ᠵᠡᠭᠦᠳᠥᠨ ᠳᠤ ᠦᠭᠡᠢ ᠤᠴᠢᠷ
᠄ 2025-02-18 10:17:04
ᠪᠢ ᠵᠤᠴᠢᠨ ᠤ ᠦᠷᠦᠭᠡᠨ ᠳᠡᠭᠡᠨ ᠰᠠᠭᠤᠭᠠᠳ ᠵᠢᠷᠤᠭᠲᠤ ᠷᠠᠳᠢᠤ᠋ ᠠᠴᠠ ᠲᠡᠯᠡᠭᠡᠢ ᠳ᠋ᠠᠭᠢᠨ ᠤ ᠰᠤᠨᠢᠨ ᠰᠡᠪᠡᠭᠦᠨ ᠢ ᠠᠮᠳᠠᠷᠬᠠᠨ ᠰᠤᠨᠤᠰᠬᠤ ᠳᠠᠭᠠᠨ ᠦᠪᠡᠷ ᠤᠨ ᠡᠷᠭᠡ ᠦᠭᠡᠢ ᠪᠠᠭᠠ ᠢᠢᠨ ᠦᠶᠡ ᠳᠤ ᠺᠢᠨᠣ᠋ ᠦᠵᠡᠭᠦ ᠪᠠᠷ ᠭᠦᠭ᠍ᠰᠡᠵᠦ ᠶᠠᠪᠤᠭᠰᠠᠨ ᠲᠤᠬᠠᠢ ᠪᠤᠳᠤᠯ ᠪᠤᠯᠴᠢᠬᠠᠯᠠ᠃
ᠲᠡᠷᠡ ᠦᠶᠡ ᠳᠤ ᠬᠦᠳᠡᠭᠡ ᠲᠤᠰᠬᠤᠨ ᠮᠠᠯᠵᠢᠬᠤ ᠤᠷᠤᠨ ᠢᠶᠠᠷ ᠵᠦᠪᠭᠡᠨ ᠢᠷᠠᠭᠤ ᠰᠠᠶᠢᠬᠠᠨ ᠲᠠᠭᠤ ᠲᠠᠢ ᠷᠠᠳᠢᠤ᠋ ᠯᠠ ᠠᠶᠢᠯ ᠭᠡᠷ ᠤᠨ ᠠᠪᠳᠠᠷᠠ ᠱᠦᠭᠦᠢ ᠲᠡᠭᠡᠷᠡ ᠬᠠᠩᠭᠢᠨᠠᠵᠤ ᠨᠢᠭᠡ ᠭᠡᠷ ᠤᠨ ᠬᠦᠭ᠍ᠰᠢᠨ ᠵᠠᠯᠠᠭᠤ ᠭᠡᠤᠭᠡᠳ ᠨᠢᠯᠬᠠᠰ ᠪᠦᠬᠦᠨ ᠤ ᠴᠢᠭᠢᠨ ᠤ ᠰᠤᠨᠤᠷ ᠢ ᠪᠠᠶᠠᠰᠬᠠᠵᠤ ᠤᠶᠤᠨ ᠤ ᠰᠢᠮᠡ ᠢᠢ ᠬᠦᠷᠳᠡᠭᠡᠳᠡᠭ ᠪᠠᠶᠢᠭᠰᠠᠨ ᠶᠤᠮ᠃
ᠭᠡᠳᠤᠨ ᠰᠠᠷᠠ᠂ ᠴᠢᠨᠠᠭᠰᠢᠯᠠᠨ ᠵᠢᠯ ᠳᠤ ᠨᠢᠭᠡ ᠤᠳᠠᠭᠠ ᠲᠤᠭᠢᠶᠠᠯᠳᠤᠬᠤ ᠺᠢᠨᠣ᠋ ᠭᠠᠷᠭᠠᠬᠤ ᠠᠩᠭᠢ ᠢᠢᠨ ᠭᠢᠨᠢ ᠢᠷᠡᠬᠦ ᠪᠤᠯᠤᠭᠰᠠᠭᠠᠷ ᠭᠡᠤᠭᠡᠳ ᠪᠠᠭᠠᠴᠤᠳ ᠠᠴᠠ ᠠᠬᠠᠮᠠᠳ ᠲᠤᠮᠤᠭᠠᠳᠠᠳ ᠬᠦᠷᠳᠡᠯᠡ ᠭᠦᠭ᠍ᠰᠡᠨ ᠪᠠᠶᠠᠷᠯᠠᠵᠤ᠂ ᠠᠶᠢᠯ ᠠᠴᠠ ᠠᠶᠢᠯ ᠲᠡᠮᠵᠢᠨ ᠬᠠᠷᠢᠯᠴᠠᠨ ᠴᠢᠮᠡᠭᠡ ᠲᠡᠮᠵᠢᠭᠤᠯᠳᠠᠭ ᠪᠠᠶᠢᠭᠰᠠᠨ᠃ ᠲᠡᠭᠡᠭᠡᠳ ᠯᠠ ᠬᠤᠨᠢ ᠮᠠᠯ ᠢᠶᠠᠨ ᠡᠷᠳᠡᠭᠡᠨ ᠬᠤᠳᠠᠯᠠᠭᠤᠯᠵᠤ᠂ ᠭᠡᠤᠭᠡᠳ ᠪᠠᠭᠠᠴᠤᠳ ᠨᠢ ᠪᠤᠳᠠᠭᠠ ᠪᠠᠨ ᠲᠤᠲᠠᠭᠤ ᠲᠤᠷᠭᠤᠨ ᠢᠳᠠᠴᠢᠭᠡᠭᠡᠳ ᠺᠢᠨᠣ᠋ ᠦᠵᠡᠭᠦ ᠴᠠᠭ ᠠᠴᠠ ᠬᠤᠵᠢᠭᠳᠠᠬᠤ ᠡᠴᠡ ᠠᠶᠤᠵᠤ ᠶᠡᠭᠡᠴᠦᠳ ᠢᠶᠠᠨ ᠲᠠᠭᠢᠨ ᠲᠠᠪᠲᠠᠨ ᠱᠠᠭᠠᠷᠳᠠᠨ ᠪᠠᠶᠢᠵᠤ᠂ ᠮᠤᠷᠢ ᠤᠨᠤᠭᠠ᠂ ᠬᠠᠰᠠᠭ ᠲᠡᠷᠭᠡ ᠡᠰᠡᠭᠦᠯᠡ ᠶᠠᠪᠠᠭᠠᠨ ᠨᠢᠴᠦᠭᠦᠨ ᠢᠶᠠᠷ ᠠᠷᠪᠠ ᠬᠤᠷᠢ ᠠᠴᠠ ᠭᠤᠴᠢ ᠲᠦᠴᠢᠨ ᠭᠠᠵᠠᠷ ᠤᠨ ᠠᠶᠠᠨ ᠬᠦᠭᠡᠭᠡᠵᠦ᠂ ᠡᠪᠤᠯ ᠨᠢ ᠳᠠᠭᠠᠷᠠᠵᠤ ᠪᠡᠭᠡᠷᠡᠵᠤ᠂ ᠵᠤᠨ ᠨᠢ ᠢᠯᠠᠭᠠ ᠰᠢᠮᠠᠭᠤᠯ ᠳᠤ ᠬᠠᠳᠬᠤᠭᠳᠠᠨ᠂ ᠭᠡᠳᠤᠢ ᠵᠦᠳᠡᠷᠡᠯᠲᠡᠢ ᠵᠠᠮ ᠬᠦᠭᠡᠭᠡᠭᠰᠡᠨ ᠴᠤ ᠺᠢᠨᠣ᠋ ᠦᠵᠡᠭᠦ ᠨᠢ ᠶᠤᠰᠤᠳᠠᠢ ᠵᠢᠷᠭᠠᠯᠳᠠᠢ ᠪᠠᠶᠢᠭᠰᠠᠨ᠃
