠᠯ ᠢᠶᠠᠨ ᠮᠥᠷᠳᠡᠨ᠂ ᠢᠷᠡᠭᠡᠳᠦᠢ ᠪᠠᠨ ᠪᠠᠷᠠᠯᠠᠨ᠂ ᠡᠬᠡ ᠨᠤᠲᠤᠭ ᠢᠶᠠᠨ ᠪᠦᠲᠦᠭᠡᠨ ᠪᠠᠢᠭᠤᠯᠵᠤ᠂ ᠪᠦᠭᠦ ᠭᠠᠴᠠᠭᠠ ᠪᠠᠨ ᠴᠡᠴᠡᠭ᠍ᠯᠡᠨ ᠬᠥᠭ᠍ᠵᠢᠭᠦᠯᠦᠶᠡ ᠭᠡᠬᠦ ᠬᠤᠷᠠᠯ ᠪᠠᠷᠢᠮᠲᠠᠯᠠᠭ᠌ᠴᠢ ᠶᠢᠨ ᠶᠠᠷᠢᠶᠠ ᠶᠢᠨ ᠳᠤᠮᠳᠠᠭᠤᠷ ᠨᠠᠮ ᠤᠨ ᠭᠡᠰᠢᠭᠦᠳ ᠤᠨ ᠠᠩᠭᠢ᠂ ᠵᠢᠷᠭᠤᠭᠠᠨ ᠮᠠᠯᠵᠢᠯ ᠤᠨ ᠬᠣᠷᠰᠢᠶᠠ ᠶᠢᠨ ᠠᠩᠭᠢ᠂ ᠪᠥᠬᠡᠴᠢᠨ᠂ ᠰᠤᠷᠴᠢᠨ᠂ ᠰᠢᠲᠠᠷᠠᠴᠢᠨ ᠤ ᠠᠩᠭᠢ᠂ ᠦᠦᠰᠢᠨ ᠤᠰᠤᠨ ᠵᠢᠷᠣᠭᠠ ᠮᠣᠷᠢᠲᠤ ᠶᠢᠨ ᠠᠩᠭᠢ ᠭᠡᠬᠦ ᠮᠡᠲᠦ ᠠᠩᠭᠢ ᠨᠤᠭᠤᠳ ᠤᠷᠲᠤ ᠬᠠᠳᠠᠭ ᠢᠶᠠᠨ ᠳᠡᠯᠭᠡᠨ ᠦᠵᠡᠭ᠍ᠴᠢᠳ ᠤᠨ ᠡᠮᠦᠨᠡᠭᠦᠷ ᠰᠦᠷ ᠵᠢᠪᠬᠤᠯᠠᠩᠲᠠᠢ ᠵᠢᠭ᠌ᠰᠠᠭᠠᠯ ᠶᠠᠪᠤᠵᠤ ᠥᠩᠭᠡᠷᠡᠪᠡ᠃
ᠳᠠᠷᠠᠭᠠ ᠨᠢ ᠥᠷᠭᠡᠨ ᠣᠯᠠᠨ ᠲᠦᠮᠡᠨ ᠤ ᠨᠢᠵᠢᠭᠢᠨᠡᠲᠡᠯᠡ ᠠᠯᠠᠭᠠ ᠲᠡᠰᠢᠯᠲᠡ ᠶᠢᠨ ᠳᠤᠮᠳᠠ ᠵᠢᠱᠢᠶᠡᠴᠢ ᠮᠠᠯᠴᠢᠨ᠂ ᠦᠨᠳᠦᠰᠦᠲᠡᠨ ᠤ ᠪᠦᠯᠭᠦᠮᠳᠡᠯᠲᠤ ᠡᠷᠦᠭᠡ᠂ ᠡᠯᠡᠰᠦ ᠮᠠᠩᠬᠠ ᠶᠢ ᠥᠭᠡᠷᠡᠴᠢᠯᠡᠭ᠍ᠰᠡᠨ ᠪᠠᠭᠠᠲᠤᠷ ᠁ ᠭᠡᠬᠦ ᠮᠡᠲᠦ ᠲᠡᠷᠢᠭᠦᠨ ᠤ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠢ ᠲᠠᠢᠰᠠᠨ ᠳᠤ ᠤᠷᠢᠵᠤ ᠱᠠᠩᠨᠠᠵᠤ ᠬᠥᠬᠢᠭᠦᠯᠪᠡ᠃
ᠱᠠᠩᠨᠠᠯ ᠬᠥᠬᠢᠭᠦᠯᠦᠯ ᠶᠠᠪᠤᠭᠳᠠᠵᠤ ᠪᠠᠷᠠᠮᠠᠭᠴᠠ ᠰᠢᠨᠡᠬᠡᠨ ᠲᠤᠰᠢᠶᠠᠯ ᠳᠤ ᠭᠠᠷᠤᠭᠰᠠᠨ ᠭᠠᠯ ᠵᠠᠯᠠᠭᠤ ᠨᠠᠰᠤᠨ ᠤ ᠨᠠᠮ ᠤᠨ ᠡᠭᠦᠷ ᠤᠨ ᠱᠦᠵᠢ᠂ ᠭᠠᠴᠠᠭᠠᠨ ᠳᠠᠷᠤᠭᠠ ᠰᠤᠳᠤᠯᠲᠤ ᠨᠠᠭᠠᠳᠤᠮ ᠳᠤ ᠬᠦᠷᠦᠯᠴᠡᠨ ᠢᠷᠡᠭ᠍ᠰᠡᠨ ᠭᠡᠢᠴᠢᠳ ᠤᠨ ᠤᠭᠲᠤᠯᠭᠠ ᠡᠴᠡ ᠠᠪᠤᠭᠠᠳ ᠨᠠᠭᠠᠳᠤᠮ ᠤᠨ ᠶᠠᠪᠤᠴᠠ᠂ ᠱᠠᠭᠠᠷᠳᠠᠯᠭᠠ᠂ ᠵᠣᠷᠢᠯᠭᠠ ᠵᠡᠷᠭᠡ ᠪᠦᠭᠦ ᠲᠠᠯᠠ ᠶᠢ ᠪᠠᠭᠲᠠᠭᠠᠭᠰᠠᠨ ᠤᠷᠤᠰᠤᠮᠠ ᠰᠠᠢᠬᠠᠨ᠂ ᠰᠡᠳᠬᠢᠯ ᠣᠭᠰᠢᠭᠤᠯᠤᠭᠰᠠᠨ ᠰᠠᠢᠬᠠᠨ ᠶᠠᠷᠢᠶᠠ ᠲᠠᠯᠪᠢᠪᠠ᠃ ᠳᠠᠷᠠᠭᠠᠯᠠᠨ ᠬᠠᠮᠢᠶᠠ ᠪᠦᠬᠦᠢ ᠬᠥᠮᠥᠰ ᠨᠠᠭᠠᠳᠤᠮ ᠤᠨ ᠬᠤᠷᠠᠯ ᠠᠮᠵᠢᠯᠲᠠ ᠲᠠᠢ ᠶᠠᠪᠤᠭᠳᠠᠬᠤ ᠶᠢ ᠵᠥᠩᠨᠡᠨ ᠪᠡᠯᠭᠡᠯᠡᠭ᠍ᠰᠡᠨ ᠶᠠᠷᠢᠶᠠ ᠬᠢᠪᠡ᠃ ᠦᠳᠡ ᠶᠢᠨ ᠡᠮᠦᠨᠡᠬᠢ ᠨᠠᠭᠠᠳᠤᠮ ᠤᠨ ᠬᠤᠷᠠᠯ ᠤᠨ ᠡᠭᠢᠯᠡᠯᠲᠡ ᠶᠢᠨ ᠶᠣᠰᠣᠯᠠᠯ ᠲᠡᠭᠦᠰᠦᠮᠡᠭ᠍ᠴᠡ ᠦᠳᠡ ᠶᠢᠨ ᠬᠣᠢᠨᠠ ᠡᠴᠡ ᠡᠬᠢᠯᠡᠨ᠂ ᠵᠢᠷᠣᠭᠠ ᠮᠣᠷᠢᠨ ᠤ ᠤᠷᠤᠯᠳᠤᠭᠠᠨ᠂ ᠣᠷᠳᠣᠰ ᠪᠦᠭᠡ᠂ ᠰᠤᠷ ᠬᠠᠷᠪᠤᠯᠲᠠ᠂ ᠰᠢᠲᠠᠷᠠ ᠶᠢᠨ ᠮᠥᠷᠥᠢᠴᠡᠭᠡᠨ᠂ ᠰᠠᠭᠰᠤᠨ ᠪᠥᠮᠪᠥᠭᠡ ᠶᠢᠨ ᠤᠷᠤᠯᠳᠤᠭᠠᠨ᠂ ᠠᠯᠠᠭᠠᠳᠠᠬᠤ ᠪᠥᠮᠪᠥᠭᠡ ᠶᠢᠨ ᠤᠷᠤᠯᠳᠤᠭᠠᠨ᠁ ᠤᠷᠢᠳ ᠬᠣᠵᠢᠳ ᠶᠠᠪᠤᠭᠳᠠᠨᠠ᠃ ᠠᠯᠳᠠᠷᠲᠤ ᠲᠣᠭᠯᠠᠭ᠌ᠴᠢᠳ ᠡᠴᠡ ᠠᠪᠤᠭᠠᠳ ᠠᠵᠢᠯ ᠤᠨ ᠴᠢᠯᠦᠭᠡᠨ ᠤ ᠮᠠᠯᠴᠢᠨ ᠲᠦᠮᠡᠨ ᠤ ᠤᠷᠠᠯᠢᠭ᠌ᠴᠢᠳ ᠤᠨ ᠲᠣᠬᠯᠠᠯᠲᠠ᠂ ᠰᠢᠯᠦᠭ᠂ ᠳᠠᠭᠤᠤ ᠶᠢᠨ ᠤᠷᠤᠯᠳᠤᠭᠠᠨ᠁ ᠭᠡᠬᠦ ᠮᠡᠲᠦ ᠰᠣᠶᠣᠯ ᠤᠷᠠᠯᠢᠭ ᠤᠨ ᠦᠳᠡᠰᠢᠯᠡᠭᠡ ᠴᠤ ᠨᠠᠭᠠᠳᠤᠮ ᠤᠨ ᠬᠤᠭᠤᠴᠠᠭᠠᠨ ᠳᠤ ᠦᠳᠡᠰᠢ ᠪᠦᠷᠢ ᠵᠠᠯᠭᠠᠯᠳᠤᠭᠠ ᠪᠠᠷ ᠶᠠᠪᠤᠭᠳᠠᠵᠤ ᠯᠠ ᠪᠠᠢᠯᠠ᠃
ᠥᠷᠭᠡᠨ ᠣᠯᠠᠨ ᠦᠵᠡᠭ᠍ᠴᠢ ᠬᠣᠯᠠ ᠣᠢᠷᠠ ᠶᠢ ᠬᠠᠮᠢᠶᠠᠷᠤᠯ ᠦᠭᠡᠢ᠂ ᠦᠳᠡᠰᠢᠯᠡᠭᠡ ᠪᠠᠷᠠᠮᠠᠭᠴᠠ ᠭᠡᠷ ᠭᠡᠷ ᠢᠶᠠᠷ ᠢᠶᠠᠨ ᠮᠠᠰᠢᠨ ᠲᠡᠷᠭᠡᠨ ᠳᠡᠬᠡᠨ ᠰᠠᠭᠤᠵᠤ ᠲᠣᠰᠣᠨ ᠵᠠᠮ ᠢᠶᠠᠷ ᠢᠶᠠᠨ ᠳᠠᠪᠬᠢᠭᠤᠯᠤᠨ ᠬᠠᠷᠢᠵᠤ᠂ ᠠᠷᠤ ᠭᠡᠷ ᠤᠨ ᠠᠵᠢᠯ ᠶᠠᠪᠤᠳᠠᠯ ᠢᠶᠠᠨ ᠳᠣᠭᠢᠨᠠᠭᠤᠯᠤᠨᠡ᠃ ᠳᠠᠷᠠᠭᠠ ᠡᠳᠦᠷ ᠨᠢ ᠦᠷ ᠤᠨ ᠲᠦᠡᠭ ᠢᠶᠠᠷ ᠪᠣᠰᠴᠤ ᠮᠠᠯ ᠬᠤᠢ ᠪᠠᠨ ᠳᠣᠭᠢᠨᠠᠭᠤᠯᠤᠮᠠᠬᠴᠠ ᠨᠠᠭᠠᠳᠤᠮ ᠳᠠᠭᠠᠨ ᠣᠰᠣᠯᠳᠠᠯ ᠦᠭᠡᠢ ᠬᠦᠷᠦᠯᠴᠡᠨ ᠢᠷᠡᠵᠡᠭᠡᠨᠡ᠃
ᠣᠯᠠᠨ ᠵᠦᠢᠯ ᠤᠨ ᠤᠷᠤᠯᠳᠤᠭᠠᠨ ᠬᠣᠢᠨᠠ ᠬᠣᠢᠨᠠ ᠡᠴᠡ ᠶᠠᠪᠤᠭᠳᠠᠭᠰᠠᠨ ᠳᠤ ᠦᠵᠡᠭ᠍ᠴᠢᠳ ᠢ ᠪᠠᠬᠠᠨ ᠰᠠᠨᠳᠤᠷᠭᠠᠪᠠ᠃ ᠵᠠᠷᠢᠮ ᠵᠠᠯᠠᠭᠤᠴᠤᠳ ᠪᠠᠭᠠᠴᠤᠳ ᠡᠭᠦᠨ ᠢ ᠨᠢ ᠵᠢᠭᠠᠬᠠᠨ ᠪᠠᠷᠠᠯᠠᠵᠤ᠂ ᠲᠡᠭᠦᠨ ᠢ ᠨᠢ ᠵᠢᠭᠠᠬᠠᠨ ᠱᠠᠭᠠᠢᠵᠤ ᠨᠠᠭᠠᠰᠢ ᠴᠠᠭᠠᠰᠢ ᠵᠥᠷᠢᠯᠳᠦᠵᠦ ᠴᠢᠯᠦᠭᠡ ᠵᠠᠪ ᠦᠭᠡᠢ ᠭᠦᠶᠦᠯᠳᠦᠨᠡ᠃ ᠭᠡᠲᠡᠯᠡ ᠨᠠᠰᠤᠲᠠᠨ ᠪᠤᠭᠤᠷᠤᠯᠴᠤᠳ ᠤᠨ ᠣᠯᠠᠩᠬᠢ ᠨᠢ ᠬᠠᠷᠢᠨ ᠵᠢᠷᠣᠭᠠ ᠮᠣᠷᠢᠨ ᠤ ᠤᠷᠤᠯᠳᠤᠭᠠᠨ ᠤ ᠲᠠᠯᠠᠪᠠᠢ ᠵᠦᠭ ᠮᠠᠢᠵᠢᠭᠢ ᠲᠠᠢᠵᠢᠭᠢ ᠠᠯᠬᠤᠯᠠᠨ ᠢᠷᠠᠵᠤ᠂ ᠨᠣᠮᠢᠨ ᠨᠣᠭᠣᠭᠠᠨ ᠣᠢ ᠶᠢᠨ ᠰᠡᠭᠦᠳᠡᠷ ᠲᠡᠭᠢ ᠴᠡᠪᠡᠷᠬᠡᠨ ᠴᠠᠭᠠᠨ ᠮᠠᠩᠬᠠᠨ ᠳᠡᠭᠡᠷᠡ ᠲᠣᠷᠭᠠᠨ ᠴᠠᠮᠴᠠᠨ ᠬᠣᠷᠮᠣᠢ ᠪᠠᠨ ᠳᠡᠪᠢᠰᠴᠦ᠂ ᠵᠠᠷᠢᠮ ᠨᠢ ᠵᠠᠪᠢᠯᠠᠨ᠂ ᠵᠠᠷᠢᠮ ᠨᠢ ᠬᠥᠯ ᠢᠶᠠᠨ ᠵᠢᠭᠢᠵᠦ᠂ ᠳᠤᠷᠠ ᠳᠠᠪᠠ ᠪᠠᠷ ᠢᠶᠠᠨ ᠲᠠᠭᠠᠯᠠᠮᠵᠢᠲᠠᠢ ᠰᠠᠢᠬᠠᠨ ᠰᠠᠭᠤᠵᠠᠭᠠᠵᠤ ᠤᠷᠤᠯᠳᠤᠭᠠᠨ ᠢ ᠰᠣᠨᠢᠷᠬᠠᠵᠠᠭᠠᠨᠠ᠃
ᠲᠡᠳᠡᠭᠡᠷ ᠬᠥᠮᠥᠰ ᠤᠨ ᠳᠤᠮᠳᠠ ᠡᠴᠡ ᠪᠢ ᠪᠠᠬᠠᠨ ᠡᠷᠢᠵᠦ ᠰᠤᠷᠠᠭᠯᠠᠵᠤ ᠪᠠᠢᠭᠠᠳ ᠪᠠᠭᠠ ᠶᠢᠨ ᠦᠶᠡ ᠳᠤ ᠨᠠᠭᠠᠳᠴᠤ ᠲᠣᠭᠯᠠᠵᠤ᠂ ᠶᠡᠬᠡ ᠬᠠᠮᠲᠤ ᠶᠢᠨ ᠦᠶᠡ ᠳᠤ ᠨᠡᠢᠯᠡᠵᠦ ᠠᠵᠢᠯ ᠭᠦᠳᠡᠯᠮᠦᠷᠢ ᠳᠤ ᠣᠷᠣᠯᠴᠠᠵᠤ ᠪᠠᠢᠭᠰᠠᠨ ᠬᠡᠳᠦᠨ ᠨᠠᠰᠤ ᠵᠢᠯ ᠬᠤᠷᠠᠭ ᠨᠠᠢᠢᠵᠠ ᠪᠠᠨ ᠣᠯᠵᠤ ᠬᠠᠪᠢᠷᠭᠠᠳᠠᠵᠤ ᠰᠠᠭᠤᠪᠠ᠃
ᠵᠢᠷᠤᠭᠠ ᠮᠣᠷᠢᠨ ᠤ ᠤᠷᠤᠯᠳᠤᠭᠠᠨ ᠤ ᠲᠠᠯᠠᠪᠠᠢ ᠳᠤ ᠭᠣᠶᠤ ᠬᠡᠭᠡᠨᠴᠢᠷ ᠬᠤᠪᠴᠠᠰᠤ ᠵᠠᠰᠠᠯ ᠲᠠᠢ ᠡᠷᠡᠭ᠍ᠲᠡᠢ ᠡᠮᠡᠭ᠍ᠲᠡᠢ ᠤᠶᠠᠭᠠᠴᠢᠳ ᠪᠡᠶᠡ ᠡᠴᠡ ᠪᠠᠨ ᠢᠯᠡᠭᠦᠦ ᠵᠠᠰᠠᠵᠤ ᠴᠢᠮᠡᠭ᠍ᠰᠡᠨ ᠲᠣᠰ ᠲᠣᠰ ᠤᠨ ᠢᠶᠠᠨ ᠮᠣᠷᠢᠳ ᠢᠶᠠᠨ ᠬᠥᠲᠥᠯᠥᠨ ᠵᠢᠭ᠌ᠰᠠᠨ ᠢᠷᠠᠵᠤ ᠤᠷᠤᠯᠳᠤᠵᠤ ᠮᠥᠷᠥᠢᠴᠡᠬᠦ ᠪᠠᠷ ᠪᠡᠯᠡᠳᠬᠡᠨᠡ᠃ ᠬᠥᠮᠥᠰ ᠤᠨ ᠬᠡᠯᠡᠯᠴᠡᠬᠦ ᠪᠠᠷ ᠪᠦᠭᠦ ᠦᠦᠰᠢᠨ ᠬᠣᠰᠢᠭᠤᠨ ᠤ ᠬᠡᠪᠴᠢᠶᠡᠨ ᠳᠠᠬᠢ ᠵᠢᠷᠤᠭᠠ ᠮᠣᠷᠢᠳ ᠪᠠᠷᠤᠭ ᠪᠦᠷ ᠬᠦᠷᠦᠯᠴᠡᠨ ᠢᠷᠡᠴᠢᠬᠡᠭ᠍ᠰᠡᠨ ᠪᠠᠢᠨᠠ ᠭᠡᠨᠡ᠃
ᠡᠭᠢᠯᠡᠯᠲᠡ ᠶᠢᠨ ᠳᠣᠬᠢᠶᠠ ᠳᠤᠤᠭᠠᠷᠤᠮᠠᠭᠴᠠ ᠨᠣᠭᠣᠭᠠᠨ ᠵᠦᠯᠭᠡ ᠪᠠ ᠨᠣᠮᠢᠨ ᠣᠢ ᠶᠢ ᠵᠠᠭᠠᠭᠯᠠᠭᠰᠠᠨ ᠬᠣᠢᠰᠢ ᠤᠷᠤᠭ᠌ᠰᠢ ᠪᠠᠨ ᠤᠷᠲᠤᠯᠵᠢᠨ ᠭᠡᠯᠪᠡᠷᠢ ᠲᠠᠢ ᠪᠣᠷᠣᠯᠵᠢᠨ ᠲᠠᠯᠠ ᠳᠡᠭᠡᠷᠡ ᠪᠦᠯᠦᠭ ᠪᠦᠯᠦᠭ ᠢᠶᠠᠷ ᠵᠢᠭ᠌ᠰᠠᠨ ᠭᠠᠷᠴᠤ ᠮᠥᠷᠥᠢᠴᠡᠪᠡ᠃
ᠮᠢᠨᠤ ᠬᠠᠵᠠᠭᠤ ᠳᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠳᠠᠯᠠ ᠶᠢᠨ ᠳᠠᠪᠠᠭᠠ ᠶᠢ ᠳᠠᠪᠠᠭᠰᠠᠨ ᠭᠡᠨᠳᠦᠨ ᠭᠤᠸᠠᠢ ᠵᠢᠷᠣᠭᠠ ᠮᠣᠷᠢᠳ ᠤᠨ ᠤᠷᠤᠯᠳᠤᠭᠠᠨ ᠢ ᠪᠠᠬᠠᠨ ᠬᠠᠷᠠᠵᠤ ᠬᠠᠷᠠᠭᠠᠳ᠄
《ᠵᠢᠷᠣᠭᠠ ᠮᠣᠷᠢ ᠶᠢ ᠤᠨᠤᠵᠤ ᠶᠠᠪᠤᠬᠤ ᠳᠤ ᠵᠥᠭᠡᠯᠡᠨ ᠪᠤᠯᠪᠠᠴᠤ ᠵᠠᠮ ᠬᠣᠷᠣᠭᠠᠬᠤ ᠨᠢ ᠬᠠᠰᠢ ᠯᠠ ᠬᠤᠷᠳᠤᠨ ᠮᠣᠷᠢ ᠨᠢ ᠳᠡᠭᠡᠷᠡ ᠶᠤᠮ ᠰᠢᠦ᠃ ᠪᠢ ᠶᠡᠷᠦ ᠨᠢ ᠪᠠᠭᠠ ᠡᠴᠡ ᠪᠠᠨ ᠬᠤᠷᠳᠤᠨ ᠮᠣᠷᠢᠨ ᠳᠤ ᠳᠤᠷᠠᠲᠠᠢ ᠬᠥᠮᠥᠨ ᠶᠤᠮ ᠳ᠋ᠠ᠃ ᠪᠢ ᠨᠠᠢ᠍ᠮᠠᠨ ᠨᠠᠰᠤᠨ ᠡᠴᠡ ᠪᠠᠨ ᠡᠬᠢᠯᠡᠨ ᠪᠠᠷᠢᠭᠠᠳᠠ ᠶᠢᠨ ᠵᠤᠯᠠᠭ ᠤᠨ ᠨᠠᠢᠢᠷ ᠳᠡᠭᠡᠷᠡ ᠭᠤᠴᠢᠨ ᠭᠠᠵᠠᠷ ᠤᠨ ᠦᠵᠦᠭᠦᠷ ᠡᠴᠡ ᠠᠵᠢᠷᠭᠠ ᠤᠨᠤᠵᠤ ᠤᠷᠤᠯᠳᠤᠨ ᠲᠡᠷᠢᠭᠦᠨ ᠱᠠᠠᠩ ᠬᠡᠳᠦᠨ ᠵᠢᠯ ᠳᠠᠷᠠᠭᠠᠯᠠᠨ ᠠᠪᠤᠭᠰᠠᠨ ᠶᠤᠮ ᠰᠢᠦ》 ᠭᠡᠪᠡᠯ ᠨᠠᠮᠢᠳ ᠭᠤᠸᠠᠢ ᠡᠯᠭᠦᠨ ᠠᠪᠴᠤ᠄
《ᠬᠤᠷᠳᠤᠨ ᠮᠣᠷᠢᠨ ᠤ ᠤᠷᠤᠯᠳᠤᠭᠠᠨ ᠠᠮᠠᠷᠬᠠᠨ᠃ ᠳᠥᠩᠭᠡᠭᠡᠳ ᠳᠡᠭᠡᠷᠡ ᠨᠢ ᠭᠠᠷᠴᠤ ᠲᠠᠯ ᠢ ᠨᠢ ᠨᠣᠴᠣᠴᠢᠬᠠᠪᠠᠯ᠂ ᠬᠡᠳᠦᠢ ᠬᠤᠷᠳᠤᠨ᠂ ᠬᠡᠳᠦᠢ ᠬᠣᠯᠠ ᠴᠤ ᠨᠢᠳᠦ ᠪᠠᠨ ᠠᠨᠢᠭᠠᠳ ᠤᠷᠤᠯᠳᠤᠵᠤ ᠪᠠᠢᠪᠠᠯ ᠪᠣᠯᠴᠢᠬᠠᠭᠰᠠᠨ ᠲᠡᠷᠡ》ᠭᠡᠳ ᠬᠠᠵᠠᠭᠤ ᠬᠠᠪᠢᠷᠭᠠ ᠶᠢᠨ ᠬᠥᠮᠥᠰ ᠢ ᠰᠢᠷᠪᠠᠨ ᠬᠠᠷᠠᠭᠠᠳ᠄
《ᠲᠠᠨᠤᠰ ᠮᠡᠳᠡᠬᠦ ᠦᠭᠡᠢ᠂ ᠡᠮᠨᠢᠭ ᠰᠤᠷᠭᠠᠪᠠ ᠭᠡᠭ᠍ᠴᠢ ᠴᠣᠬᠣᠮ ᠬᠠᠯᠠᠲᠠᠢ ᠶᠤᠮ ᠰᠢᠦ᠃ ᠬᠣᠢᠲᠤ ᠬᠣᠶᠠᠷ ᠬᠥᠯ ᠢᠶᠠᠷ ᠢᠶᠠᠨ ᠵᠣᠭᠰᠣᠭᠠᠳ ᠳᠡᠭᠡᠭ᠍ᠰᠢ ᠪᠠᠨ ᠪᠣᠰᠪᠠᠯ ᠪᠠᠰᠠ ᠭᠠᠢᠭᠤᠢ ᠬᠡᠷᠡᠭ᠃ ᠳᠡᠯ ᠡᠴᠡ ᠨᠢ ᠢᠯᠵᠢ ᠨᠣᠴᠣᠴᠢᠬᠠᠪᠠᠯ ᠶᠠᠭᠠᠬᠢᠵᠤ ᠴᠤ ᠴᠢᠳᠠᠬᠤ ᠦᠭᠡᠢ᠃ ᠬᠠᠷᠢᠨ ᠲᠣᠯᠣᠭᠠᠢ ᠪᠠᠨ ᠡᠮᠦᠨᠡᠬᠢ ᠬᠣᠶᠠᠷ ᠬᠥᠯ ᠤᠨ ᠳᠤᠮᠳᠠᠭᠤᠷ ᠢᠶᠠᠨ ᠨᠤᠭᠳᠤᠢᠯᠭᠠᠵᠤ ᠰᠢᠷᠭᠤᠭᠤᠯᠴᠢᠬᠠᠭᠠᠳ ᠲᠤᠢᠯᠠᠬᠤ ᠨᠢ ᠴᠣᠬᠣᠮ ᠰᠦᠷᠡᠬᠡᠢ ᠶᠤᠮ ᠰᠢᠦ᠃ ᠲᠡᠭᠡᠶᠡ ᠨᠠᠭᠠᠲᠤ ᠡᠷᠡ ᠬᠡᠴᠢᠨᠡᠭᠡᠨ ᠡᠮᠨᠢᠭ ᠰᠤᠷᠭᠠᠭᠠᠳ ᠭᠠᠵᠠᠷ ᠰᠢᠷᠣᠢᠳᠠᠬᠤ ᠶᠢ ᠮᠡᠳᠡᠬᠦ ᠦᠭᠡᠢ ᠰᠢᠦ!》 ᠭᠡᠪᠡᠯ᠂ ᠯᠤᠪᠰᠠᠩ ᠭᠤᠸᠠᠢ ᠵᠢᠷᠣᠭᠠ ᠮᠣᠷᠢᠨ ᠡᠴᠡ ᠬᠠᠷᠠᠴᠠ ᠪᠠᠨ ᠰᠢᠯᠵᠢᠭᠦᠯᠦᠨ᠂ ᠨᠠᠮᠢᠳ ᠵᠦᠭ ᠬᠠᠷᠠᠴᠠ ᠲᠤᠯᠭᠠᠨ 《ᠬᠠ᠂ ᠬᠠ!》 ᠭᠡᠵᠦ ᠬᠠᠳᠠᠭᠠᠨᠠᠲᠠᠯᠠ ᠢᠨᠢᠶᠡᠵᠦ᠄
《ᠸᠠᠢ ᠴᠢᠦ! ᠵᠠᠯᠠᠭᠤ ᠶᠢᠨ ᠦᠶᠡ ᠳᠤ ᠡᠮᠨᠢᠭ ᠭᠡᠭ᠍ᠴᠢ ᠶᠢ ᠬᠡᠨ ᠥᠯᠥ ᠰᠤᠷᠭᠠᠪᠠ᠃ ᠪᠢ ᠶᠠ ᠮᠠᠭᠤ ᠡᠮᠨᠢᠭ ᠠᠳᠤᠭᠤ ᠶᠢ ᠬᠡᠴᠢᠨᠡᠭᠡᠨ ᠰᠤᠷᠭᠠᠭᠰᠠᠨ ᠮᠠᠯᠠᠢ᠃ ᠴᠢ ᠣᠳᠣ ᠬᠥᠭ᠍ᠰᠢᠷᠡᠭᠡᠳ ᠡᠮᠨᠢᠭ ᠰᠤᠷᠭᠠᠵᠤ ᠳᠡᠢᠢᠯᠦᠨᠡ ᠦᠦ︖ ᠴᠢ ᠣᠳᠣ ᠰᠠᠨᠠᠭᠠ ᠨᠢ ᠪᠠᠢᠶᠠ᠂ ᠤᠨᠤᠭᠠ ᠴᠢᠨᠢ ᠬᠦᠷᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠨᠠ ᠰᠢᠦ! ᠴᠢ ᠣᠳᠣ ᠲᠠᠶᠠᠭ ᠢᠶᠠᠨ ᠳᠠᠭᠠᠭᠠᠭᠠᠳ ᠴᠥᠮᠴᠥᠷᠢᠵᠦ ᠪᠠᠢᠪᠠᠯ ᠪᠣᠯᠤᠭᠰᠠᠨ ᠲᠡᠷᠡ᠃ ᠬᠣᠶᠠᠭᠤᠯᠠ ᠨᠠᠰᠤ ᠰᠠᠴᠠᠭᠤ ᠪᠠᠢᠭᠠᠳ᠂ ᠪᠢ ᠵᠢᠷᠠᠨ ᠬᠡᠳᠦᠲᠡᠢ ᠳᠡᠬᠡᠨ ᠮᠠᠨ ᠤ ᠤᠷᠳᠤ ᠠᠢᠯ ᠤᠨ ᠠᠵᠢᠷᠭᠠ ᠦᠷᠢᠶᠡ ᠶᠢ ᠰᠤᠷᠭᠠᠵᠤ ᠥᠭ᠍ᠭᠦᠭ᠍ᠰᠡᠨ᠃ ᠲᠡᠷᠡ ᠦᠷᠢᠶᠡ ᠬᠢᠷᠢ ᠪᠠᠷ ᠢᠶᠠᠨ ᠲᠤᠢᠢᠯᠠᠪᠠ ᠭᠡᠰᠡᠨ ᠳᠤ ᠪᠢ ᠰᠠᠶ᠋ᠢᠬᠢ ᠵᠠᠯᠠᠭᠤ ᠶᠢᠨ ᠲᠤᠷᠰᠢᠯᠭᠠ ᠪᠠᠷ ᠢᠶᠠᠨ ᠬᠥᠯ ᠢᠶᠠᠷ ᠢᠶᠠᠨ ᠣᠷᠢᠶᠠᠵᠤ ᠭᠡᠳᠡᠰᠦ ᠶᠢ ᠨᠢ ᠬᠠᠪᠴᠢᠴᠢᠬᠠᠭᠰᠠᠨ ᠴᠢᠨᠢ ᠭᠡᠳᠦ ᠤᠨᠲᠤᠭᠤᠴᠠᠭᠠᠳ᠂ ᠴᠡᠴᠡᠷᠡᠭᠡᠳ ᠵᠣᠭᠰᠣᠴᠢᠬᠠᠯᠠ ᠰᠢᠦ!》 ᠭᠡᠪᠡᠯ ᠨᠠᠮᠢᠳ ᠲᠣᠯᠣᠭᠠᠢ ᠪᠠᠨ ᠮᠠᠭᠠᠵᠢᠵᠤ᠂ ᠦᠭᠡᠨ ᠦᠵᠦᠭᠦᠷ ᠢ ᠡᠷᠭᠢᠭᠦᠯᠵᠦ᠄ 《ᠴᠢ ᠲᠡᠷᠡ ᠡᠮᠨᠢᠭ ᠢᠶᠠᠨ ᠠᠪᠤᠭᠠᠳ ᠢᠷᠡᠬᠦᠢ (ᠢᠷᠡ) ! ᠪᠢ ᠰᠤᠷᠭᠠᠵᠤ ᠦᠵᠡᠶᠡ!》 ᠭᠡᠵᠦ ᠲᠡᠭᠦᠨ ᠤ ᠭᠡᠷᠭᠡᠢ ᠵᠦᠭ ᠬᠠᠷᠠᠴᠠ ᠲᠤᠯᠭᠠᠪᠠ᠃
ᠲᠡᠳᠡᠨ ᠤ ᠬᠠᠵᠠᠭᠤ ᠳᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠨᠢᠭᠡᠨ ᠢᠳᠡᠷ ᠡᠷᠡ ᠪᠣᠰᠴᠤ ᠵᠣᠭᠰᠣᠭᠠᠳ᠄
《ᠭᠦᠢ᠂ ᠭᠦᠢ! ᠲᠠᠨᠤᠰ ᠬᠠᠷᠠᠯ ᠳ᠋ᠠ! ᠲᠡᠷᠡ ᠬᠡᠭᠡᠷ ᠮᠣᠷᠢ᠂ ᠲᠡᠷᠡ ᠰᠢᠷᠭᠠ ᠮᠣᠷᠢ ᠶᠢ ᠳᠠᠭᠠᠷᠢᠯᠠ ᠰᠢᠦ! ᠲᠡᠷᠡ ᠬᠡᠭᠡᠷ ᠮᠣᠷᠢ ᠶᠢᠨ ᠠᠷᠤ ᠳᠤ ᠠᠷᠪᠠᠨ ᠣᠪᠣᠭᠠ ᠪᠣᠰᠴᠤ ᠪᠠᠢᠨᠠ!》 ᠭᠡᠵᠦ ᠥᠨᠳᠥᠷ ᠳᠠᠭᠤᠨ ᠢᠶᠠᠷ ᠬᠡᠯᠡᠭ᠍ᠰᠡᠨ ᠳᠤ ᠲᠡᠭᠦᠨ ᠤ ᠴᠠᠭᠠᠨᠠ ᠰᠠᠭᠤᠭᠰᠠᠨ ᠨᠢᠭᠡ ᠨᠢ᠄
《ᠪᠢ ᠶᠠᠭ ᠰᠠᠢᠬᠠᠨ ᠲᠣᠭᠠᠯᠠᠵᠤ ᠦᠵᠡᠭ᠍ᠰᠡᠨ ᠰᠢᠤ᠂ ᠠᠷᠪᠠᠨ ᠭᠤᠷᠪᠠᠨ ᠣᠪᠣᠭᠠ ᠪᠣᠰᠣᠯᠠ ᠰᠢᠤ》 ᠭᠡᠵᠦ ᠠᠮᠠ ᠪᠤᠯᠢᠶᠠᠯᠳᠤᠵᠠᠭᠠᠨᠠ᠃
ᠵᠢᠷᠣᠭᠠ ᠮᠣᠷᠢᠨ ᠤ ᠤᠷᠤᠯᠳᠤᠭᠠᠨ ᠢ ᠬᠠᠭᠠᠰ ᠦᠵᠡᠭᠡᠳ ᠪᠢ ᠪᠦᠭᠡ ᠶᠢᠨ ᠤᠷᠤᠯᠳᠤᠭᠠᠨ ᠢ ᠦᠵᠡᠬᠦ ᠰᠠᠨᠠᠭᠠᠲᠠᠢ ᠲᠡᠷᠡ ᠬᠡᠳᠦᠨ ᠨᠠᠢᠢᠵᠠ ᠳᠠᠭᠠᠨ ᠬᠡᠯᠡᠪᠡᠯ ᠲᠡᠳᠡ ᠶᠠᠭ ᠦᠵᠡᠭ᠍ᠴᠢᠳ ᠪᠢᠰᠢ ᠬᠠᠷᠢᠨ ᠥᠪᠡᠷ ᠢᠶᠠᠨ ᠤᠷᠤᠯᠳᠤᠭᠠᠨ ᠳᠤ ᠣᠷᠣᠯᠴᠠᠵᠤ ᠪᠠᠢᠬᠤ ᠰᠢᠭ᠋ ᠬᠥᠭ᠍ᠰᠡᠵᠦ᠂ ᠵᠢᠷᠣᠭᠠ ᠮᠣᠷᠢᠨ ᠤ ᠤᠷᠤᠯᠳᠤᠭᠠᠨ ᠢ ᠦᠵᠡᠵᠦ ᠭᠠᠯ ᠴᠣᠭ ᠳᠡᠭᠡᠷᠡ ᠨᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠨᠠᠮᠠ ᠶᠢ ᠳᠠᠭᠠᠬᠰᠠᠨ ᠬᠥᠮᠥᠨ ᠠᠯᠠᠭᠠ᠃
ᠪᠢ ᠲᠡᠷᠡ ᠤᠷᠤᠯᠳᠤᠭᠠᠨ ᠤ ᠲᠠᠯᠠᠪᠠᠢ ᠡᠴᠡ ᠨᠥᠭᠦᠭᠡ ᠤᠷᠤᠯᠳᠤᠭᠠᠨ ᠤ ᠲᠠᠯᠠᠪᠠᠢ ᠭᠦᠷᠲᠡᠯᠡ ᠵᠡᠭᠡᠯᠢ ᠭᠤᠳᠤᠮᠵᠢ ᠰᠢᠭ᠋ ᠵᠠᠯᠭᠠᠯᠳᠤᠭᠤᠯᠤᠨ ᠪᠣᠰᠬᠠᠭᠰᠠᠨ ᠮᠠᠢᠬᠠᠨ᠂ ᠰᠠᠭᠠᠯᠢ ᠰᠦ ᠶᠢᠨ ᠬᠠᠩᠬᠤᠯᠤᠭᠤᠨ ᠦᠨᠦᠷ ᠲᠤ ᠰᠣᠭᠲᠣᠭᠤᠷᠠᠨ᠂ ᠮᠠᠯᠴᠢᠳ ᠤᠨ ᠥᠪᠡᠷ ᠤᠨ ᠭᠠᠷ ᠢᠶᠠᠷ ᠢᠶᠠᠨ ᠬᠢᠵᠦ ᠪᠣᠯᠪᠠᠰᠤᠷᠠᠭᠤᠯᠤᠭᠰᠠᠨ ᠠᠢᠷᠠᠭ ᠲᠠᠷᠠᠭ᠂ ᠥᠷᠥᠮᠡ ᠴᠥᠷᠮᠡ᠂ ᠮᠢᠬᠠ ᠲᠣᠰᠣ ᠁ ᠵᠡᠷᠭᠡ ᠶᠢᠨ ᠨᠤᠲᠤᠭ ᠤᠨ ᠭᠠᠷᠤᠯᠲᠠ ᠶᠢᠨ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠶᠢ ᠭᠠᠢᠬᠠᠨ ᠰᠣᠨᠢᠷᠬᠠᠵᠤ᠂ ᠨᠢᠳᠦ ᠬᠤᠵᠢᠷᠯᠠᠨ ᠶᠠᠪᠤᠪᠠ᠃
ᠭᠡᠨᠡᠳᠲᠡ《ᠠᠪᠤ ᠰᠠᠢᠨ ᠢᠷᠡᠪᠡ ᠦᠦ︖》 ᠭᠡᠬᠦ ᠳᠠᠭᠤᠨ ᠢᠶᠠᠷ ᠲᠡᠷᠨ ᠵᠦᠭ ᠨᠢᠳᠦ ᠣᠷᠭᠢᠪᠠᠯ᠂ ᠮᠢᠨᠤ ᠵᠢᠭᠡᠨᠴᠢᠷ ᠬᠥᠪᠡᠭᠦᠨ ᠮᠥᠷᠭᠥᠵᠦ ᠰᠥᠬᠥᠷᠡᠨ ᠮᠡᠨᠳᠦᠴᠢᠯᠡᠨᠡ᠃ ᠲᠡᠭᠦᠨ ᠢ ᠤᠶᠠᠷᠠ ᠭᠡᠳᠡᠭ᠃ ᠲᠡᠷᠡ ᠠᠵᠢᠯ ᠤᠨ ᠴᠢᠯᠦᠭᠡ ᠪᠠᠷ ᠢᠶᠠᠨ ᠭᠠᠷᠠᠭ ᠤᠨ ᠡᠳᠦᠷ ᠢ ᠲᠣᠬᠢᠶᠠᠯᠳᠤᠭᠤᠯᠤᠨ ᠡᠨᠡ ᠨᠠᠭᠠᠳᠤᠮ ᠤᠨ ᠬᠤᠷᠠᠯ ᠳᠡᠭᠡᠷᠡ ᠳᠥᠭᠦᠮ ᠰᠡᠭᠦᠳᠡᠷ ᠣᠷᠣᠮᠵᠢ ᠪᠠᠷᠢᠵᠤ ᠬᠣᠨᠢᠨ ᠮᠢᠬᠠᠨ ᠤ ᠱᠣᠷᠯᠣᠭ ᠬᠤᠳᠠᠯᠳᠤᠵᠤ ᠪᠠᠢᠪᠠ᠃ ᠪᠢ ᠲᠡᠭᠡᠭᠡᠳ᠄
《ᠴᠢ ᠴᠥᠬᠥᠨ ᠱᠣᠷᠯᠣᠭ ᠬᠤᠳᠠᠯᠳᠤᠭᠠᠳ ᠵᠢᠭᠠ ᠵᠤᠭᠠ ᠶᠠᠭᠤᠮᠠ ᠣᠯᠵᠤ ᠪᠠᠢᠨᠠ ᠦᠦ ᠳ᠋ᠠ!》 ᠭᠡᠵᠦ ᠲᠣᠭᠣᠮᠰᠠᠷ ᠦᠭᠡᠢ ᠠᠰᠠᠭᠤᠪᠠᠯ᠄
《ᠬᠠᠢ᠂ ᠬᠠᠢ! ᠠᠪᠤ ᠮᠡᠳᠡᠬᠦ ᠦᠭᠡᠢ᠃ ᠪᠢᠳᠠ ᠬᠣᠨᠢ ᠪᠠᠨ ᠠᠮᠢᠳᠤ ᠪᠠᠷ ᠨᠢ ᠬᠤᠳᠠᠯᠳᠤᠭᠠᠳ ᠮᠢᠩᠭᠠᠨ ᠲᠠᠪᠤᠨ ᠵᠠᠭᠤᠨ ᠲᠥᠭᠥᠷᠢᠭ ᠣᠯᠬᠤ ᠶᠤᠮ ᠦᠦ ᠦᠭᠡᠢ ᠶᠤᠮ ᠦᠦ︖ ᠬᠣᠨᠢᠨ ᠮᠢᠬᠠ ᠶᠢ ᠢᠩᠭᠢᠵᠦ ᠥᠪᠡᠷ ᠢᠶᠠᠨ ᠰᠢᠷᠠᠵᠤ ᠬᠤᠳᠠᠯᠳᠤᠭᠠᠳ ᠪᠠᠷᠤᠭ ᠭᠤᠷᠪᠠᠨ ᠮᠢᠩᠭᠠᠨ ᠲᠥᠭᠥᠷᠢᠭ ᠬᠦᠷᠭᠡᠵᠦ ᠪᠠᠢᠨᠠ ᠰᠢᠦ! ᠬᠠᠰᠢ ᠯᠠ ᠨᠤᠲᠤᠭ ᠤᠨ ᠭᠠᠷᠤᠯᠲᠠ ᠪᠠᠨ ᠥᠪᠡᠰᠦᠪᠡᠨ ᠪᠣᠯᠪᠠᠰᠤᠷᠠᠭᠤᠯᠤᠨ ᠪᠣᠷᠣᠯᠠᠭᠤᠯᠪᠠᠯ ᠠᠰᠢᠭ᠌ᠲᠠᠢ ᠶᠤᠮ ᠪᠠᠢᠨᠠ ᠰᠢᠦ!》 ᠭᠡᠵᠦ ᠪᠠᠶᠠᠷ ᠭᠦᠷ ᠲᠠᠢ ᠬᠡᠯᠡᠪᠡ᠃