ᠲᠤᠬᠠᠢ ᠵᠢᠨ ᠦᠶᠡ ᠳᠤ︽ᠠᠯᠢᠮᠠ︾᠂ ︽ᠡᠵᠢ ᠨᠠᠭᠤᠷ︾ ᠭᠡᠬᠦ ᠮᠡᠲᠤ ᠢᠢᠨ ᠴᠦᠭᠡᠨ ᠲᠤᠭᠠᠨ ᠤ ᠯᠠ ᠮᠤᠩᠭᠤᠯ ᠭᠡᠯᠡᠨ ᠤ ᠺᠢᠨᠣ᠋ ᠪᠠᠶᠢᠭᠰᠠᠨ᠂ ᠪᠤᠰᠤᠳ ᠵᠠᠷᠢᠮ ᠺᠢᠨᠣ᠋ ᠢᠢ ᠮᠠᠯᠴᠢᠳ ᠦᠢᠯᠠᠭᠠᠬᠤ ᠦᠭᠡᠢ ᠪᠠᠶᠢᠭᠰᠠᠨ ᠴᠤ ᠵᠢᠷᠤᠭ ᠲᠦᠷᠰᠦ ᠡᠴᠡ ᠨᠢ ᠯᠠ ᠤᠶᠢᠯᠠᠭᠠᠵᠤ᠂ ᠣᠶᠤᠨ ᠤ ᠴᠠᠩᠭᠠᠭᠠ ᠪᠠᠨ ᠲᠠᠶᠢᠯᠳᠠᠭ ᠪᠠᠶᠢᠯᠠ᠃ ᠨᠠᠰᠤ ᠪᠠᠭᠠ ᠨᠢ ᠭᠡᠳᠤᠨ ᠡᠳᠤᠷ ᠬᠦᠯ ᠬᠦᠭᠡᠷᠴᠡᠭ ᠪᠤᠯᠵᠤ ᠬᠦᠭ᠍ᠰᠡᠵᠦ ᠪᠠᠶᠢᠭᠠᠳ ᠶᠠᠭ ᠺᠢᠨᠤ᠋ ᠦᠵᠡᠭᠦ ᠳᠤ ᠲᠡᠮᠡᠢ ᠤᠳᠠᠯ ᠦᠭᠡᠢ ᠤᠨᠲᠠᠭᠠᠳ ᠦᠭ᠍ᠴᠢᠭᠡᠳᠡᠭ᠃ ᠺᠢᠨᠤ᠋ ᠲᠠᠭᠤᠰᠬᠤ ᠪᠤᠯᠬᠤ ᠳᠤ ᠶᠡᠭᠡᠴᠦᠳ ᠤᠨ ᠲᠠᠭᠤᠳᠠᠬᠤ ᠪᠠᠷ ᠰᠠᠶ᠋ᠢ ᠤᠨᠳᠠᠭᠠᠳ ᠦᠡᠭᠭᠡᠷᠡᠭᠰᠡᠨ ᠵᠢᠡᠨ ᠮᠡᠳᠡᠷᠡᠵᠦ ᠶᠡᠭᠡᠳᠡ ᠬᠠᠷᠠᠮᠰᠠᠳᠠᠭ ᠪᠠᠶᠢᠵᠤ ᠪᠢᠯᠡ᠃
ᠮᠢᠨᠦ ᠬᠠᠮᠤᠭ ᠠᠴᠠ ᠬᠠᠷᠠᠮᠰᠠᠳᠠᠭ ᠨᠢ ᠨᠢᠭᠡ ᠤᠳᠠᠭᠠ ︽ᠬᠦᠭᠦᠷᠭᠡ︾ ᠭᠡᠬᠦ ᠮᠤᠩᠭᠤᠯ ᠭᠡᠯᠡᠨ ᠤ ᠺᠢᠨᠣ᠋ ᠭᠠᠷᠭᠠᠬᠤ ᠭᠤᠴᠢᠨ ᠭᠠᠵᠠᠷ ᠢ ᠶᠠᠪᠠᠭᠠᠨ ᠨᠢᠴᠤᠭᠦᠨ ᠢᠶᠠᠷ ᠬᠦᠶᠤᠭᠡᠳ ᠤᠴᠢᠬᠤ ᠳᠤ ᠦᠨᠦᠭᠢ ᠺᠢᠨᠣ᠋ ᠭᠠᠷᠭᠠᠳᠠᠭ ᠮᠠᠰᠢᠨ ᠨᠢ ᠡᠪᠳᠡᠷᠡᠴᠢᠭᠡᠭᠡᠳ ᠨᠢᠭᠡ ᠰᠦᠨᠢ ᠨᠠᠭᠠᠰᠢ ᠴᠠᠭᠠᠰᠢ ᠵᠢᠷᠠᠨ ᠭᠠᠵᠠᠷ ᠭᠠᠭᠠᠢ ᠶᠠᠪᠠᠭᠠᠨ ᠠᠶᠠᠯᠠᠬᠤ ᠳᠠᠭᠠᠨ ᠺᠢᠨᠣ᠋ ᠭᠠᠷᠭᠠᠭᠴᠢ ᠳᠤ ᠭᠤᠮᠤᠳᠠᠭᠰᠠᠨ ᠶᠤᠮ᠃ ᠰᠡᠭᠦᠯᠡᠷ ᠨᠢᠭᠡᠨ ᠤᠳᠠᠭᠠᠨ ᠤ ᠠᠵᠠ ᠲᠤᠭᠢᠶᠠᠯ ᠢᠶᠠᠷ ᠲᠤᠰ ᠺᠢᠨᠣ᠋ ᠢᠢ ᠭᠢᠳᠠᠳ ᠬᠡᠯᠡ ᠪᠠᠷ ᠭᠠᠷᠭᠠᠬᠤ ᠵᠢ ᠦᠵᠡᠭᠡᠳ ᠰᠠᠶ᠋ᠢ ᠯᠠ ᠲᠠᠶᠢᠪᠤᠰᠢᠷᠠᠭᠰᠠᠨ ᠶᠤᠮ᠃
ᠮᠠᠨ ᠤ ᠬᠤᠰᠢᠭᠤᠨ ᠤ ᠲᠦᠪ ᠰᠢᠨᠡᠪᠠᠯᠭᠠᠰᠤ ᠢᠢᠨ ᠵᠠᠭᠡᠯᠢ ᠭᠤᠳᠤᠮᠵᠢ ᠪᠠᠷ ᠦᠨᠳᠦᠷ ᠠᠰᠠᠷ ᠰᠦᠨᠳᠡᠷᠯᠡᠨ ᠴᠠᠷᠳᠠᠮᠠᠯ ᠵᠠᠮ ᠢᠶᠠᠷ ᠨᠢ ᠵᠤᠶᠢᠯ ᠪᠦᠷᠢ ᠢᠢᠨ ᠲᠡᠷᠭᠡ ᠦᠩᠭᠡ ᠢᠯᠭᠠᠷᠠᠨ ᠲᠡᠪᠭᠢᠯᠳᠦᠨᠠ᠃ ᠨᠠᠶᠠᠭᠠᠳ ᠤᠨ ᠤ ᠡᠴᠤᠰ ᠲᠤ ᠪᠢ ᠠᠩᠬᠠ ᠲᠤᠮᠳᠠᠲᠤ ᠳᠤ ᠤᠷᠤᠬᠤ ᠦᠶᠡ ᠳᠤ ᠡᠶᠢᠮᠦ ᠤᠯᠠᠨ ᠲᠡᠷᠭᠡ ᠪᠠᠶᠢᠭᠰᠠᠨ ᠦᠭᠡᠢ᠂ ᠡᠳᠦᠷ ᠲᠤ ᠨᠢᠭᠡ ᠬᠤᠶᠠᠷ ᠲᠤᠭᠢᠶᠠᠯᠳᠤᠬᠤ ᠠᠶᠠᠨᠴᠢᠨ ᠤ ᠲᠡᠷᠭᠡᠨ ᠠᠴᠠ ᠪᠠᠨ ᠪᠠᠭᠤᠭᠠᠳ ᠠᠯᠤᠬᠠ ᠭᠡᠯᠪᠡᠷᠢ ᠢᠢᠨ ᠵᠢᠵᠢᠭ᠍ᠭᠡᠨ ᠵᠡᠭᠡᠯᠢ ᠪᠠᠷ ᠨᠢ ᠬᠦᠨᠵᠢᠯᠡ ᠲᠡᠪᠢᠰᠭᠡᠷ ᠵᠢᠡᠨ ᠡᠭᠦᠷᠴᠤ ᠲᠡᠪᠡᠷᠢᠵᠤ ᠲᠡᠭᠦᠵᠢᠯᠡᠨ ᠶᠠᠪᠠᠭᠠᠨ ᠨᠢᠴᠦᠭᠦᠨ ᠲᠠᠮᠤ ᠪᠠᠨ ᠦᠵᠡᠵᠦ ᠵᠡᠭᠦᠨ ᠪᠡᠶᠡ ᠳᠤ ᠪᠠᠶᠢᠭᠠ ᠲᠤᠮᠳᠠᠲᠤ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠴᠦ ᠪᠠᠶᠢᠭᠰᠠᠨ ᠶᠤᠮ᠃
ᠶᠡᠷᠡᠭᠡᠳ ᠤᠨ ᠤ ᠡᠭᠢᠨ ᠪᠤᠯᠬᠤ ᠳᠤ ᠬᠠᠶᠠ ᠨᠢᠭᠡ ᠭᠤᠷᠪᠠᠨ ᠬᠦᠷᠳᠦᠲᠦ ᠲᠡᠷᠭᠡ ᠭᠠᠷᠴᠤ ᠢᠷᠡᠭ᠍ᠰᠡᠨ ᠪᠤᠯᠪᠠᠴᠤ ᠲᠠᠳᠬᠠᠯ ᠢᠶᠠᠷ ᠶᠠᠪᠠᠭᠠᠨ ᠶᠠᠪᠤᠭᠴᠢ ᠤᠯᠠᠨ᠃ ᠶᠡᠷᠦ ᠨᠢ ᠲᠡᠭᠦᠨ ᠤ ᠦᠨᠡ ᠬᠠᠡᠭᠰᠢ ᠭᠡᠭ᠍ᠴᠢ ᠨᠢ ᠶᠡᠷᠤ ᠵᠢᠨ ᠬᠦᠮᠤᠨ ᠰᠠᠭᠤᠵᠦ ᠲᠡᠶᠢᠯᠭᠦ ᠦᠭᠡᠢ ᠭᠡᠯᠡᠬᠦ ᠢᠢᠨ ᠠᠷᠭᠠ ᠦᠭᠡᠢ ᠦᠨᠳᠤᠷ ᠪᠠᠶᠢᠯᠠ᠃ ᠶᠡᠷᠡᠭᠡᠳ ᠤᠨ ᠤ ᠲᠤᠮᠳᠠᠴᠢ ᠪᠠᠷ ᠪᠠᠯᠭᠠᠰᠤᠨ ᠤ ᠵᠡᠭᠡᠯᠢ ᠭᠤᠳᠤᠮᠵᠢ ᠢᠢ ᠦᠷᠭᠡᠳᠭᠡᠨ ᠪᠠᠶᠢᠭᠤᠯᠤᠭᠰᠠᠨ ᠠᠴᠠ ᠨᠡᠶᠢᠲᠡ ᠢᠢᠨ ᠮᠠᠰᠢᠨ ᠲᠡᠷᠭᠡ ᠭᠠᠷᠭᠠᠭᠰᠠᠨ ᠨᠢ ᠬᠦᠮᠦᠨ ᠴᠦᠭᠡᠨ ᠠᠴᠠ ᠪᠤᠯᠵᠤ ᠬᠠᠮᠢᠭᠠ ᠳᠠᠯᠠᠯᠪᠠᠯ ᠲᠡᠨᠳᠡ ᠵᠤᠭᠰᠤᠳᠠᠭ ᠪᠠᠶᠢᠭᠰᠠᠨ ᠨᠢ ᠪᠠᠯᠭᠠᠰᠤᠨ ᠤ ᠪᠠᠨ ᠤᠴᠠᠯᠢᠭ ᠲᠠᠢ ᠨᠠᠶᠢᠳᠠ ᠢᠢᠨ ᠮᠠᠰᠢᠨ ᠲᠡᠷᠭᠡ ᠪᠤᠯᠪᠠ᠃ ᠡᠨᠡ ᠨᠢ ᠬᠦᠮᠦᠰ ᠤᠨ ᠶᠠᠪᠤᠵᠤ ᠰᠠᠭᠤᠬᠤ ᠳᠤ ᠨᠡᠯᠢᠶᠡᠳ ᠲᠦᠭᠦᠮ ᠪᠤᠯᠤᠯᠠ᠃ ᠡᠭᠦᠨ ᠤ ᠵᠡᠷᠭᠡᠴᠡᠭᠡ ᠪᠠᠷ ᠬᠤᠪᠢ ᠬᠦᠮᠦᠨ ᠤ ᠭᠤᠷᠪᠠᠨ ᠬᠦᠷᠳᠤᠲᠤ ᠲᠡᠷᠭᠡ ᠤᠯᠠᠰᠢᠷᠠᠨ ᠪᠦᠬᠦ ᠪᠠᠯᠭᠠᠰᠤᠨ ᠤ ᠵᠠᠮ ᠬᠠᠷᠢᠯᠴᠠᠭᠠ ᠢᠢ ᠭᠤᠷᠪᠠᠨ ᠬᠦᠷᠳᠤᠲᠦ ᠲᠡᠷᠭᠡ ᠡᠵᠡᠷᠭᠡᠬᠦ ᠪᠤᠯᠤᠯᠠ᠃
ᠬᠤᠶᠠᠷ ᠮᠢᠩᠭᠠᠨ ᠤᠨ ᠤ ᠲᠠᠷᠠᠭᠠ ᠪᠠᠷ ᠰᠢᠨᠡᠪᠠᠯᠭᠠᠰᠤᠨ ᠤ ᠵᠡᠭᠡᠯᠢ ᠪᠠᠷ ᠭᠤᠶᠤ ᠭᠢᠴᠡ ᠲᠠᠢ ᠲᠡᠺᠰᠢ ᠲᠡᠪᠭᠢᠯᠳᠤᠨ ᠭᠤᠷᠪᠠᠨ ᠬᠦᠷᠳᠦᠲᠦ ᠲᠡᠷᠭᠡ ᠢᠢ ᠠᠮᠠᠷᠠᠭᠠᠵᠤ ᠬᠤᠳᠠ ᠢᠢᠨ ᠲᠦᠷᠢ ᠲᠦᠷᠭᠦ ᠳᠤ ᠰᠢᠨᠡ ᠬᠤᠪᠢᠷᠡᠯᠲᠡ ᠢᠢ ᠤᠯᠭᠤᠵᠤ ᠦᠭ᠍ᠭᠦᠯᠡ᠃ ᠠᠷᠪᠠᠭᠠᠳ ᠤᠨ ᠪᠤᠯᠬᠤ ᠳᠤ ᠵᠢᠵᠢᠭ᠍ᠭᠡᠨ ᠪᠠᠯᠭᠠᠰᠤ ᠮᠠᠨᠢ ᠬᠦᠭᠵᠢᠭᠡᠳ ᠲᠠᠨᠢᠭᠳᠠᠰᠢ ᠦᠭᠡᠢ ᠬᠤᠪᠢᠷᠠᠨ ᠦᠷᠭᠡᠨ ᠲᠡᠷᠳᠠᠡᠭ ᠴᠠᠷᠳᠠᠮᠠᠯ ᠵᠠᠮ ᠦᠨᠳᠦᠷ ᠰᠦᠷᠯᠢᠭ ᠠᠰᠠᠷ ᠪᠠᠷᠢᠯᠭᠠ ᠵᠢᠭ᠍ᠳᠡᠷᠡᠨ ᠠᠯᠤᠬᠠ ᠭᠡᠯᠪᠡᠷᠢᠲᠡᠢ ᠵᠡᠭᠡᠯᠢ ᠨᠢ ᠤᠷᠤᠭᠰᠢ᠂ ᠬᠤᠶᠢᠰᠢ᠂ ᠵᠡᠭᠦᠨᠰᠢ᠂ ᠪᠠᠷᠠᠭᠤᠨᠰᠢ ᠬᠠᠨᠳᠤᠭᠰᠠᠨ ᠤᠯᠠᠨ ᠰᠦᠯᠵᠢᠶᠡ ᠵᠡᠭᠡᠯᠢ ᠲᠠᠢ ᠪᠤᠯᠤᠭᠰᠠᠨ ᠮᠦᠷᠳᠡᠭᠡᠨ ᠨᠠᠭᠠᠰᠢ ᠴᠠᠭᠠᠰᠢ ᠰᠦᠯᠵᠢᠯᠳᠦᠨ ᠲᠡᠪᠭᠢᠭᠠ ᠦᠡᠭᠭᠡ ᠪᠦᠷᠢᠳᠦᠭᠰᠡᠨ ᠶᠠᠩᠵᠤ ᠪᠦᠷᠢ ᠢᠢᠨ ᠲᠡᠮᠳᠡᠭᠳᠤ ᠲᠡᠷᠭᠡ ᠨᠢ ᠬᠤᠳᠠ ᠢᠢᠨ ᠨᠢᠭᠡᠨ ᠬᠢᠯᠡᠰ ᠦᠵᠡᠮᠵᠢ ᠪᠤᠯᠤᠨ ᠬᠠᠷᠠᠭᠳᠠᠨᠠ᠃
ᠶᠠᠪᠠᠭᠠᠨ ᠨᠢᠴᠦᠭᠦᠨ ᠢᠶᠠᠷ ᠲᠠᠭᠠᠷᠠᠵᠤ ᠪᠡᠭᠡᠷᠡᠨ ᠺᠢᠨᠣ᠋ ᠦᠵᠡᠬᠦ ᠪᠠᠷ ᠠᠶᠠᠯᠠᠵᠤ ᠪᠠᠶᠢᠭᠰᠠᠨ ᠴᠠᠭ ᠦᠶᠡ ᠳᠤ᠂ ᠪᠢᠳᠡ ᠶᠡᠷᠦ ᠬᠦᠳᠡᠭᠡ ᠨᠤᠲᠤᠭ ᠲᠤ ᠴᠠᠭᠢᠯᠭᠠᠨ ᠨᠡᠪᠳᠡᠷᠡᠨᠡ ᠭᠡᠳᠡᠭ ᠢ ᠰᠠᠨᠠᠵᠤ ᠤᠯᠳᠠᠭ ᠦᠭᠡᠢ ᠪᠠᠶᠢᠯᠠ᠃ ᠤᠳᠤ ᠪᠤᠯᠬᠤ ᠳᠤ ᠭᠡᠷ ᠲᠡᠭᠡᠨ ᠬᠠᠯᠠᠭᠤᠨ ᠴᠠᠢ ᠪᠠᠨ ᠤᠭᠤᠴᠢᠯᠠᠨ᠂ ᠬᠠᠮᠤᠭ ᠲᠤᠷᠠᠳᠠᠢ ᠪᠠᠨ ᠵᠤᠭᠤᠭᠯᠠᠨ ᠲᠠᠪᠠᠳᠠᠢ ᠰᠠᠭᠤᠵᠤ ᠠᠯᠢ ᠲᠤᠷᠠᠳᠠᠢ ᠭᠡᠰᠡᠨ ᠰᠤᠨᠢᠨ ᠰᠡᠪᠡᠭᠦᠨ ᠵᠤᠶᠢᠯ ᠢ ᠰᠦᠯᠵᠢᠶᠡᠨ ᠠᠴᠠ ᠦᠵᠡᠵᠦ ᠠᠮᠲᠠᠷᠬᠠᠨ ᠵᠢᠷᠭᠠᠬᠤ ᠪᠤᠯᠵᠠᠢ᠃
ᠭᠡᠤᠭᠡᠳ ᠦᠶᠡ ᠳᠤ᠂ ᠶᠡᠭᠡᠴᠦᠦᠯ ᠤᠨ ᠠᠮᠠᠨ ᠠᠴᠠ ᠰᠤᠨᠤᠰᠴᠤ ᠪᠠᠶᠢᠭᠰᠠᠨ ︽ᠰᠠᠷᠠ ᠢᠢᠨ ᠭᠠᠵᠠᠷ ᠢ ᠡᠳᠦᠷ ᠢᠶᠠᠷ ᠲᠤᠪᠴᠢᠯᠠᠵᠤ᠂ ᠡᠳᠦᠷ ᠤᠨ ᠭᠠᠵᠠᠷ ᠢ ᠴᠠᠭ ᠢᠶᠠᠷ ᠲᠤᠪᠴᠢᠯᠠᠭᠠᠳ ᠁︾ ᠭᠡᠳᠡᠭ ᠲᠤᠮᠤᠭ ᠦᠯᠢᠭᠡᠷ ᠨᠢ ᠤᠳᠤ ᠦᠨᠡᠨ ᠪᠤᠯᠵᠤ᠂ ᠵᠠᠮ ᠨᠡᠪᠳᠡᠷᠡᠯᠭᠡ᠂ ᠰᠤᠷᠠᠭ ᠴᠢᠮᠡᠭᠡ ᠨᠢᠰᠭᠦ ᠮᠡᠲᠦ ᠭᠦᠭ᠍ᠵᠢᠵᠦ ᠲᠡᠯᠡᠭᠡᠢ ᠳ᠋ᠠᠭᠢᠨ ᠤ ᠰᠤᠨᠢᠨ ᠴᠢᠮᠡᠭᠡ ᠢᠢ ᠲ᠋ᠧᠯᠸᠢᠰ᠂ ᠲᠤᠤᠷ ᠰᠦᠯᠵᠢᠶᠡ ᠠᠴᠠ ᠴᠠᠭ ᠲᠠᠷᠤᠢ ᠳᠤᠨᠢ ᠰᠤᠨᠤᠰᠬᠤ ᠪᠤᠯᠤᠭᠰᠠᠨ ᠨᠢ ᠶᠠᠭᠤᠳᠠᠢ ᠭᠠᠶᠢᠬᠠᠮᠰᠢᠭ ᠪᠢᠯᠡ︕
ᠤᠯᠤᠰ ᠤᠨ ᠲᠦᠷᠦ ᠢᠢᠨ ᠪᠤᠳᠤᠯᠭᠠ ᠢᠢᠨ ᠲᠤᠶᠠᠭᠠᠯᠠᠯ ᠲᠤᠤᠷᠠ ᠮᠠᠨ ᠤ ᠪᠠᠭᠠᠴᠤᠳ ᠭᠡᠤᠭᠡᠳ ᠤᠯᠠᠨ ᠬᠡᠯᠡᠨ ᠤ ᠺᠢᠨᠣ᠋ ᠵᠦᠴᠦᠭᠡ᠂ ᠮᠡᠳᠡᠯᠭᠡ ᠮᠡᠷᠭᠡᠰᠢᠯ ᠢ ᠵᠢᠷᠤᠭᠲᠤ ᠷᠠᠳᠢᠤ᠋᠂ ᠭᠠᠷ ᠤᠲᠠᠰᠤ᠂ ᠺᠤᠮᠫᠢᠥ᠋ᠲ᠋ᠧᠷ ᠵᠢᠡᠷ ᠰᠦᠯᠵᠢᠶᠡᠨ ᠠᠴᠠ ᠤᠯᠵᠤ ᠰᠤᠨᠢᠷᠬᠠᠬᠤ ᠪᠤᠯᠤᠯᠠ᠃
ᠠᠷᠠᠳ ᠲᠦᠮᠡᠨ ᠤ ᠰᠤᠶᠤᠯ ᠤᠨ ᠠᠮᠢᠳᠤᠷᠠᠯ ᠬᠦᠭᠵᠢᠭᠡᠳ ᠦᠨᠤᠳᠤᠷ ᠤᠨ ᠡᠨᠡ ᠭᠡᠮᠵᠢᠶᠠᠨ ᠳᠤ ᠬᠦᠷᠤᠨᠠ ᠭᠡᠰᠡᠨ ᠢ ᠶᠡᠷᠦ ᠪᠤᠳᠤᠵᠤ ᠤᠯᠤᠭᠠ ᠦᠭᠡᠢ᠃ ᠴᠠᠭ ᠦᠶᠡ ᠢᠢᠨ ᠭᠦᠭ᠍ᠵᠢᠯᠳᠡ ᠢᠢ ᠴᠢ ᠪᠢᠲᠡ ᠲᠦᠰᠦᠪᠯᠡᠭᠦᠶᠡ ᠪᠡᠷᠭᠡ︕ ᠡᠨᠡ ᠦᠨᠡᠭᠡᠷ ᠲᠤᠬᠠᠢ ᠵᠢᠨ ᠦᠶᠠ ᠵᠢᠨ ︽ᠵᠡᠭᠦᠳᠤᠨ ᠳᠦ ᠦᠭᠡᠢ ᠤᠴᠢᠷ ᠡᠭᠦᠳᠡᠨ ᠳᠤ︾ ᠭᠡᠭ᠍ᠴᠢ ᠪᠤᠯᠤᠯᠠ᠃