ᠪᠢ ᠴᠠᠭᠠᠰᠢ ᠶᠠᠪᠤᠵᠤ ᠪᠦᠭᠡ ᠶᠢᠨ ᠤᠷᠤᠯᠳᠤᠭᠠᠨ ᠤ ᠲᠠᠯᠠᠪᠠᠢ ᠳᠤ ᠢᠷᠠᠪᠠ᠃
ᠪᠦᠭᠡ ᠶᠢᠨ ᠤᠷᠤᠯᠳᠤᠭᠠᠨ ᠪᠣᠯᠣᠨ ᠰᠤᠷ ᠬᠠᠷᠪᠤᠯᠲᠠ ᠶᠢᠨ ᠮᠥᠷᠥᠢᠴᠡᠭᠡᠨ ᠨᠢ ᠪᠦᠷᠢᠳᠦ ᠶᠢᠨ ᠬᠣᠢᠲᠤ ᠣᠷᠣᠢ ᠶᠢᠨ ᠡ᠊ᠩᠭᠡᠷ ᠲᠤ ᠪᠠᠢᠷᠢᠯᠠᠵᠤ ᠪᠠᠢᠪᠠ᠃ ᠡ᠊ᠠᠳᠡᠭᠢ ᠶᠢᠨ ᠦᠵᠡᠭ᠍ᠴᠢᠳ ᠤᠨ ᠣᠯᠠᠩᠬᠢ ᠨᠢ ᠢᠳᠡᠷ ᠨᠠᠰᠤᠨ ᠤ ᠬᠥᠮᠥᠰ ᠪᠠ ᠵᠠᠯᠠᠭᠤᠴᠤᠳ ᠪᠠᠭᠠᠴᠤᠳ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠲᠡᠳᠡ ᠨᠠᠷ ᠣᠷᠣᠢ ᠶᠢᠨ ᠡ᠊ᠩᠭᠡᠷ ᠢ ᠳᠠᠭᠠᠭᠤᠯᠵᠤ ᠵᠠᠰᠠᠭᠰᠠᠨ ᠱᠠᠲᠤᠯᠵᠢᠨ ᠭᠡᠯᠪᠡᠷᠢ ᠲᠠᠢ ᠱᠦᠢᠨᠢ ᠲᠠᠢᠰᠠ ᠶᠢ ᠳᠦᠭᠦᠷᠲᠡᠯᠡ ᠰᠠᠭᠤᠨᠠ᠃ ᠪᠢ ᠲᠡᠳᠡᠨ ᠤ ᠳᠤᠮᠳᠠᠭᠤᠷ ᠪᠠᠬᠠᠨ ᠵᠠᠢ ᠣᠯᠵᠤ ᠰᠠᠭᠤᠪᠠ᠃ ᠪᠥᠬᠡᠴᠢᠳ ᠣᠨᠣᠭᠠ ᠪᠠᠨ ᠰᠤᠭᠤᠯᠤᠨ ᠠᠪᠤᠮᠠᠭᠴᠠ ᠵᠣᠳᠣᠭ ᠢᠶᠠᠨ ᠡᠮᠦᠰᠴᠦ᠂ ᠨᠠᠰᠤᠨ ᠳᠤ ᠭᠦᠷᠦᠭ᠍ᠰᠡᠳ ᠪᠠ ᠬᠡᠦᠬᠡᠳ ᠪᠠᠭᠠᠴᠤᠳ ᠤᠨ ᠳᠤᠭᠤᠢᠯᠠᠩ ᠭᠡᠵᠦ ᠡᠭᠡᠯᠵᠢᠭᠡ ᠪᠠᠷ ᠳᠡᠷᠪᠡᠨ ᠴᠠᠮᠨᠠᠨ ᠭᠠᠷᠴᠤ᠂ ᠴᠡᠪᠡᠷᠬᠡᠨ ᠵᠥᠭᠡᠯᠡᠨ ᠴᠠᠭᠠᠨ ᠮᠠᠩᠬᠠᠨ ᠳᠡᠭᠡᠷᠡ ᠬᠣᠣᠰ ᠬᠣᠣᠰ ᠢᠶᠠᠷ ᠤᠯᠠᠭᠠᠨ ᠨᠣᠭᠣᠭᠠᠨ ᠥᠩᠭᠡ ᠶᠢᠨ ᠪᠦᠰᠡ ᠡᠭᠡᠯᠳᠦᠷᠭᠡᠯᠡᠵᠦ᠂ ᠣᠷᠳᠣᠰ ᠪᠦᠭᠡ ᠪᠠᠷᠢᠯᠳᠤᠵᠠᠭᠠᠨᠠ᠃ ᠣᠷᠳᠣᠰ ᠪᠦᠭᠡ ᠪᠠᠷᠢᠯᠳᠤᠵᠤ ᠪᠠᠢᠬᠤ ᠪᠠᠷ ᠦᠵᠡᠪᠡᠯ ᠵᠥᠪᠭᠡᠨ ᠣᠷᠳᠣᠰ ᠤᠨ ᠬᠡᠪᠴᠢᠶᠡᠨ ᠳᠠᠬᠢ ᠪᠥᠬᠡᠴᠢᠳ ᠪᠠᠢᠬᠤ ᠮᠠᠶ᠋ᠢᠭ᠌ᠲᠠᠢ᠃ ᠴᠣᠬᠣᠮ ᠬᠡᠳᠦᠢ ᠬᠣᠣᠰ ᠪᠦᠭᠡ ᠭᠡᠰᠡᠨ ᠢ ᠪᠢ ᠰᠣᠨᠣᠰᠴᠤ ᠠᠮᠵᠢᠭ᠌ᠰᠠᠨ ᠦᠭᠡᠢ᠃ ᠣᠢᠷᠠ ᠵᠡᠷᠭᠡᠯᠡᠳᠡᠭᠡ ᠬᠥᠮᠥᠰ ᠡᠴᠡ ᠠᠰᠠᠭᠤᠶᠠ ᠭᠡᠬᠦ ᠳᠤ ᠮᠢᠨᠤ ᠬᠠᠵᠠᠭᠤ ᠬᠠᠪᠢᠷᠭᠠ ᠪᠠᠷ ᠴᠥᠮ ᠣᠲᠣᠭ᠂ ᠬᠠᠩᠭᠢᠨ᠂ ᠡᠵᠡᠨ ᠬᠣᠷᠣᠭᠠ ᠪᠠ ᠦᠦᠰᠢᠨ ᠬᠣᠰᠢᠭᠤᠨ ᠤ ᠡᠯᠡ ᠭᠠᠵᠠᠷ ᠡᠴᠡ ᠢᠷᠡᠭ᠍ᠰᠡᠨ ᠥᠯᠥ ᠲᠠᠨᠢᠬᠤ ᠬᠥᠮᠥᠰ ᠫᠢᠭ᠋ ᠱᠠᠭ ᠰᠠᠭᠤᠵᠠᠭᠠᠨᠠ᠃ ᠲᠡᠳᠡ ᠴᠤ ᠨᠠᠳᠠ ᠲᠠᠢ ᠠᠳᠠᠯᠢ ᠤᠬᠠᠭᠠ ᠲᠥᠭᠦᠭᠡ ᠶᠢ ᠨᠢ ᠣᠯᠵᠤ ᠶᠠᠳᠠᠨᠠ᠃ ᠲᠦᠮᠡᠨ ᠬᠥᠮᠥᠰ ᠤᠨ ᠳᠤᠮᠳᠠ ᠡᠴᠡ ᠨᠤᠲᠤᠭ ᠤᠨ ᠲᠠᠨᠢᠯ ᠲᠠᠰᠤᠯ ᠬᠥᠮᠥᠨ ᠢ ᠣᠯᠣᠨᠠ ᠭᠡᠳᠡᠭ ᠨᠢ ᠠᠮᠠᠷ ᠦᠭᠡᠢ᠃
ᠮᠢᠨᠤ ᠬᠠᠵᠠᠭᠤ ᠳᠠᠬᠢ ᠬᠥᠮᠥᠰ《ᠭᠦᠢ᠂ ᠭᠦᠢ! ᠲᠡᠷᠡ ᠨᠢᠭᠡ ᠨᠢ ᠡᠭᠦᠷᠦᠭ᠍ᠰᠡᠨ ᠪᠣᠯ ᠰᠢᠷᠣᠢᠢᠳᠠᠭᠤᠯᠴᠢᠬᠠᠬᠰᠠᠨ᠃ ᠡᠨᠡ ᠨᠢᠭᠡ ᠨᠢ ᠬᠤᠷᠳᠤᠨ ᠲᠠᠰᠢᠭ᠌ᠰᠠᠨ ᠪᠣᠯ ᠠᠮᠵᠢᠭᠤᠯᠴᠢᠬᠠᠭᠰᠠᠨ》 ᠭᠡᠬᠦ ᠮᠡᠲᠦ ᠪᠠᠷ ᠵᠣᠭᠣᠭ ᠳᠡᠯᠭᠡᠭ᠍ᠳᠡᠨᠡ᠃
ᠲᠡᠨᠳᠡ ᠡᠴᠡ ᠪᠠᠰᠠ ᠴᠠᠭᠠᠰᠢᠯᠠᠨ ᠰᠤᠷ ᠬᠠᠷᠪᠤᠯᠲᠠ᠂ ᠠᠯᠠᠭᠠᠳᠠᠬᠤ ᠪᠥᠮᠪᠥᠭᠡ᠂ ᠰᠠᠭᠰᠤᠨ ᠪᠥᠮᠪᠥᠭᠡ ᠶᠢᠨ ᠤᠷᠤᠯᠳᠤᠭᠠᠨ᠁ ᠭᠡᠬᠦ ᠮᠡᠲᠦ ᠤᠷᠤᠯᠳᠤᠭᠠᠨ ᠤ ᠲᠠᠯᠠᠪᠠᠢ ᠨᠤᠭᠤᠳ ᠦᠷᠭᠦᠯᠵᠢᠯᠡᠵᠦ ᠲᠠᠨᠢᠬᠤ᠂ ᠲᠠᠨᠢᠬᠤ ᠦᠭᠡᠢ ᠬᠥᠮᠥᠰ ᠤᠰᠤ ᠨᠡᠪᠲᠡᠷᠡᠬᠦ ᠵᠠᠢ ᠦᠭᠡᠢ ᠰᠢᠬᠠᠯᠴᠠᠨᠠ᠃ ᠪᠢ ᠬᠥᠮᠥᠰ ᠤᠨ ᠳᠤᠮᠳᠠᠭᠤᠷ ᠡᠭᠦᠨ ᠢ ᠦᠵᠡᠵᠦ᠂ ᠲᠡᠭᠦᠨ ᠢ ᠰᠣᠨᠢᠷᠬᠠᠭᠰᠠᠭᠠᠷ ᠪᠠᠢᠲᠠᠯᠠ᠂ ᠨᠢᠭᠡ ᠮᠡᠳᠡᠬᠦ ᠳᠤ ᠣᠷᠣᠢ ᠶᠢᠨ ᠬᠣᠭᠣᠯᠠᠨ ᠴᠠᠭ ᠪᠣᠯᠤᠭᠰᠠᠨ ᠪᠠᠢᠯᠠ᠃
ᠪᠢ ᠪᠤᠴᠠᠬᠤ ᠵᠠᠮ ᠢᠶᠠᠨ ᠡᠯᠭᠦᠵᠦ᠂ ᠭᠠᠴᠠᠭᠠᠨ ᠤ ᠡᠭᠦᠳᠡᠨ ᠡᠮᠨᠡᠯᠭᠡ ᠶᠢᠨ ᠤᠷᠳᠤᠭᠤᠷ ᠥᠩᠭᠡᠷᠡᠬᠦ ᠭᠡᠬᠦ ᠳᠤ ᠲᠡᠨᠳᠡ ᠪᠥᠭᠡᠮ ᠬᠥᠮᠥᠰ ᠣᠪᠤᠭᠠᠷᠠᠯᠳᠤᠨᠠ᠃ ᠪᠢ ᠳᠥᠬᠥᠵᠦ ᠣᠴᠢᠭ᠌ᠰᠠᠨ ᠴᠢᠨᠢ ᠬᠣᠲᠠ ᠡᠴᠡ ᠢᠷᠡᠭ᠍ᠰᠡᠨ ᠡᠮᠨᠡᠯᠭᠡ ᠶᠢᠨ ᠬᠣᠷᠢᠶᠠ ᠶᠢᠨ ᠨᠡᠷᠡ ᠶᠢ ᠨᠢ ᠥᠯᠥ ᠮᠡᠳᠡᠬᠦ᠂ ᠨᠢᠭᠤᠷ ᠢ ᠨᠢ ᠲᠠᠨᠢᠮᠠᠷ ᠠᠵᠢᠯ ᠤᠨ ᠴᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠡᠮᠴᠢ ᠨᠠᠷ ᠨᠠᠰᠤᠲᠠᠨ ᠪᠤᠭᠤᠷᠤᠯᠴᠤᠳ ᠲᠤ ᠡᠮᠴᠢᠯᠡᠭᠡ ᠬᠢᠵᠦ ᠪᠠᠢᠯᠠ᠃ ᠲᠡᠭᠦᠨ ᠤ ᠳᠣᠲᠣᠷᠠ ᠡᠴᠡ ᠪᠦᠷᠢᠳᠦ ᠭᠠᠴᠠᠭᠠᠨ ᠳᠤ ᠨᠤᠲᠤᠭ ᠳᠠᠢ ᠲᠠᠨᠢᠯ ᠡᠮᠴᠢ ᠡᠴᠡ᠄
《ᠬᠡᠵᠢᠶᠡ ᠢᠷᠠᠪᠠ ᠦᠦ︖ ᠲᠤᠰᠬᠠᠢᠯᠠᠨ ᠨᠠᠭᠠᠳᠤᠮ ᠳᠤ ᠢᠷᠡᠭ᠍ᠰᠡᠨ ᠦᠦ︖》 ᠭᠡᠪᠡᠯ᠄
《ᠲᠡᠢᠢᠮᠦ! ᠨᠠᠭᠠᠳᠤᠮ ᠡᠬᠢᠯᠡᠬᠦ ᠳᠤ ᠢᠷᠡᠭ᠍ᠰᠡᠨ᠃ ᠭᠠᠴᠠᠭᠠᠨ ᠡᠴᠡ ᠲᠤᠰᠬᠠᠢᠯᠠᠨ ᠮᠠᠨᠤᠰ ᠢ ᠨᠠᠭᠠᠳᠤᠮ ᠤᠨ ᠲᠠᠰᠢᠷᠠᠮ ᠢᠶᠠᠷ ᠮᠠᠯᠴᠢᠳ ᠲᠤ ᠦᠨᠡ ᠲᠥᠯᠥᠪᠦᠷᠢ ᠦᠭᠡᠢ ᠡᠮᠴᠢᠯᠡᠭᠡ ᠬᠢᠯᠭᠡᠬᠦ ᠪᠠᠷ ᠤᠷᠢᠵᠤ ᠠᠪᠴᠢᠷᠠᠭᠰᠠᠨ ᠶᠤᠮ》 ᠭᠡᠪᠡ᠃
ᠣᠷᠣᠢ ᠶᠢᠨ ᠬᠣᠭᠣᠯᠠᠨ ᠤ ᠳᠠᠷᠠᠭᠠ ᠪᠢ ᠪᠠᠢᠷᠢᠨ ᠳᠠᠭᠠᠨ ᠬᠦᠷᠴᠦ ᠪᠠᠭᠠ ᠬᠠᠵᠠᠭᠤᠯᠠᠪᠠ ᠭᠡᠰᠡᠨ ᠴᠢᠨᠢ ᠯᠦᠭ ᠰᠦᠭ ᠦᠭᠡᠢ ᠤᠨᠲᠠᠴᠢᠬᠠᠭᠰᠠᠨ ᠪᠠᠢᠯᠠ᠃ ᠭᠡᠨᠡᠳᠲᠡ ᠰᠡᠷᠡᠭ᠍ᠰᠡᠨ ᠳᠤ ᠭᠠᠳᠠᠨᠠ ᠠᠶᠠᠯᠭᠤ ᠬᠥᠭ᠍ᠵᠢᠮ ᠬᠠᠩᠭᠢᠨᠠᠵᠤ᠂ ᠬᠥᠮᠥᠨ ᠬᠠᠷᠠ ᠱᠤᠤᠭᠢᠯᠳᠤᠨᠠ᠃
ᠪᠤᠰᠢᠭᠤᠬᠠᠨ ᠪᠣᠰᠣᠭᠠᠳ ᠭᠠᠷᠤᠭᠰᠠᠨ ᠳᠤ ᠦᠵᠡᠭ᠍ᠴᠢᠳ ᠠᠭᠤᠳᠠᠮ ᠲᠠᠯᠠᠪᠠᠢ ᠳᠤ ᠪᠠᠭᠲᠠ ᠶᠠᠳᠠᠮᠠ ᠳᠦᠭᠦᠷᠴᠦ ᠦᠳᠡᠰᠢᠯᠡᠭᠡ ᠡᠬᠢᠯᠡᠴᠢᠬᠡᠭ᠍ᠰᠡᠨ ᠪᠠᠢᠯᠠ᠃
ᠲᠣᠬᠯᠠᠯᠲᠠ ᠶᠢᠨ ᠲᠠᠢᠰᠠᠨᠠ ᠥᠩᠭᠡᠲᠦ ᠳ᠋ᠧᠩ ᠰᠣᠯᠣᠩᠭᠠᠷᠠᠨ ᠡᠷᠭᠢᠯᠳᠦᠵᠦ᠂ ᠣᠶᠤᠨᠪᠢᠯᠢᠭ᠌᠂ ᠮᠥᠩᠭᠦᠨᠴᠡᠴᠡᠭ᠂ ᠮᠡᠷᠭᠡᠨᠪᠠᠭᠠᠲᠤᠷ ᠁ ᠭᠡᠬᠦ ᠨᠡᠷᠡᠲᠦ ᠳᠠᠭᠤᠴᠢᠨ ᠡᠴᠡ ᠠᠪᠤᠭᠠᠳ ᠤᠨᠠᠭᠠᠨ ᠪᠦᠷᠢᠳᠦ ᠤᠷᠠᠯᠢᠭ ᠤᠨ ᠪᠦᠯᠭᠦᠮ᠂ ᠠᠯᠲᠠᠨ ᠠᠶᠠᠰ ᠤᠷᠠᠯᠢᠭ ᠤᠨ ᠪᠦᠯᠭᠦᠮ ᠁ ᠭᠡᠬᠦ ᠮᠡᠲᠦ ᠨᠤᠲᠤᠭ ᠣᠷᠣᠨ ᠤ ᠣᠯᠠᠨ ᠲᠦᠮᠡᠨᠴᠢ ᠠᠵᠢᠯ ᠤᠨ ᠴᠢᠯᠦᠭᠡᠨ ᠤ ᠤᠷᠠᠯᠢᠭ ᠤᠨ ᠪᠦᠯᠭᠦᠮ ᠤᠳ ᠡᠭᠡᠯᠵᠢᠭᠡ ᠪᠠᠷ ᠲᠣᠭᠯᠠᠵᠤ ᠦᠵᠡᠭ᠍ᠴᠢᠳ ᠤᠨ ᠪᠠᠬᠠᠷᠬᠠᠯ ᠢ ᠥᠪᠡᠷ ᠤᠨ ᠡᠷᠬᠡ ᠦᠭᠡᠢ ᠲᠠᠲᠠᠨᠠ᠃
ᠳᠠᠷᠠᠭᠠ ᠣᠷᠣᠢ ᠨᠢ ᠰᠢᠯᠦᠭ ᠪᠣᠯᠣᠨ ᠳᠠᠭᠤᠤ ᠶᠢᠨ ᠤᠷᠤᠯᠳᠤᠭᠠᠨ ᠶᠠᠪᠤᠭᠳᠠᠪᠠ᠃ ᠪᠦᠭᠦ ᠬᠣᠲᠠ ᠶᠢᠨ ᠡᠯᠡ ᠭᠠᠵᠠᠷ ᠡᠴᠡ ᠢᠷᠡᠭ᠍ᠰᠡᠨ ᠬᠥᠭ᠍ᠰᠢᠨ ᠵᠠᠯᠠᠭᠤ ᠡᠷᠡᠭ᠍ᠲᠡᠢ ᠡᠮᠡᠭ᠍ᠲᠡᠢ ᠳᠠᠭᠤᠴᠢᠨ᠂ ᠰᠢᠯᠦᠭ᠍ᠴᠢᠨ ᠳᠠᠭᠤᠯᠠᠵᠤ ᠤᠶᠠᠩᠭᠠᠯᠠᠨ ᠪᠦᠷᠢᠳᠦ ᠨᠤᠲᠤᠭ ᠲᠤ ᠥᠩᠭᠡ ᠪᠤᠳᠤᠭ ᠨᠡᠮᠡᠷᠢᠯᠡᠨᠡ᠃
ᠨᠠᠭᠠᠳᠤᠮ ᠰᠢᠪᠲᠤᠷᠠᠭᠠᠨ ᠳᠠᠭᠠᠨ ᠣᠷᠣᠵᠤ᠂ ᠬᠠᠮᠤᠭ ᠰᠡᠭᠦᠯᠴᠢ ᠶᠢᠨ ᠡᠳᠦᠷ ᠪᠤᠯᠬᠤ ᠳᠤ ᠳᠣᠯᠣᠭᠠᠨ ᠮᠠᠯᠵᠢᠯ ᠤᠨ ᠬᠣᠷᠰᠢᠶᠠ᠂ ᠨᠢᠭᠡ ᠲᠣᠭᠣᠷᠢᠭ ᠤᠨ ᠳᠠᠯᠠ ᠨᠠᠶᠠ ᠭᠦᠷᠦᠭ᠍ᠰᠡᠨ ᠨᠠᠰᠤᠲᠠᠢᠴᠤᠳ ᠡᠴᠡ ᠠᠪᠤᠭᠠᠳ ᠢᠳᠡᠷ ᠵᠠᠯᠠᠭᠤᠴᠤᠳ ᠢᠶᠠᠷ ᠪᠦᠷᠢᠯᠳᠦᠭ᠍ᠰᠡᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠤ ᠬᠠᠮᠲᠤ ᠶᠢᠨ ᠳᠠᠭᠤᠤ ᠶᠢᠨ ᠮᠥᠷᠥᠢᠴᠡᠭᠡᠨ ᠪᠣᠯᠣᠨ ᠡᠵᠡᠨ ᠬᠣᠷᠣᠭᠠ ᠬᠣᠰᠢᠭᠤᠨ ᠤ ᠤᠷᠠᠯᠢᠭ ᠤᠨ ᠪᠦᠯᠭᠦᠮ ᠤᠨ ᠲᠣᠬᠯᠠᠯᠲᠠ ᠵᠢᠴᠢ ᠡᠯᠡ ᠵᠦᠢᠯ ᠤᠨ ᠤᠷᠤᠯᠳᠤᠭᠠᠨ ᠤ ᠱᠠᠩᠨᠠᠯ ᠬᠥᠬᠢᠭᠦᠯᠦᠯ ᠥᠷᠭᠡᠨ ᠣᠯᠠᠨ ᠦᠵᠡᠭ᠍ᠴᠢ ᠶᠢᠨ ᠨᠢᠵᠢᠭᠢᠨᠡᠲᠡᠯᠡ ᠠᠯᠠᠭᠠ ᠲᠡᠰᠢᠯᠲᠡ ᠶᠢᠨ ᠳᠤᠮᠳᠠ ᠪᠦᠬᠦᠯᠢ ᠭᠤᠷᠪᠠᠨ ᠡᠳᠦᠷ ᠤᠨ ᠨᠠᠭᠠᠳᠤᠮ ᠭᠦᠷ ᠬᠥᠭ᠍ᠵᠢᠭᠡᠨ ᠲᠠᠢ ᠥᠨᠳᠥᠷᠯᠡᠪᠡ᠃
ᠡᠨᠡ ᠨᠠᠭᠠᠳᠤᠮ ᠡ᠊ᠩ ᠤᠨ ᠨᠢᠭᠡᠨ ᠲᠣᠭᠯᠠᠭᠠᠮ ᠨᠠᠭᠠᠳᠤᠮ ᠪᠢᠰᠢ᠂ ᠪᠦᠷᠢᠳᠦ ᠭᠠᠴᠠᠭᠠᠨ ᠤ ᠰᠢᠨᠡ ᠨᠢᠭᠡᠨ ᠡᠭᠡᠯᠵᠢ ᠶᠢᠨ ᠨᠠᠮ ᠤᠨ ᠡᠭᠦᠷ ᠠᠷᠠᠳ ᠤᠨ ᠵᠥᠪᠯᠡᠯ ᠤᠨ ᠠᠵᠢᠯ ᠤᠨ ᠡᠭᠢᠯᠡᠯᠲᠡ᠃ ᠡᠨᠡ ᠨᠠᠭᠠᠳᠤᠮ ᠵᠥᠪᠭᠡᠨ ᠨᠢᠭᠡᠨ ᠭᠠᠴᠠᠭᠠᠨ ᠤ ᠬᠥᠭ᠍ᠵᠢᠯ ᠬᠤᠪᠢᠷᠠᠯ ᠢ ᠭᠠᠢᠬᠠᠭᠤᠯᠤᠭᠰᠠᠨ ᠨᠠᠭᠠᠳᠤᠮ ᠪᠢᠰᠢ᠂ ᠬᠠᠷᠢᠨ ᠪᠦᠭᠦ ᠤᠯᠤᠰ᠂ ᠪᠦᠭᠦ ᠣᠷᠣᠨ ᠤ ᠬᠥᠳᠡᠭᠡ ᠲᠣᠰᠬᠤᠨ᠂ ᠮᠠᠯᠵᠢᠬᠤ ᠣᠷᠣᠨ ᠤ ᠬᠥᠭ᠍ᠵᠢᠯ ᠪᠠᠳᠠᠷᠠᠯ ᠢ ᠲᠤᠰᠬᠠᠭᠰᠠᠨ ᠨᠠᠭᠠᠳᠤᠮ ᠪᠣᠯᠣᠯᠠ᠃
(ᠬᠤ· ᠠᠮᠤᠷᠪᠤᠶᠠᠨ)
